ភ្នំពេញ ៖ ក្នុងកិច្ចប្រជុំប្រចាំត្រីមាសទី៣ឆ្នាំ២០១៨របស់គណៈកម្មការត្រួតពិនិត្យលុបបំបាត់ឱសថក្លែងក្លាយ និងសេវាសុខាភិបាលខុសច្បាប់ដើម្បីកាត់បន្ថយភាពក្រីក្រក្នុងរាជធានីភ្នំពេញនារសៀលថ្ងៃទី២៧វិច្ឆិកា លោកបណ្ឌិតឱសថការី ហេង ប៊ុនគៀត ប្រធាននាយកដ្ឋានគ្រប់គ្រងឱសថ ចំណីអាហារនិងគ្រឿងសំអាងរបស់ក្រសួងសុខាភិបាលបានថ្លែងថា កម្ពុជាពុំមានឱសថក្លែងក្លាយទេ តែកម្ពុជា មានឱសថខុសច្បាប់ដែលត្រូវបានគេនាំចូល និងផ្តល់សេវាសុខាភិបាលពុំមានច្បាប់អនុញ្ញាត។ ចំណុចខ្លះពុំទាន់មានច្បាប់អនុញ្ញាតផងក្រុមហ៊ុនខ្លះធ្វើសកម្មភាពមុនទៅហើយ។
ការជួបជុំគ្នានៅពេលនេះ សំដៅពង្រឹងការអនុវត្តច្បាប់ លុបបំបាត់ឱសថ ក្លែងក្លាយនិងសេវាសុខាភិបាលខុសច្បាប់ដែលកើតមានឡើងនៅរាជធានីភ្នំពេញ។
លោកស្រីកែវ សុខពិសី អភិបាលរងរាជធានីភ្នំពេញបានអំពាវនាវដល់អ្នកលក់ឱសថ,ម្ចាស់ឱសថដ្ឋានដែលមានការពាក់ព័ន្ធ នឹងវិស័យសុខាភិបាលផ្នែកឯកជន ត្រូវយកចិត្តទុកដាក់ឲ្យបានខ្ពស់បំផុតទៅលើការផ្តល់សេវាសុខាភិបាល ការប្រើប្រាស់ឲ្យបានត្រឹមត្រូវ ព្រោះឱសថជាអាវុធមុខ២ បើយើងប្រើត្រូវ យើងជាសះ ស្បើយពីជំងឺ។ តែបើយើងប្រើខុស វានឹងមានអន្តរាយដល់អ្នកប្រើរហូតដល់អាយុ ជីវិតថែមទៀតផង។
ក្នុងរយៈពេល៣ខែកន្លងទៅ គណៈកម្មការត្រួតពិនិត្យ លុបបំបាត់ឱសថក្លែងក្លាយ និងសេវាសុខាភិបាលខុសច្បាប់រាជធានីភ្នំពេញ បានត្រួតពិនិត្យ ក៏ដូចពង្រឹងឱសថស្ថាន.ឱសថស្ថានរងមានច្បាប់ចំនួន៩៨៤កន្លែង។
ណែនាំកន្លែងលក់ឱសថអត់ច្បាប់កើតថ្មីចំនួន១១កន្លែងឲ្យទៅសុំច្បាប់ និងគ្រប់គ្រងឱសថបុរាណមានច្បាប់បានចំនួន៩៦កន្លែង។ ក្រុមការងារបានចុះអប់រំ ណែនាំដល់ម្ចាស់សេវាឲ្យប្តូរស្លាកសញ្ញាពីពេទ្យធ្មេញមកជាបន្ទប់ពិគ្រោះព្យាបាលជំងឺមាត់ធ្មេញវិញបានចំនួន១៥កន្លែង,ចុះពិនិត្យបន្ទប់ពិគ្រោះព្យាបាលជំងឺ,ពិគ្រោះផ្ទៃពោះជាដើមបានជាច្រើនកន្លែង។
គួរបញ្ជាក់ថា ស្ថិតិសេវាសុខាភិបាលឯកជនមាននៅក្នុងរាជធានីភ្នំពេញបច្ចុប្បន្នចំនួន៣៥៣៥កន្លែងសុទ្ធតែមានច្បាប់អនុញ្ញាត៕
Source: Kampuchea Thmey Daily
0 Comments