អ្នកប្រដាល់ជើងខ្លាំងរបស់កម្ពុជា កែវ រំចង់ ក្លិបដំបងគ្រញូងមានរិទ្ធខេត្តបាត់ដំបង បានវាយចាញ់អ្នកប្រដាល់ថៃ ដាបម៉ន ភុមផានមួង ក្នុងទឹកទី៤ នៅក្នុងការជួបប្រកួតគ្នានាយប់ថ្ងៃទី១៤ ខែតុលា ឆ្នាំ២០១៨ ក្នុងព្រឹត្តិការណ៍ប្រដាល់ខារ៉ាបាវ លើសង្វៀនបាយ័នស្ទឹងមានជ័យ។
ក្នុងការប្រកួតជាមួយម្ចាស់ខ្សែ ក្រវាត់ ដាបម៉ន ភុមផានមួង នេះ រំចង់ បានអស់ដំណើរនៅទឹកទី៤ ដោយស្ទើរសន្លប់ឈរទៅហើយ ក្រោមទម្ងន់ជើង ជង្គង់ និងកែង របស់ដាបម៉ន ភុមផានមួង។ រំចង់ ត្រូវអាជ្ញាកណ្តាលរាប់៨ពីរដង មុនត្រូវអាជ្ញាកណ្តាលបញ្ឈប់លែងឲ្យប្រកួតក្នុងទឹកទី៤នេះ ព្រោះរំចង់ត្រូវ ដាបម៉ន ភុមផានមួង អុកជង្គង់ចូលពោះឡើងចង់បែកថ្លើមទៅហើយនោះ ។
ក្រុមអ្នកវិភាគប្រដាល់ក្នុងស្រុក បានស្ដីបន្ទោសថា រំចង់ អាចនឹងជួបស្ថានភាពល្អជាងនោះប្រសិនគេព្យាយាមវាយមួយៗ ដោយមិនច្រឡោតខ្លាំងពេកនោះ តែក្រុមអ្នកវិភាគ ក៏ទទួលស្គាល់ថា រំចង់ ត្រូវតែចាញ់អ្នកប្រដាល់ថៃនេះដែរ ព្រោះដាបម៉ន ភុមផានមួង គេខ្ពស់រហូតដល់១,៨៥ម៉ែត្រ ឯណោះ ដៃជើងវែង ហើយក៏ជាម្ចាស់ខ្សែក្រវាត់នៅស្រុកថៃទៀត ។ ទោះជាយ៉ាងណា ក៏មានអ្នកខ្លះ ទៀត ក៏បានសរសើរទឹកចិត្តអង់អាចរបស់ កែវ រំចង់ ដែលហ៊ានប្រឈមតទល់ជាមួយ ដាបម៉ន ភុមផានមួងនេះ បើទោះជាដឹងថា អ្នកប្រដាល់ថៃរូបនេះ មានកម្ពស់ខ្ពស់ជាងខ្លួនក៏ដោយចុះ។
សម្រាប់ការប្រកួតគូអន្តរជាតិនារីវិញ វី ស្រីខួច កីឡាការិនីប្រដាល់ក្លិបនាគរាជមានជ័យ បានផ្តួលកីឡាការិនីហុល្លង់ រ៉ូស សាណេ នៅក្នុងទឹកទី៤ ។
កីឡាការិនីហុល្លង់ រ៉ូស សាណេ ដែលមើលទៅមិនសូវទាន់ចេះស្ទាត់ពីប្រដាល់ប៉ុន្មាននោះ ត្រូវ វី ស្រីខួច ដាល់ចំមុខពេញៗជាច្រើនដៃ តាំងពីក្នុងទឹកទី២មកម្ល៉េះ ដែលត្រូវអាជ្ញាកណ្តាលរាប់៨ពីរដង ហើយមកដល់ទឹកទី៤ ត្រូវរាប់៨ម្តងទៀត បន្ទាប់មកក៏ត្រូវបញ្ឈប់លែងឲ្យប្រកួតតែម្តង ដោយសារមិនអាចទប់ទល់ជាមួយកណ្តាប់ដៃរបស់វី ស្រីខួចបាននោះ ។
ចំពោះការប្រកួតគូពិសេសខ្មែរនិងខ្មែរវិញ តូច ទូ អ្នកប្រដាល់សមាគមកីឡាប្រដាល់ក្រសួងការពារជាតិ គេសងសឹកចៅ ផលឌឿ អ្នកប្រដាល់ក្លិបសំរោងកោងខេត្តបាត់ដំបង បានសម្រេច ដោយដាល់ចៅ ផលឌឿអោយសន្លប់ក្នុងទឹកទី៣ ។ ពួកគេទាំងពីរ ប្រកួតគ្នាក្នុងទម្ងន់៦៩ គីឡូក្រាម។
ដោយឡែក ការប្រកួតដណ្តើមពានរង្វាន់អនុស្សាវរីយ៍បាយ័ន ទម្ងន់៦៣,៥០០គីឡូក្រាម ដែលមានអ្នកប្រដាល់ទម្ងន់៦៣,៥០០គីឡូក្រាម ៤ រូបចូលរួមប្រកួត កាលពីល្ងាចថ្ងៃទី១៣តុលានោះ ជាលទ្ធផលចុងក្រោយ គឺសុខ សុវណ្ណ អ្នកប្រដាល់ក្លិបកងពលធំអន្តរាគមន៍លេខ២ ជាអ្នកទទួលបានពាននេះ ។
សុខ សុវណ្ណ ពេលប្រកួតលើកទី១ គេវាយឈ្នះថន វាសនា អ្នកប្រដាល់ក្លិបនាគរាជមានជ័យ ដោយពិន្ទុ ហើយមកដល់វគ្កផ្តាច់ព្រ័ត្រ គេបានវាយឈ្នះចាន់ វ៉ារិទ្ធ អ្នកប្រដាល់ក្លិបនិរោធមានជ័យ ដោយពិន្ទុ ។
គួរបញ្ជាក់ថា ចាន់ វ៉ារិទ្ធនេះ មុននឹងឡើងមកដល់វគ្គផ្តាច់ព្រ័ត្រនេះ គេបានវាយឈ្នះយ៉ុន ដារ័ត្ន អ្នកប្រដាល់ក្លិបតាឡីដំរីមានរិទ្ធ ដោយពិន្ទុ៕
Source: Kampuchea Thmey Daily
0 Comments