តាកែវ ៖ ជនរងគ្រោះជាម្ចាស់ម៉ូតូបានស្លាប់នៅនឹងកន្លែងកើតហេតុ ខណៈបុកជាមួយនឹងរថយន្តមិនស្គាល់អត្តសញ្ញាណមួយគ្រឿងដែលបើកបរបញ្ច្រាសទិសគ្នា។
ករណីគ្រោះថ្នាក់ចរាចរណ៍រវាងរថយន្ត និងម៉ូតូនេះ បានកើតឡើងនៅថ្ងៃទី០៩ ខែវិច្ឆិកា ឆ្នាំ២០១៨វេលាម៉ោង០១និង០០នាទីរំលងអធ្រាត្រ ស្ថិតនៅលើផ្លូវជាតិលេខ០៣ ចន្លោះគីឡូម៉ែត្រលេខ៧៥-៧៦ ក្នុងភូមិព្រៃស្រោង ឃុំអង្គតាសោម ស្រុកត្រាំកក់ ខេត្តតាកែវ រវាងម៉ូតូ និងរថយន្ត ដែលបើកបរក្នុងទិសដៅបញ្ច្រាសទិសគ្នា។
ប៉ូលិសស្រុកត្រាំកក់បានប្រាប់ថា ម៉ូតូរងគ្រោះម៉ាកហុងដាឌ្រីមសេ125 ពណ៌ខ្មៅ ពាក់ស្លាកលេខភ្នំពេញ1CH.6803 ដែលបើកបរដោយ ឈ្មោះ អោម វិទស្សន៍ ភេទប្រុស អាយុ៣០ឆ្នាំ រស់នៅភូមិអូរស្ងើន ឃុំញ៉ែងញ៉ង ស្រុកត្រាំកក់ ខេត្តតាកែវ មុខរបរមន្ត្រីឥន្ទទានស្លាប់នៅកន្លែងកើតហេតុ។
ប៉ូលិសបន្តថា ជនរងគ្រោះបើកបរម៉ូតូមកពីទិសខាងជើងទៅត្បូង លុះមកដល់ចំណុចខាងលើបានបុកគ្នាជាមួយរថយន្តមួយគ្រឿងមិនស្គាល់ម៉ាក ដែលបើកបរមកពីទិសខាងត្បូង។
ក្រោយកើតហេតុ ប៉ូលិសបានចុះវាស់វែងធ្វើកំណត់ហេតុ និងបានប្រគល់សពជូនសាច់ញាតិយកទៅធ្វើបុណ្យតាមប្រពៃណី រីឯវត្ថុតាងម៉ូតូត្រូវបានយកមករក្សាទុកនៅអធិការដ្ឋាននគរបាលស្រុកត្រាំកក់ ដោយឡែករថយន្តដែលបើករត់គេចនោះ សមត្ថកិច្ចនឹងបន្តស្រាវជ្រាវដើម្បីយកមកកសាងសំណុំរឿងតាមនីតិវិធី៕
Source: Kampuchea Thmey Daily
0 Comments