អ្នកប្រដាល់ឡៅ ចិត្រា ក្លិបកងពលតូចទ័ពឆ័ត្រយោង៩១១ បានវាយឈ្នះអ្នកប្រដាល់ថៃNuth Kor.Kesanon ក្នុងទឹកទី២ ហើយរិទ្ធ ភូលូ អ្នកប្រដាល់ក្លិបអាណាចក្រគុនខ្មែរ បានវាយចាញ់អ្នកប្រដាល់ឡាវNampetch Chhor.Champions ដោយពិន្ទុ ក្នុងការជួបប្រកួតជម្រុះជុំទី២ ដណ្តើមខ្សែក្រវាត់ខារ៉ាបាវរដូវកាលថ្មីទម្ងន់៦០គីឡូក្រាម នៅសង្វៀនបាយ័នស្ទឹងមានជ័យ កាលពីយប់ថ្ងៃអាទិត្យទី៣០កញ្ញា២០១៨ ។
ឡៅ ចិត្រា បានធ្វើអោយ Nuth Kor.សន្លប់ក្រោកលែងរួចបន្ទាប់ពីអាជ្ញាកណ្តាលរាប់ដល់ដប់ក្នុងទឹកទី២នោះ ដោយសារជង្គង់របស់គេអុកចំចុងដង្ហើម ។ Nuth Kor.មិនទាន់ទាំងបានវាយតតាំងជាមួយចិត្រានិងវាយត្រូវចិត្រាមួយដៃផង ក៏ត្រូវឡៅ ចិត្រាបោះជង្គង់បត់ខ្លីចូលចំចុងដង្ហើម មួយជង្គង់ពេញ ធ្វើអោយ Nuth Kor.សន្លប់ឈឹងតែម្តង។
ជាមួយលទ្ធផលនេះ នាំអោយ Nuth Kor. Kesanon បាន២ពិន្ទុសម្រាប់ការប្រកួតជម្រុះពីរលើកនោះ ហើយឡៅ ចិត្រា គេបាន៦ពិន្ទុ សម្រាប់ការ២ជុំនេះ ។
ចំណែក អ្នកប្រដាល់រិទ្ធ ភូលូ វិញ គេបានវាយចាញ់អ្នកប្រដាល់ឡាវ Nampetch Chhor.Champions ដោយពិន្ទុ ក្នុងការប្រកួតប្រាំទឹកនេះ ។នៅក្នុងការប្រកួត៥ទឹក បានធ្វើអោយ Nampetch ឈឺសាច់មិនតិចដែរទេ តែដោយសារខ្លួនវាយចេញនិងចំគោលដៅល្អបានតិចជាង Nampetch នោះ បានធ្វើអោយចាញ់ពិន្ទុ Nampetch ។ រិទ្ធ ភូលូ ចាញ់ហើយ ថែមទាំងបាក់ឆ្អឹងប្រអប់ដៃឆ្វេងថែមទៀត។
ដូច្នេះសម្រាប់ការប្រកួតជម្រុះ២ជុំ ខ្សែក្រវាត់ខារ៉ាបាវរដូវកាលថ្មីទម្ងន់៦០គីឡូក្រាមនេះ រិទ្ធ ភូលូ គេបាន៤ពិន្ទុដោយឈ្នះ១ ចាញ់១ប្រកួត ឯ Nampetch Chhor.Champions គេបាន៤ពិន្ទុដែរ ក្នុងពីរប្រកួតដូចគ្នា គឺឈ្នះ១ចាញ់១ប្រកួត ។
ចំពោះការប្រកួតលក្ខណៈមិត្តភាពអន្តរជាតិ កាលពីល្ងាចថ្ងៃទី២៩កញ្ញានៅសង្វៀនស្ទឹងមានជ័យនេះដែរ អ៊ូច ធារិទ្ធអ្នកប្រដាល់ក្លិបអាណាចក្រគុនខ្មែរ បានផ្តួលយកឈ្នះកំពែង ខ្មៅ សមាគមកីឡាក្រសួងកសិកម្ម ក្នុងទឹកទី៤ ។
ក្នុងនោះ ឡៅ ចន្ទ្រា អ្នកប្រដាល់ក្លិបកងពលតូចទ័ពឆ័ត្រយោង៩១១ បានផ្តួលORONO នៅក្នុងទឹកទី៣ ។ អ្នកប្រដាល់ថៃORONO ត្រូវអាជ្ញាកណ្តាលបញ្ឈប់លែងអោយប្រកួត ដោយសារតែគេអសមត្ថភាពក្នុងការតតាំងជាមួយឡៅ ចន្ទ្រានោះ។
ចៅ ផលឌឿ អ្នកប្រដាល់ក្លិបសំរោងកោងខេត្តបាត់ដំបង បានផ្តួលយកឈ្នះអូន ចាន់ឡឹង អ្នកប្រដាល់ក្លិបកុសលកីឡា ក្នុងទឹកទី២ ក្នុងការជួបប្រកួតគ្នាទម្ងន់៦៧គីឡូក្រាម ។
ដោយឡែក សឿន ឆ្នើម អ្នកប្រដាល់ក្លិបកងពលតូចទ័ពឆ័ត្រយោង៩១១ បានវាយឈ្នះឡេង ម៉ៅ អ្នកប្រដាល់ក្លិបម៉ៃទីក្រាំងយ៉ូវ ក្នុងទឹកទី៤ ។
ចាន់ គឹមលន់ អ្នកប្រដាល់ក្លិបនិរោធមានជ័យ បានប្រកួតឈ្នះសំណាង ចាន់នឿន អ្នកប្រដាល់ក្លិបកងចក្ររាជសីហ៍មានរិទ្ធ ក្នុងទឹកទី២ ដោយផ្តួលអោយសន្លប់តែម្តង៕
Source: Kampuchea Thmey Daily
0 Comments