លោកនាយករដ្ឋមន្ត្រី Scott Morrison បាននិយាយនៅថ្ងៃសៅរ៍ថា ប្រទេសអូស្ត្រាលីមានបំណងហាមឃាត់សាលារៀនឯកជនឬសាលាសាសនាពីការបណ្តេញសិស្សដោយផ្អែកលើភេទរបស់ពួកគេ។
ការជជែកវែកញែកលើសិទ្ធិផ្ទាល់ខ្លួនកំពុងឡើងកម្តៅមុនការបោះឆ្នោតបំពេញបន្ថែមដ៏សំខាន់មួយសម្រាប់ក្រុមចម្រុះជាតិសេរីនិយមដែលកំពុងកាន់អំណាចរបស់លោក Morrison នៅក្នុងអាសនៈ Wentworth ក្រុងស៊ីដនីនៅថ្ងៃទី២០ខែតុលា។
លោក Morrison បាននិយាយនៅក្នុងសេចក្តីថ្លែងការណ៍មួយថា “ខ្ញុំនឹងចាត់វិធានការដើម្បីធានាថា ការធ្វើវិសោធនកម្មត្រូវបានណែនាំឲ្យបានឆាប់តាមដែលអាចធ្វើទៅបានដើម្បីបញ្ជាក់ឲ្យច្បាស់ថា គ្មានសិស្សណាម្នាក់ដែលរៀនសាលាក្រៅរដ្ឋគួរតែត្រូវបានបណ្តេញចេញដោយសារភេទរបស់ពួកគេទេ”។
សេចក្តីថ្លែងការណ៍មួយនេះដែលជំរុញឲ្យសភាធ្វើការដោះស្រាយបញ្ហានេះក្នុងរយៈពេល២សប្តាហ៍ក្រោយបានកើតឡើងបន្ទាប់ពីមានសំណើសុំការគាំទ្រពីសំណាក់គណបក្សប្រឆាំងធំបំផុតគឺគណបក្សពលកម្មដើម្បីឲ្យលុបចោលការលើកលែងផ្នែកច្បាប់ដែលអនុញ្ញាតឲ្យសាលារៀនសាសនាមានការរើសអើង។
លោកអាចារ្យ Mark Coleridge ដែលជាប្រធានសន្និសីទគណៈសង្ឃកាតូលិកអូស្ត្រាលីនៅសប្ដាហ៍នេះបានអំពាវនាវឲ្យមានសមភាពក្នុងការងារនិងការចុះឈ្មោះចូលរៀន។
សភាអូស្ត្រាលីបានបោះឆ្នោតអនុម័តច្បាប់អាពាហ៍ពិពាហ៍ភេទដូចគ្នានៅខែធ្នូបន្ទាប់ពីការស្ទង់មតិប្រៃសណីយ៍នៅទូទាំងប្រទេសបានគាំទ្រដល់សហជីពនេះ។
លោក Morrison បានថ្លែងថា រដ្ឋាភិបាលកំពុងធ្វើការតាមរយៈការឆ្លើយតបរបស់ខ្លួនទៅនឹងអនុសាសន៍របស់ក្រុមពិនិត្យមើលដើម្បីពិនិត្យថាតើការផ្លាស់ប្តូរច្បាប់បានរាំងខ្ទប់សេរីភាពខាងសាសនាដែរឬក៏អត់។ ទោះបីជាយ៉ាងណាក៏ដោយ អនុសាសន៍នេះមិនត្រូវបានបង្ហាញជាសាធារណៈទេ៕ REUTERS
Source: Kampuchea Thmey Daily
0 Comments