អ្នកប្រដាល់ជើងខ្លាំងកម្ពុជា២រូប គឺឡៅ ចន្ទ្រា ក្លិបកងពលតូចទ័ពឆ័ត្រយោង៩១១ និង យុគ យក្សផ្លែ អ្នកប្រដាល់ក្លិបបូរីរាជសីហ៍មានរិទ្ធ នឹងត្រូវជួបប្រកួតជាមួយអ្នកប្រដាល់ថៃលើសង្វៀនSEATV នារសៀលថ្ងៃសៅរិ៍ទី០៦ ខែតុលា ឆ្នាំ២០១៨នេះ។
ឡៅ ចន្ទ្រា គេបានស្វាគមន៍Kamlaypit អ្នកប្រដាល់ជើងខ្លាំងថៃ ដែលបានសុំមកសងសឹកវិញ ។ពួកគេទាំងពីរ ជួបប្រកួតគ្នាក្នុងប្រភេទទម្ងន់៦៧គីឡូក្រាម ។
Khamlaypit អ្នកប្រដាល់ថៃរូបនេះ ធ្លាប់មកវាយនៅស្រុកខ្មែរច្រើនលើកហើយកន្លងមក ។ យ៉ាងណា Khamlaipetchជាជើងខ្លាំងមួយរូបនៅស្រុកថៃ ហើយមកវ៉ៃនៅស្រុកខ្មែរ ក៏ កម្រមានអ្នកយកឈ្នះបានដែរ តែចុងក្រោយនេះ គេវាយចាញ់ឡៅ ចន្ទ្រា ដោយពិន្ទុទាំង មិនអស់ចិត្ត ទើបបានសុំឡើងមកសងសឹកចន្ទ្រាវិញនេះ ។
អ្នកប្រដាល់ថៃជើងខ្លាំងរូបនេះ គេធ្លាប់វាយឈ្នះរឿង សោភ័ណ្ឌពីរលើក ឈ្នះឡុង សុភីមួយលើក ឈ្នះឡុង សុវណ្ណឌឿនមួយលើក និងឈ្នះផុន ផាន់ណាមួយលើក ហើយក៏ធ្លាប់ចាញ់មឿន សុខហ៊ុចមួយលើក ចាញ់ព្រំ សំណាង ពីរលើក ។ជាមួយនេះ Khamlaypit ធ្លាប់ជួបវង្ស ណយ ២លើក ដោយវាយឈ្នះវង្សណយទាំងពីរលើក ដែលជួបលើកទី១ គេបានផ្តួលយកឈ្នះវង្ស ណយ ក្នុងទឹកទី២ កាលពីថ្ងៃទី២៩កញ្ញា២០១៧ និងលើកទី២ ថ្ងៃទី១៨ឧសភា២០១៨ គេឈ្នះវង្ស ណយ ដោយពិន្ទុ ហើយមកលើកចុងក្រោយនេះ Khamlaypit បានផ្តួល ឯម ឡេងលី ជើងខ្លាំងស្រករក្រោយក្លិបថ្មគោលពោធិសែនជ័យ អោយសន្លប់មុនទឹក៥ទៀតផង ។ នេះបើតាមប្រវត្តិរបស់ Khamlaypit ។
ទោះជាយ៉ាងណា ការប្រកួតលើកនេះ ឡៅ ចន្ទ្រា មិនអាចធ្វេសប្រហែសនឹង Khamlaypit បានឡើយ ព្រោះអ្នកប្រដាល់ថៃរូបនេះ មិនសាមញ្ញនោះទេ ព្រោះគេធ្លាប់ឈ្នះជើងខ្លាំងរបស់កម្ពុជាច្រើនរូបហើយ គឺបញ្ជាក់ថា គេមិនអន់នោះទេ ។
Khamlaypit មានប្រវត្តិកួតចំនួន១១៩លើក ឈ្នះ៩៧លើក ចាញ់២០លើក និង ស្មើ០២លើក ខណះដែលឡៅ ចន្ទ្រា មានកំនត់ត្រាប្រកួតចំនួន១១០លើក ឈ្នះ១០០លើក ចាញ់១០លើក មិនដែលស្មើ ។ ចាំមើល Khamlaypit អាចយកឈ្នះឡៅ ចន្ទ្រាបានឬអត់?សម្រាប់ជំនួបលើកទី២នេះ ? ។
ចំពោះយុគ យក្សផ្លែ អ្នកប្រដាល់ក្លិបបូរីរាជសីហ៍មានរិទ្ធ នឹងត្រូវជួបជាមួយអ្នកប្រដាល់ថៃចំណូលថ្មីឈ្មោះOup Sai ដោយប្រកួតក្នុងប្រភេទទម្ងន់៥៧គ.ក្រ ។
អ្នកប្រដាល់ថៃ ដែលយុគ យក្សផ្លែ ត្រូវតស៊ូជាមួយនោះ ជាជើងខ្លាំងស្រករក្រោយមួយរូបនៅស្រុកថៃ ។ Oup Sai គេមានជំនាញប៉ិនប្រសប់ក្នុងការប្រកណ្តាប់ដៃ ។ គេមានប្រវត្តិប្រកួត៥៤លើក ដោយវាយឈ្នះ៥០លើក ចាញ់០៨លើក មិនដែលស្មើ ខណះដែលយុគ យក្សផ្លែ គេមានប្រវត្តិប្រកួតចំនួន១៦១លើក ឈ្នះ១៣២លើក ចាញ់២៥លើក និងស្មើ០៤លើក ។
Oup Sai មិនធ្លាប់ជួបយុគ យក្សផ្លែទេពីមុនមក ។ សម្រាប់ការជួបយុគ យក្សផ្លែនេះ មិនដឹងថា Oup Sai អាចយកឈ្នះយុគ យក្សផ្លែ បានឬក៏អត់នោះទេ? ព្រោះយក្សផ្លែ ការប្រកួតចុងក្រោយនៅក្នុងស្រុក គេវាយឈ្នះអ្នកប្រដាល់ថៃKamlayphit ដោយពិន្ទុ កាលពីថ្ងៃទី០៩កញ្ញាកន្លងមកនេះ ។
ទោះជាយ៉ាងណា ការឈ្នះចាញ់រវាងយុគ យក្សផ្លែ និង Oup Sai នេះ ពុំមាននរណាហ៊ានទាយមុនថាអ្នកណាឈ្នះនោះទេ ។
ដោយឡែក ការប្រកួតរវាងអ្នកប្រដាល់រួមជាតិវិញ យ៉ាម ខេមរា អ្នកប្រដាល់ក្លិបរស្មីកុមារកំព្រា ត្រូវគេផ្គូអោយជួបប្រកួតជាមួយជើងចាស់ លួន សុខខេង អ្នកប្រដាល់ក្លិបពុទ្ធសេរីវង្សកីឡា ។ពីរនាក់នេះ ជួបគ្នាក្នុងប្រភេទទម្ងន់៦៩គីឡូក្រាម ។
រីឯ សរ សូ អ្នកប្រដាល់ជើងថ្មី នៃក្លិបឃ្លាំងមឿងកីឡា នឹងជួបប្រកួតជាមួយលីតឿន អ្នកប្រដាល់ក្លិបមកុដរាជសីហ៍ ដោយប្រកួតគ្នាក្នុងប្រភេទទម្ងន់៦០គីឡូក្រាម៕
Source: Kampuchea Thmey Daily
0 Comments