ភ្នំពេញ ៖ ក្រសួងការបរទេសជប៉ុន និងប្រមុខការទូតសហរដ្ឋអាមេរិកប្រចាំកម្ពុជា បានប្រកាសស្វាគមន៍ និងគាំទ្រសាលក្រម របស់អង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ដែលគាំទ្រដោយអង្គការសហប្រជាជាតិ ដែលបានសម្រេចផ្តន្ទាទោសអតីតមេដឹកនាំខ្មែរ២រូប គឺ ខៀវ សំផន និង នួន ជា ដាក់គុកមួយជីវិត តាមរយៈសាលក្រមកាលពីថ្ងៃសុក្រ ទី១៦ ខែវិច្ឆិកា ឆ្នាំ២០១៨។
តាមរយៈបណ្តាញសង្គមហ្វេសប៊ុកផ្លូវការ របស់ស្ថានទូតអាមេរិក លោក William បានបញ្ជាក់ថា “សហរដ្ឋអាមេរិក សូមស្វាគមន៍ សាលក្រមនៅថ្ងៃ នេះ ដែលកំណត់ឲ្យអតីតមេដឹកនាំ ខ្មែរក្រហម ខៀវ សំផន និង នួន ជា មានទោសក្នុងបទឧក្រិដ្ឋប្រឆាំងមនុស្សជាតិ និងបទប្រល័យពូជសាសន៍។ ថ្វីត្បិតតែត្រូវបានចេញយឺតក្តី តែវាជាជំហានជាប្រវត្តិសាស្ត្រសម្រាប់ ប្រទេសកម្ពុជា។ សហរដ្ឋអាមេរិក សូមសាទរ ចំពោះជនរងគ្រោះ និងអ្នកគាំទ្ររបស់គេ ដែលបានខិតខំ ដោយគ្មានស្រាកស្រាន្ត ដើម្បីឲ្យមាន ការទទួលខុសត្រូវ និងសូមសាទរ ចំពោះសាក្សី ដែលមានសេចក្តីក្លាហាន ក្នុងការប្រាប់ពីការពិត ដែលឈឺចាប់ អំពីបទរំលោភបំពាន គួរឲ្យរន្ធត់ ដែលពួកគេបានទទួលរង។
លោកប្រមុខការទូតសហរដ្ឋអាមេរិកប្រចាំកម្ពុជាបានបន្ថែមថា “យើងសូមសាទរផងដែរ ចំពោះអង្គជំនុំជម្រះវិសាមញ្ញ ក្នុងតុលាការកម្ពុជា ដែលបានផ្តល់ជាកន្លែងផ្តល់យុត្តិធម៌ សម្រាប់ ជនរងគ្រោះ ដោយសារបទឧក្រិដ្ឋ ដ៏សែនយង់ឃ្នងនៃរបបខ្មែរក្រហម”។
ចំណែកសេចក្តីថ្លែងការណ៍របស់លោក Takeshi Osuga លេខាធិការសារព័ត៌មាននៃក្រសួងការបរទេសជប៉ុនបានបញ្ជាក់ដែរថា កាលពីថ្ងៃទី១៦ ខែវិច្ឆិកា អង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា បានប្រកាសកាត់ទោសជាប់ពន្ធនាគារមួយជីវិតចំពោះអតីតមេដឹកនាំជាន់ខ្ពស់នៃរបបខ្មែរក្រហមពីរនាក់។ ជប៉ុនស្វាគមន៍ការវិនិច្ឆ័យនោះថា ជាសមិទ្ធផលបន្ថែមទៀតនៃដំណើរការតុលាការ ដែលបានចាប់ផ្តើមនៅក្នុងឆ្នាំ២០០៦។ លោក Takeshi Osuga បន្តថា សវនាការកាត់ក្តីអតីតមេដឹកនាំខ្មែរក្រហម គឺជាជំហានដ៏សំខាន់ឆ្ពោះទៅរកដំណើរការសន្តិភាពទាំងមូលនៅកម្ពុជា ហើយនឹងរួមចំណែកក្នុងការផ្តល់យុត្តិធម៌ និងពង្រឹងនីតិរដ្ឋនៅក្នុងប្រទេស។ នៅក្នុងបរិបទនេះប្រទេសជប៉ុន បានដើរតួនាទីនាំមុខគេនៅក្នុងសហគមន៍អន្តរជាតិក្នុងការគាំទ្រដល់ការជំនុំជម្រះ។ ប្រទេសជប៉ុនសង្ឃឹមយ៉ាងមុតមាំថា ការសាកល្បងលើករណី ដែលនៅសល់ ត្រូវបានធ្វើឡើងយ៉ាងឆាប់រហ័ស ហើយបេសកកម្មរបស់ខ្លួនត្រូវបានបញ្ចប់ដោយជោគជ័យ។
សូមបញ្ជាក់ថា តាមការគ្រោងទុក កាលពីព្រឹកថ្ងៃទី១៦ ខែវិច្ឆិកា ឆ្នាំ២០១៨ អង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានប្រកាសសាលក្រមលើសំណុំរឿង០០២ វគ្គ២ ពាក់ព័ន្ធនឹងជនជាប់ចោទ នួន ជា និង ខៀវ សំផន ដែលត្រូវបានចោទប្រកាន់ពីបទឧក្រិដ្ឋកម្មប្រល័យពូជសាសន៍ ឧក្រិដ្ឋកម្មប្រឆាំងនឹងមនុស្សជាតិ និងការបំពារបំពានយ៉ាងធ្ងន់ធ្ងរទៅលើអនុសញ្ញាទីក្រុងហ្សឺណែវឆ្នាំ១៩៤៩ ហើយបើតាមសាលក្រមនោះ ចៅក្រមបានសម្រេចផ្តន្ទាទោសនួន ជា និង ខៀវ សំផន ដាក់ពន្ធនាគារអស់មួយជីវិត និងបើកផ្លូវឲ្យជនជាប់ចោទប្តឹងជំទាស់តាមទម្រង់ច្បាប់ផងដែរ៕
Source: Kampuchea Thmey Daily
0 Comments