ភ្នំពេញ ៖ គណៈកម្មាធិការអចិន្ត្រៃយ៍រដ្ឋសភា បានបើកកិច្ចប្រពិភាក្សាលើរបៀបវារៈសំខាន់ៗមួយចំនួន មុននឹងដាក់បញ្ចូលក្នុងសម័យប្រជុំពេញអង្គរដ្ឋ សភានៅពេលខាងមុខនេះ។
កិច្ចប្រជុំ បានធ្វើឡើងនាព្រឹកថ្ងៃទី១៣ ខែវិច្ឆិកា នៅវិមានរដ្ឋសភា ដឹកនាំដោយសម្តេច ហេង សំរិន ប្រធានរដ្ឋសភា និងដោយ មានការចូលរួមពីសមាជិកគណៈកម្មាធិការអចិន្ត្រៃយ៍រដ្ឋសភាទាំងអស់។
យោងតាមរបៀបវារៈនៃកិច្ចប្រជុំ មានដូចជា៖ទី ១- សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០១៩។ ទី២- សេចក្តីព្រាងច្បាប់ស្តីពីការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ២០១៧។ សេចក្តីព្រាងច្បាប់ស្តីពីការអនុម័តយល់ព្រម ៖- កិច្ចព្រមព្រៀងរវាងរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋសង្គមនិយមវៀតណាម ស្តីពីការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ ចំណូល។ - កិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋឥណ្ឌូនេស៊ី ស្តីពីការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល។ ទី៣-សេចក្តីព្រាងច្បាប់ស្តីពីការអនុម័តយល់ព្រមលើសន្ធិសញ្ញាស្តីពីបត្យាប័ន រវាងព្រះរាជាណាចក្រកម្ពុជា និងសហព័ន្ធរុស្ស៊ី៕
Source: Kampuchea Thmey Daily
0 Comments