ក្នុងពេលបើកបរ ត្រូវពាក់មួកសុវត្ថិភាពជានិច្ចដើម្បីការពារជីវិតអ្នក

ព្រះសីហនុ ៖ គណៈកម្មាធិការជាតិសុវត្ថិភាពចរាចរណ៍ផ្លូវគោក ក្រោមកិច្ចសហការរៀបចំ និងគាំទ្រដោយអង្គការមូលនិធិបង្ការរបួសអាស៊ី (AIP) ដឹកនាំដោយ ជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន នាព្រឹក ថ្ងៃទី១២ ខែវិច្ឆិកា ឆ្នាំ២០១៨នេះ បានចុះធ្វើការផ្សព្វផ្សាយ ច្បាប់ចរាចរណ៍ ផ្លូវគោក តាមបណ្ដោយផ្លូវជាតិលេខ០៤ និងចែកមួកសុវត្ថិភាពដោយឥតគិតថ្លៃ។

លោក ជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន ក្នុងឧកាសចុះអប់រំដល់បងប្អូនប្រជាពលរដ្ឋមហាជនទូទៅអោយគោរពច្បាប់ចរាចរណ៍តាមផ្លូវសាធារណៈ និងចែកមួកសុវត្ថិភាពដល់អ្នកធ្វើដំណើប្រើប្រាស់ម៉ូតូនៅតាមបណ្តោយផ្លូវជាតិលេខ៤តំបន់ឃ្លាំងលើក្នុងសង្កាត់លេខ១ក្រុងព្រះសីហនុ បានមានប្រសាសន៍ថា នៅពេល ធ្វើដំណើរនៅលើដងផ្លូវត្រូវតែពាក់មួកសុវត្ថិភាពជាប្រចាំ ឲ្យបានគ្រប់ៗគ្នា មិនថា អ្នកបើកបរ ឬអ្នករួមដំណើរនោះឡើយ ពីព្រោះមួកសុវត្ថិភាពមួយជួយជីវិតបានម្នាក់ប៉ុណ្ណោះ និង ជួយការពារសុវត្ថិភាព អាយុជីវិតរបស់អ្នកនៅពេលធ្វើដំណើរតាមដងផ្លូវ ហើយសម្រាប់ អ្នករួមដំណើរ ក៏ត្រូវពាក់មួក ផងដែរ ដើម្បីការពារ អាយុជីវិត របស់ខ្លួន និងរួមគ្នាគោរពច្បាប់ចរាចរណ៍ ឲ្យបានជាប់ជួន រួមចំណែកកាត់បន្ថយករណីគ្រោះថ្នាក់ ចរាចរណ៍ ដែលតែងតែកើតឡើង ជារៀងរាល់ថ្ងៃនៅលើដងផ្លូវ។

នៅក្នុងរសៀល ថ្ងៃដដែលនោះដែរ លោកជំទាវ មឹន មាណវី រដ្ឋលេខាធិការ ក្រសួង សាធារណការនិងដឹកជញ្ជូនក៏បានអញ្ជើញជួបសំណេះសំណាលជាមួយលោកគ្រូ អ្នកគ្រូ មាតាបិតាអាណាព្យាបាលសិស្សនិងសិស្សានុសិស្សសាលាបឋមសិក្សាហ៊ុន សែនក្រុង ព្រះសីហនុ ព្រមទាំងផ្តល់ជូនមួកសុវត្ថិភាពចំនួន១០៥៥មួក ដល់សិស្សានុសិស្សផងដែរ ដោយ ក្នុងឧកាសនោះ លោក ជំទាវ បានពន្យល់ណែនាំ ដល់សិស្សានុសិស្សថា ត្រូវរួមគ្នា គោរពច្បាប់ចរាចរណ៍ក្នុងពេលបើកបរ លើដងផ្លូវ និងពាក់មួកសុវត្ថិភាព ជានិច្ចទាំងអ្នកបើកម៉ូតូ ទាំងអ្នក ជិះពីក្រោយ ដាច់ខាតត្រូវតែពាក់មួកសុវត្ថិភាព ដើម្បីជួយការពារសុវត្ថិភាព អាយុជីវិតខ្លួនឯង និងអ្នកធ្វើដំណើរតាមដងផ្លូវ៕