ភ្នំពេញ ៖ ស្ត្រីសង្ស័យម្នាក់ ដើរលក់ភេសជ្ជៈសុខៗឃើញឱកាសល្អទូរស័ព្ទគេកំពុងដាក់សាកថ្មនៅក្នុងតូបលក់អីវ៉ាន់ ក៏ធ្វើសកម្មភាពលួចទូរស័ព្ទ តែត្រូវម្ចាស់ឃើញទាន់ក៏ដេញចាប់ប្រគល់ឱ្យសមត្ថកិច្ចឃាត់ខ្លួនកាលពីវេលាម៉ោង១និង៣០នាទីរសៀលថ្ងៃទី១០ខែវិច្ឆិកា ឆ្នាំ២០១៨ នៅចំណុចផ្សារបឹងសាឡាងថ្មី ក្រុមទី១៣ ភូមិបឹងសាឡាង សង្កាត់ឬស្សីកែវ។
ជនសង្ស័យឈ្មោះធូ ស្រីពេជ្រ ភេទស្រី អាយុ៣២ឆ្នាំ មានទីលំនៅផ្ទះលេខ១៩៥ ផ្លូវ៨០ ភូមិ២២ សង្កាត់ស្រះចក ខណ្ឌដូនពេញមុខរបរបុគ្គលិកក្រុមហ៊ុនហ្វេខាប់។
ជនរងគ្រោះឈ្មោះ អ៊ុង សុផល្លី ភេទស្រី អាយុ៤៧ឆ្នាំ ស្នាក់នៅផ្ទះលេខ៥៥៨ ផ្លូវបេតុង ក្រុមទី១៣ ភូមិបឹងសាឡាង សង្កាត់ឫស្សីកែវ មុខរបរលក់ដូរ។
សមត្ថកិច្ចឲ្យដឹងថា ជនរងគ្រោះកំពុងដេកនៅក្នុងតូបលក់អីវ៉ាន់នៅក្នុងផ្សារ ចំណែកជនសង្ស័យដើរលក់ភេសជ្ជៈ ឃើញទូរស័ព្ទដែលជនរងគ្រោះដាក់សាកថ្មនៅក្នុងតូប ក៏ធ្វើសកម្មភាពលួចយកទូរស័ព្ទនោះ ភ្លាមនោះជនរងគ្រោះបានឃើញទាន់ ក៏ដេញតាមរហូតមកដល់រ៉ឺម៉កលក់ភេសជ្ជៈរបស់ជនសង្ស័យ ឆែករកឃើញទូរស័ព្ទនៅក្នុងរ៉ឺម៉កនោះតែម្តង។
សម្ភារៈដកហូតទូរស័ព្ទដៃចំនួន៣គ្រឿងម៉ាកស៊ូហ្គា ពណ៌មាស១គ្រឿង ម៉ាកNokia ពណ៌ខ្មៅ ០១គ្រឿង និងម៉ាកTrue ពណ៌ខ្មៅ១គ្រឿង,ប្រាក់ចំនួន ១៣២,០០០រៀល និងប្រាក់ដុល្លារ ៥ដុល្លារ។ ចំណែកឯ ទូរស័ព្ទដៃម៉ាកស៊ូហ្គាបានប្រគល់ជូនជនរងគ្រោះវិញ។
ក្រោយឃាត់ខ្លួនជំនាញខណ្ឌប៉ុស្តិ៍កសាងសំណុំរឿងបញ្ជូនទៅសាលាដំបូងរាជធានីភ្នំពេញដើម្បីអនុវត្តតាមនីតិវិធី៕
Source: Kampuchea Thmey Daily
0 Comments