ភ្នំពេញ ៖ ក្រសួងអប់រំ យុវជន និងកីឡា បានធ្វើការប្រកាសជ្រើសរើសបេក្ខភាពចូលរួមប្រកួតប្រជែងដណ្ដើមពានរង្វាន់អាស៊ាន (ASEAN Prize)ដើម្បីចូលរួមក្នុងការកសាងសហគមន៍អាស៊ាន។
បើតាមក្រសួងអប់រំយុវជននិងកីឡាបានបញ្ជាក់ថា ការប្រកាសជ្រើសរើសបេក្ខភាពចូលរួមប្រកួតប្រជែងដណ្ដើមពានរង្វាន់អាស៊ាននេះ ធ្វើឡើងតាមគំនិតផ្ដួចផ្ដើមរបស់ប្រទេសសិង្ហបុរីក្នុងនាមជាប្រធានអាស៊ាន ដែលបានស្នើឲ្យប្រទេសសមាជិកអាស៊ាននីមួយៗ ជ្រើសរើសបេក្ខភាព (បេក្ខជន/បេក្ខនារី ឬស្ថាប័ន) ដែលមានស្នាដៃឆ្នើម និងលេចធ្លោជាងគេ ក្នុងកិច្ចខិតខំប្រឹងប្រែងចូលរួមក្នុងការកសាងសហគមន៍អាស៊ាន។
សម្រាប់លក្ខខណ្ឌ បេក្ខជនចូលរួមត្រូវជាប្រជាពលរដ្ឋក្នុងប្រទេសអាស៊ាន ឬជាស្ថាប័ននៅក្នុងប្រទេសជាសមាជិកអាស៊ានណាមួយ។ បេក្ខភាពត្រូវបង្ហាញពីស្នាដៃនានា ដែលសម្រេចបានកាលពីចន្លោះខែមេសា ឆ្នាំ២០១៧ និងខែមីនា ឆ្នាំ២០១៨ ដែលអាចផ្ទៀងផ្ទាត់បានថាពិត ឬមិនពិត ទាក់ទិនក្នុងការលើកម្ពស់កិច្ចសហប្រតិបត្តិការរវាងប្រទេសអាស៊ាន។
ចំពោះការប្រកួត បេក្ខភាពត្រូវសរសេរទម្រង់បែបបទបរិយាយពីស្នាដៃរបស់ខ្លួន ទៅឲ្យគណៈកម្មាធិការវិនិច្ឆ័យ ដើម្បីសម្រេចថា តើស្នាដៃមួយណាល្អជាងគេ ហើយកម្មវិធីប្រកាស និងប្រគល់ពានរង្វាន់គ្រោងធ្វើឡើងអាចនៅក្នុងកិច្ចប្រជុំមេដឹកនាំអាស៊ានលើកទី៣៣ នៅសិង្ហបុរី នាខែវិច្ឆិកា ឆ្នាំ២០១៨ ឬក្នុងកិច្ចប្រជុំថ្នាក់រដ្ឋមន្ត្រី។
នៅពេលដណ្ដើមបានជ័យលាភី បេក្ខជននឹងទទួលបានរង្វាន់លុយ ២០,០០០ដុល្លារ ហើយម្ចាស់ជ័យលាភីអាចនឹងត្រូវអញ្ជើញឲ្យចូលរួមក្នុងព្រឹត្តិការណ៍អាស៊ានមួយចំនួនហើយបេក្ខភាពក៏គួរតែចែករំលែកពីផែនការនាពេលអនាគតរបស់ខ្លួន ក្នុងការបន្តកិច្ចប្រឹងប្រែងនេះទៅមុខទៀត ក្រោយពីទទួលពានរង្វាន់ផងដែរ។
កម្មវិធីនេះជាកម្មវិធីប្រកួតប្រជែងលើកដំបូង មិនធ្លាប់ធ្វើពីមុនមកឡើយ ហើយនឹងប្រព្រឹត្តទៅជារៀងរាល់ឆ្នាំតទៅមុខ។
បើតាមវេបសាយ ASEAN បេក្ខជនត្រូវផ្ញើពាក្យចូលរួមប្រកួតប្រជែងទៅកាន់អ៊ីម៉ែលរបស់ក្រសួងការបរទេស និងសហប្រតិបត្តិការអន្តរជាតិកម្ពុជា mfaic.asean@mfaic.gov.kh។
បេក្ខជនដែលមានបំណងចូលរួមប្រកួតប្រជែងនៅក្នុងកម្មវិធីនេះអាចមកដាក់និងទទួលពាក្យចូលរួមប្រកួតនេះចាប់ពីថ្ងៃនេះរហូតដល់ថ្ងៃទី០៥ ខែតុលា ឆ្នាំ២០១៨ខាងមុខនេះ៕
Source: Kampuchea Thmey Daily
0 Comments