កំពង់ស្ពឺ ៖ ការងារផ្គត់ផ្គង់តឹកស្អាត និងអនាម័យជនបទ រាជរដ្ឋាភិបាលបាន និងកំពុងសម្រួចទិសដៅរបស់ខ្លួន ដើម្បីឲ្យប្រជាជននៅជនបទទទួលបានសេវាផ្គត់ផ្គង់ទឹកស្អាត និងអនាម័យ ១០០% នៅឆ្នាំ២០២៥ ដូចមានចែងក្នុងទស្សនវិស័យនៃគោលនយោបាយ ដែលបានកំណត់ថា នៅឆ្នាំ ២០២៥ ប្រជាពលរដ្ឋនៅជនបទគ្រប់រូបត្រូវមានការផ្គត់ផ្គង់ទឹកស្អាត និងមានអនាម័យគ្រប់គ្រាន់ និងរស់នៅក្នុងបរិស្ថានដែលមានអនាម័យប្រកបដោយនិរន្ដរភាព។
នេះជាការលើកឡើងរបស់ លោកបណ្ឌិត អ៊ុក រ៉ាប៊ុន រដ្ឋមន្ដ្រីក្រសួងអភិវឌ្ឍន៍ជនបទ ក្នុងឱកាសដែល លោកអញ្ជើញជាអធិបតីប្រារព្ធទិវាជាតិលើកកម្ពស់អនាម័យជនបទលើកទី ៩ កាលព្រឹកថ្ងៃទី ១៣ ខែ វិច្ឆិកា ឆ្នាំ ២០១៨ នៅសាលាស្រុកបសេដ្ឋខេត្តកំពង់ស្ពឺ។
បន្ទាប់ពីចំណាប់អារម្មណ៍របស់លោកស្រី Natascha Paddison អនុប្រធានអង្គការ UNICEF ប្រចាំនៅកម្ពុជា និងលោក វ៉ី សំណាង អភិបាលនៃគណអភិបាលខេត្តកំពង់ស្ពឺ រួចមក លោក ទ្រី មេង រដ្ឋលេខាធិការ បានអាននូវសារលិខិតរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ក្នុងឱកាសអបអរសាទរវេទិកាជាតិលើកកម្ពស់អនាម័យជនបទលើកទី ៩ ឆ្នាំ២០០៨ ដែលបានផ្ដល់នូវអនុសាសន៍ទាំង ៥ ចំណុចសំខាន់ៗសំដៅឲ្យគ្រប់ភាគីពាក់ព័ន្ធទាំងអស់ជំរុញល្បឿននៃការអនុវត្តកម្មវិធីលើកកម្ពស់អនាម័យស្របតាមដែនសមត្ថកិច្ចរបស់ខ្លួន ដោយកៀរគរធនធាន និងធ្វើកិច្ចសហប្រតិបត្តិការជាមួយដៃគូអភិវឌ្ឍន៍ អង្គការមិនមែនរដ្ឋាភិបាល និងវិស័យឯកជន។
លោកបណ្ឌិត អ៊ុក រ៉ាប៊ុន ក៏បានរំលឹកអំពីវឌ្ឍនភាពវិស័យផ្គត់ផ្គង់ទឹកស្អាត និងអនាម័យជនបទនៃព្រះរាជាណាចក្រកម្ពុជា ដោយបញ្ជាក់ថា ក្នុងរយៈពេល ១០ ឆ្នាំ ចុងក្រោយនេះកម្ពុជាមានមោទនភាព ដែលអត្រារីកចម្រើនផ្នែកអនាម័យមានការកើនឡើង ពោលគឺពី ១៦% នៅឆ្នាំ២០០៧ ដល់ ៥៧,៤% នៅឆ្នាំ២០១៦ គឺលើសគោលដៅអភិវឌ្ឍន៍សហស្សវត្សរ៍កម្ពុជា ដែលបានកំណត់យកត្រឹមតែ ៣០% នៅឆ្នាំ២០១៥ និងលើសគោលដៅនៃផែនការយុទ្ធសាស្ដ្រអភិវឌ្ឍន៍ជាតិ ២០១៤-២០១៨ ដែលបានកំណត់យកត្រឹមតែ ៦០% នៅឆ្នាំ២០១៨ ។ លោករដ្ឋមន្ដ្រី បានវាយតម្លៃខ្ពស់ចំពោះក្រសួង ស្ថាប័ន អង្គការជាតិ អន្ដរជាតិ ដៃគូរអភិវឌ្ឍន៍ អាជ្ញាធរគ្រប់លំដាប់ថ្នាក់ និងវិស័យឯកជន ដែលបាននឹងកំពុងជួយគាំទ្រវិស័យផ្គត់ផ្គង់ទឹកស្អាត និងអនាម័យជនបទក្រោមកិច្ចសហប្រតិបត្តិការ និងសម្របសម្រួលជាមួយក្រសួងអភិវឌ្ឍន៍ជនបទ ក្នុងការជួយជំរុញប្រជាពលរដ្ឋឲ្យយល់ដឹងអំពីសារសំខាន់នៃការប្រតិបត្តិអនាម័យ ដូចជាការបន្ទោបង់ពាសវាលពាសកាលឲ្យមកប្រើប្រាស់បង្គន់អនាម័យវិញ។
លោករដ្ឋមន្ដ្រី បានបញ្ជាក់បន្ថែមថា ស្រុកបសេដ្ឋខេត្តកំពង់ស្ពឺ នឹងអាចក្លាយជាស្រុកបញ្ចប់ការបន្ទោបង់ពាសវាលពាសកាលនៅឆ្នាំ២០១៩ ហើយខេត្តគោលដៅនៃការបញ្ឈប់ការបន្ទោបង់ពាសវាលពាសកាលគឺមានខេត្តកំពង់ស្ពឺ ស្វាយរៀង និងខេត្តកែប។
ជាមួយនេះ លោកបានអំពាវនាវឲ្យរដ្ឋបាលថ្នាក់ក្រោមជាតិបន្តជំរុញស្ថានភាពអនាម័យនៅក្នុងមូលដ្ឋានរបស់ខ្លួនឲ្យកាន់តែល្អប្រសើរឡើង ដោយសហប្រតិបត្តិការជាមួយក្រសួងអភិវឌ្ឍន៍ជនបទ បន្តបេសកកម្មលើវិស័យផ្គត់ផ្គង់ទឹកស្អាត និងអនាម័យជនបទ ដើម្បីឈានទៅសម្រេចឲ្យបាននូវទស្សនវិស័យរបស់រាជរដ្ឋាភិបាលនៅឆ្នាំ ២០២៥ ប្រជាពលរដ្ឋនៅជនបទ ទទួលបានសេវាផ្គត់ផ្គង់ទឹកស្អាត និងអនាម័យ ១០០% និងរស់នៅក្នុងបរិស្ថានប្រកបដោយនិរន្ដរភាព៕
Source: Kampuchea Thmey Daily
0 Comments