ភ្នំពេញ ៖ ក្រសួងមហាផ្ទៃបានជំរុញឲ្យពលរដ្ឋដែលកាន់អត្តសញ្ញាណប័ណ្ណខ្មែរគំរូចាស់ និងពលរដ្ឋដែលត្រូវធ្វើអត្តសញ្ញាណប័ណ្ណថ្មីត្រូវប្រញាប់ទៅធ្វើអត្តសញ្ញាណប័ណ្ណគំរូថ្មី ដោយសារតែអត្តសញ្ញាណប័ណ្ណសញ្ជាតិខ្មែរគំរូចាស់ទាំងអស់ នឹងត្រូវអស់សុពលភាពប្រើប្រាស់នៅត្រឹមថ្ងៃចន្ទ ទី៣១ ខែធ្នូ ឆ្នាំ២០១៨ខាងមុខនេះហើយ។
យោងតាមសេចក្ដីជូនដំណឹងរបស់អគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃដែលបានចេញផ្សាយកាលពីដើមខែវិច្ឆិកាកន្លងទៅនេះបានឲ្យដឹងថា «ដើម្បីធានាបាននូវសិទ្ធិសេរីភាព និងផលប្រយោជន៍ស្របច្បាប់ផ្ទាល់ខ្លួន អគ្គនាយកដ្ឋានអត្តសញ្ញាណកម្ម សូមអំពាវនាវដល់ប្រជាពលរដ្ឋខ្មែរទាំងពីរភេទ ដែលកំពុងប្រើប្រាស់អត្តសញ្ញាណប័ណ្ណសញ្ជាតិខ្មែរគំរូចាស់ទាំងអស់ និងប្រជាពលរដ្ឋដែលគ្រប់អាយុ១៥ឆ្នាំឡើង ដែលពុំទាន់មានអត្តសញ្ញាណប័ណ្ណសញ្ជាតិខ្មែរគំរូថ្មី សូមមេត្តា រួសរាន់ទៅបំពេញបែបបទស្នើសុំផ្ដល់អត្តសញ្ញាណសញ្ជាតិប័ណ្ណខ្មែរ គំរូថ្មីនៅបណ្ដា ប៉ុស្តិ៍នគរបាលរដ្ឋបាលឃុំ សង្កាត់ ឬអធិការដ្ឋាននគរបាលរាជធានី ខេត្ត ដែលខ្លួនរស់នៅ ឬស្នាក់ការផ្តល់អត្តសញ្ញាណប័ណ្ណសញ្ជាតិខ្មែរនៅផ្សារទំនើបអ៊ីអនម៉ល ២ សែនសុខ»។
អគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃ ក៏បានណែនាំដល់ពលរដ្ឋត្រូវភ្ជាប់ទៅជាមួយនូវឯកសារដូចជា សំបុត្រកំណើត ឬសំបុត្របញ្ជាក់កំណើត និងសៀវភៅគ្រួសារ ឬសៀវភៅស្នាក់នៅ ឬលិខិតបញ្ជាក់ទីលំនៅ និងអត្តសញ្ញាណប័ណ្ណសញ្ជាតិខ្មែរគំរូចាស់។
ពាក់ព័ន្ធទៅនឹងការធ្វើអត្តសញ្ញាណប័ណ្ណគំរូថ្មីនេះដែរ នាយឧត្ដមសេនីយ៍ កង សុខន អគ្គនាយក នៃអគ្គនាយកដ្ឋានអត្តសញ្ញាណកម្មរបស់ក្រសួងមហាផ្ទៃបានថ្លែងប្រាប់វិទ្យុអន្តរជាតិមួយថា ពលរដ្ឋដែលត្រូវធ្វើអត្តសញ្ញាណប័ណ្ណសញ្ជាតិខ្មែរគំរូថ្មី មានពេលតែ៣០ថ្ងៃតែប៉ុណ្ណោះ ដើម្បីធ្វើអត្តសញ្ញាណប័ណ្ណសញ្ជាតិខ្មែរគំរូថ្មីនេះ ពោលគឺត្រឹមថ្ងៃ នៃការជូនសេចក្ដីជូនដំណឹងខាងលើនេះ។
លោក កង សុខន មានប្រសាសន៍បន្ថែមថា មានពលរដ្ឋខ្មែរប្រមាណជាង១០លាននាក់ បានធ្វើអត្តសញ្ញាណប័ណ្ណសញ្ជាតិខ្មែរគំរូថ្មី ហើយនៅសល់ប្រមាណតែជាង២០ម៉ឺននាក់ទៀតប៉ុណ្ណោះ ដែលមិនទាន់បានមកធ្វើអត្តសញ្ញាណប័ណ្ណគំរូថ្មីនេះ។
នាយឧត្ដមសេនីយ៍ កង សុខន បានបញ្ជាក់ទៀតថា ការចុះបញ្ជីសុំអត្តសញ្ញាណប័ណ្ណសញ្ជាតិខ្មែរគំរូថ្មីនេះ គឺផ្ដោតជាសំខាន់តែលើពលរដ្ឋដែលមានសញ្ជាតិខ្មែរ។
លោកបញ្ជាក់ទៀតថា ចំណែក ជនបរទេសដែលទទួលបានសញ្ជាតិជាខ្មែរ ក៏អាចស្នើសុំធ្វើអត្តសញ្ញាណប័ណ្ណគំរូថ្មីនេះបានផងដែរ។
តាមរបាយការណ៍របស់ធនាគារពិភពលោកចុងក្រោយបំផុតស្ដីពីបច្ចុប្បន្នភាព នៃសេដ្ឋកិច្ចក្នុងតំបន់អាស៊ីប៉ាស៊ីហ្វិក ដែលចេញផ្សាយជាសាធារណៈកាលពីដើមខែតុលា ឆ្នាំ២០១៨បានឲ្យដឹងថា គិតត្រឹមឆ្នាំ២០១៧ កម្ពុជាមានចំនួនប្រជាជនប្រមាណជា១៦.១លាននាក់។៕
Source: Kampuchea Thmey Daily
0 Comments