ភ្នំពេញ ៖ លោកប្ដីកំហូចមានប្រពន្ធនិងកូនពីរនាក់ស្ទើរពេញកំលោះក្រមុំទៅហើយតែលោកប្ដីម្នាក់នេះនៅតែមានចិត្តលបលួចទៅបង្កាត់ភ្លើងស្នេហ៍ជាមួយស្រីផ្សេងអស់រយៈពេលបីឆ្នាំមកហើយទើបតែពេលនេះ ប្រពន្ធដើមតាមទាន់ជាលើកទី២ ក៏ផ្ទុះទំនាស់ពាក្យសម្ដីយ៉ាងស្រៀវស្រាញផ្អើលដល់សមត្ថកិច្ចចុះទៅនាំភាគីទាំងបីមកដោះស្រាយគ្នានៅប៉ុស្តិ៍ កាលពីវេលាម៉ោង៩ព្រឹក ថ្ងៃទី២៨ ខែវិច្ឆិកា ឆ្នាំ២០១៨ ស្ថិតនៅផ្ទះខាងស្រីកំណាន់នៅក្នុងសង្កាត់កាកាប១ ខណ្ឌពោធិ៍សែនជ័យ។
ស្ត្រីជាប្រពន្ធដើមបានប្រាប់ឲ្យដឹងថា រវាងរូបនាងនិងប្ដីបានរៀបការពេញច្បាប់និងបានចាប់ដៃគ្នារកស៊ីជាមួយគ្នារាប់ឆ្នាំមកហើយ ថែមទាំងមានកូន២នាក់នៅក្នុងបន្ទុកទៀតផង ដោយសព្វថ្ងៃ២នាក់ប្តីប្រពន្ធ រួមទាំងកូនៗ រស់នៅក្នុងបន្ទប់ជួលនៅភូមិទួលពង្រ សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ។ ដោយសព្វថ្ងៃប្តីកំហូចខាងលើតែងតែរកស៊ីនៅខាងក្រៅរហូតដោយឲ្យនាងជាប្រពន្ធនៅតែមើលថែកូននៅបន្ទប់ជារៀងរាល់ថ្ងៃ ដោយប្តីជាអ្នកម៉ៅការដឹកកម្មករដាក់តាមរោងចក្រជាមួយថៅកែផ្សេងមិនសូវមានពេលចូលផ្ទះឡើយ។
ប្រភពបន្ដថា តាមពិតលោកប្ដីរូបនេះ បានលួចបង្កាត់ភ្លើងស្នេហ៍ជាមួយស្រីកំណាន់ថ្មីអស់រយៈពេល៣ឆ្នាំមកហើយ ហើយស្ត្រីជាប្រពន្ធដើមក៏ធ្លាប់បានតាមទាន់សកម្មភាពនេះ មួយលើកមកហើយដែរគ្រាន់តែពេលនោះឈ្លោះប្រកែកគ្នាតិចតួចតែប៉ុណ្ណោះ ក៏រំសាយកំហឹងទៅវិញព្រោះគិតថាក្រែងលោកប្ដីកែខ្លួន ហើយលោកប្ដីក៏បាននិយាយថា ខ្លួនឈប់ទាក់ទងនាងក្រោយនោះដែរ តែគាត់និយាយតែមាត់ដើម្បីលួងលោមប្រពន្ធកូនកុំឲ្យខឹងតែប៉ុណ្ណោះតាមពិតលោកប្ដីនៅតែបន្ដបង្កាត់ភ្លើងស្នេហ៍ជាមួយនាងក្រោយនោះជាប្រចាំ ហើយលោកប្ដីចេះតែមានចរិតប្លែកដោយចេះយកចិត្តប្រពន្ធកូនជាងលើកមុនឆ្ងាយណាស់ ដែលសកម្មភាពនេះធ្វើឲ្យស្ដ្រីជាប្រពន្ធដើមមានការងឿងឆ្ងល់និងកើតការសង្ស័យជាខ្លាំង។
ប្រភពបន្ដថា ដោយមានការសង្ស័យទៅនឹងទង្វើរបស់នាងក៏ចាប់ផ្ដើមដាក់ផែនការតាមដានរហូតមកដល់ថ្ងៃកើតហេតុនេះ ក៏ប្រទះឃើញបុរសជាប្តីបានមកដេកស្នាក់នៅផ្ទះរបស់ស្រីកំណាន់ជាមួយគ្នាយ៉ាងល្អូកល្អើនទៅវិញ ទើបស្ត្រីប្រពន្ធដើមទ្រាំមិនបានក៏កើតជម្លោះជេរបញ្ចោរគ្នាបង្កឲ្យមានការភ្ញាក់ផ្អើលឆោឡោជាលើកទី២ម្តងទៀត និងបានរាយការណ៍ទៅសមត្ថកិច្ចមូលដ្ឋានដើម្បីឲ្យនាំទាំងបីទៅសាកសួរ ប៉ុស្តិ៍កាកាប១តែម្ដង ប៉ុន្ដែមិនទាន់មានដំណោះស្រាយឲ្យច្បាស់លាស់នៅឡើយទេ៕
Source: Kampuchea Thmey Daily
0 Comments