កំពង់ចាម ៖ ប្រជាពលរដ្ឋ ដែលមកផ្សារទិញត្រីសាច់នៅផ្សាបឹងកុក មានការភ្ញាក់ផ្អើលយ៉ាងខ្លាំងដោយបានប្រទះឃើញសពបុរសម្នាក់ដេកស្លាប់ដោយមានឈាម ជាច្រើននៅក្បែរនោះ។
លោកអ៊ឹង ប៊ុន អធិការនគរបាលក្រុងកំពង់ចាម ដែលមានវត្តមាននៅកន្លែងកើតហេតុបានអោយដឹងថា នៅថ្ងៃទី១៤ ខែតុលា ឆ្នាំ២០១៨ វេលាម៉ោង០៧ និង០០នាទី លោកបានទទួលព័ត៌មានពីប្រជាពលរដ្ឋថា មានករណីមនុស្សស្លាប់នៅចំណុចខាងជើងរបង រដ្ឋាករទឹក( ផ្សារបឹងកុក) ស្ថិតនៅក្នុងភូមិទី១៤ សង្កាត់កំពង់ចាម ក្រុងកំពង់ចាម ខេត្តកំពង់ចាម។
ក្រោយពីបានទទួលព័ត៌មានភ្លាម លោកដឹកនាំជំនាញនគរបាល ក្រុងកំពង់ចាម បានចុះដល់កន្លែងកើតហេតុ ធ្វើការហ៊ុមព័ទ្ធ កន្លែងកើតហេតុ ហើយធ្វើការស្រាវជ្រាវ ពិនិត្យ សាកសព ឈ្មោះ ឌិន សុខគា ភេទប្រុស អាយុ៤៩ឆ្នាំ ជាតិខ្មែរ មុខរបរ លក់ដូរ នៅភូមិត្រពាំងតាសុខ ឃុំទ្រាន ស្រុកកំពង់សៀម ខេត្តកំពង់ចាម។
អ្នកស្រី ធាន ស្រ៊ន់ ត្រូវជាប្រពន្ធ បានអោយដឹងថា ប្តីខ្លួនជាមនុស្សចូលចិត្តផឹកស្រានិង មានជំងឺក្អកប្រចាំកាយ ហើយក៏មិនធ្លាប់មានទំនាស់ជាមួយអ្នកណាដែរ។ ភរិយាជនរងគ្រោះបានបន្តថា នៅថ្ងៃទី១៤ ខែតុលា ឆ្នាំ២០១៨ ប្តីខ្លួនដឹកបន្លែមកផ្សារដូចសព្វដង។
លុះនៅម៉ោង០៦និង៣០នាទីព្រឹក ពេលប្តីយួរត្រីចេញពីផ្សារបឹងកុក មកមុនខ្លួន រួចខ្លួនដើរតាមក្រោយមករកប្តីស្រាប់តែឃើញប្តីដេក ហូរឈាមតាមមាត់ នៅមានដង្ហើម នៅក្បែររបងខាងជើង រដ្ឋាករទឹក ពេលនោះ ក៏បានស្រែកហៅគេ អោយជួយប្តី បានមួយសន្ទុះក្រោយមកប្តីបានដាច់ដង្ហើមស្លាបតែម្តង។
លោក អធិការបានបញ្ជាក់ថា ជំនាញបានបង្កើតគណៈកម្មការពិនិត្យសាកសព ដោយមាន សមាសភាពចូលរួមមាន៖
-នគរបាលជំនាញ បច្ចេកទេស និងកោសល្យវិច័យខេត្ត កំពង់ចាម
-ជំនាញនគរបាល វិភាគ និងពិនិត្យកន្លែងកើតហេតុ ក្រុងកំពង់ចាម
-លោកគ្រូពេទ្យខេត្តកំពង់ចាម
-ក្រុមប្រឹក្សា និងមេភូមិទី១៤។
ឆ្លងតាមការពិនិត្យសាកសព ឈ្មោះ ឌិន សុខគា គណៈកម្មការ សន្និដ្ឋានបានថា ៖
-ជនរងគ្រោះបានស្លាប់ដោយសារតែជម្ងឺធ្លាយក្រពះ
.ដោយមានហូរឈាមច្រើនតាមច្រមុះ មាត់ កន្លែងជុំវិញសព
.អាចហូរឈាមមកពីប្រពន្ធរំលាយអាហារ
.សាកសពគ្មានរបួស ជាំ បាក់ឆ្អឹង លើដងខ្លួនទេ
.មូលហេតុស្លាប់ គាំងចង្វាក់ដង្ហើមនិងបេះដូង។
ចំពោះសាកសពជំនាញយើងបានប្រគល់ជូនសាច់ញាតិ ដើម្បីយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments