លោកគ្រូបង្វឹកជនជាតិជប៉ុន Yuki Matsuda របស់ក្លិបសូលទីឡូអង្គរ (Soltilo Angkor FC) សមាជិកក្នុងពានរង្វាន់លីគកំពូលកម្ពុជា (Metfone Cambodian League 2018) បានផុតកិច្ចសន្យាជាមួយក្លិបកាលពីពេលថ្មីៗ ក្រោយចប់រដូវកាលឆ្នាំ២០១៨នេះ ខណៈលោកកំពុងរង់ចាំការចរចាកិច្ចសន្យាថ្មីជាមួយក្លិប។
គ្រូបង្វឹកដែលកំពុងកាន់អាជ្ញាប័ណ្ណ AFC A License រូបនេះបានប្រាប់ CNCC ថ្មីៗថា «ជាការពិត ខ្ញុំស្រលាញ់ក្លឹបមួយនេះ ពេញចិត្តអ្នកគាំទ្រ ពិសេសស្រលាញ់ស្ថានភាពរស់នៅក្នុងប្រទេសកម្ពុជា។ ពួកយើងបានអភិវឌ្ឍខ្លួនជាមួយគ្នាយ៉ាងច្រើន សម្រាប់រដូវកាលដំបូងក្នុងលីគកំពូលកម្ពុជា ហើយខ្ញុំរំពឹងថា នឹងបានចូលរួមជាមួយកីឡាករទាំងអស់ទៀត នៅឆ្នាំក្រោយ។ ប៉ុន្តែអ្វីៗស្ថិតក្នុងការចរចា ព្រោះកិច្ចសន្យាខ្ញុំជាមួយសូលទីឡូបញ្ចប់ត្រឹមរដូវកាលនេះហើយ។ ខ្ញុំនឹងពិភាក្សាជាមួយថ្នាក់ដឹកនាំពីអ្វីដែលខ្ញុំចង់បាន និង ស្ដាប់ពីការចង់បានរបស់ក្លឹប ហើយបើយើងអាចរកបានចំណុចរួមគ្នាមួយ ខ្ញុំនឹងបន្តនៅទីនេះទៀត»។ លោកបានដាក់សំណើមួយចំនួនទៅក្លឹប ពាក់ព័ន្ធការបន្ថែមបុគ្គលិក យុទ្ធសាស្ត្រដឹកនាំក្លឹប និង ប្រាក់បៀវត្សជាដើម។
លោក Yuki Matsuda ធ្លាប់មានបទពិសោធន៍ដឹកនាំក្លិបAlbirex Niigata Singapore នៅប្រទេសសឹង្ហបុរី ខណៈលោកក៏ធ្លាប់ដឹកនាំក្លិប Champasak United នៅលីគកំពូលក្នុងប្រទេសឡាវ កាលពីឆ្នាំ២០១៦ កន្លងទៅ មុនធ្វើដំណើរមកចាប់អាជីពជាគ្រូជំនួយក្នុងក្លិបព្រះខ័នរាជស្វាយរៀង មួយរយៈខ្លី។ ក្រោយមកលោកបានសម្រេចចូលរួមជាមួយក្រុមនៅខេត្តសៀមរាប មួយនេះដើម្បីប្រកួតក្នុងពានរង្វាន់លីគលំដាប់ទី២ នៅឆ្នាំ២០១៧ និងឡើងមកកាន់លីគកំពូលកម្ពុជា នៅឆ្នាំ២០១៨ តែម្តង។
សូមបញ្ជាក់ថា ក្រុមសូលទីឡូអង្គរ ក្រោមការដឹកនាំរបស់លោក Yuki Matsuda បានចំណាត់ថ្នាក់លេខ១០ ក្នុងចំណោមសមាជិកទាំង១២ក្នុងពានរង្វាន់លីគកំពូលកម្ពុជា រដូវកាលឆ្នាំ២០១៨នេះ ក្រោយរកបានជ័យជម្នះចំនួន៥ លើក ហើយធ្លាប់ស្មើ៥ លើកនិងចាញ់១២ លើកមាន២០ពិន្ទុ ដែលអាចបន្តក្នុងលីគកំពូលរដូវកាលបន្ទាប់ទៀត។ ចំណែកក្នុងពានរង្វាន់សម្តេចតេជោ ហ៊ុន សែន វិញក្រុមសូលទីឡូអង្គរ បានធ្លាក់ត្រឹមវគ្គ១៦ក្រុមចុងក្រោយ បន្ទាប់ពីចាញ់គូប្រជែងក្នុងខេត្តតែមួយគឺអង្គរថាយហ្គឺរ ដោយលទ្ធផលទាំង២ជើង ៣ទល់២៕
Source: Kampuchea Thmey Daily
0 Comments