ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រី បានមានប្រសាសន៍ថា គ្រប់សមិទ្ធផលនិងភាពជោគជ័យ និងគ្រប់វិស័យទាំងអស់នៅក្នុងសង្គមជាតិកម្ពុជា គឺសុទ្ធតែមានការចូលរួមរបស់យុវជនដែលក្នុងនោះមានមួយផ្នែករបស់ ស.ស.យ.ក បានចូលរួមដែរ ហើយសម្តេចក៏បានថ្លែងអំណរគុណ ចំពោះគ្រប់ផ្នែកទាំងអស់ នៃ ស.ស.យ.ក ដែលបានខិតខំប្រឹងប្រែងនាពេលកន្លងមក។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានមានប្រសាសន៍បែបនេះ កាលពីរសៀលថ្ងៃទី២៧ ខែវិច្ឆិកា ឆ្នាំ២០១៨នេះ ក្នុងឱកាសដែលសម្តេច និងសម្តេចកិត្តិព្រឹទ្ធបណ្ឌិតបានអញ្ជើញជាអធិបតីក្នុងពិធីបិទមហាសន្និបាតតំណាងទូទាំងប្រទេសលើកទី៤ របស់សហភាពសហព័ន្ធយុវជនកម្ពុជា (ស.ស.យ.ក) ដែលធ្វើឡើងនៅសណ្ឋាគារសុខាភ្នំពេញ។
សម្តេចតេជោនាយករដ្ឋមន្ត្រីបានថ្លែងដែរថា ស.ស.យ.ក មិនមែនជាអង្គការដាច់ដោយឡែកនោះទេ គឺបានចូលរួមចំណែកក្នុងកិច្ចការងារសង្គមរួបរួមសាមគ្គីគ្នាបង្កើតឲ្យទៅជាចលនាជាតិមួយដ៏ខ្លាំង។ ក្រៅពីការចូលរួមចំណែកគ្រប់ទិដ្ឋភាពទាំងអស់ មិនត្រឹមតែនៅក្នុងក្របខណ្ឌជាយុវជនទេ, កងទ័ព, នគរបាល, អាវុធហត្ថក៏សុទ្ធតែមានកងកម្លាំង ស.ស.យ.ក។
សម្តេចតេជោនាយករដ្ឋមន្ត្រីមានប្រសាសន៍បន្ថែមថា ក្រៅពីនោះ ស.ស.យ.ក បានធ្វើសកម្មភាពអំពីការបំបែកឯតទគ្គកម្មនានាដែលបានធ្វើកន្លងទៅ ហើយសម្រាប់តែឆ្នាំ ២០១៨ នេះ ក្រមាដែលវែងជាងគេនិងទូក ង ដែលវែងជាងគេនៅលើពិភពលោកបានក្លាយទៅជាការពិត ដែលឆ្លុះបញ្ចាំងថា ខ្មែរអាចធ្វើបាន។
មហាសន្និបាតតំណាងទូទាំងប្រទេសលើកទី៤ របស់សហភាពសហព័ន្ធយុវជនកម្ពុជាបានធ្វើឡើង កាលពីព្រឹកថ្ងៃទី២៦ ខែវិច្ឆិកា ឆ្នាំ២០១៨ ក្រោមអធិបតីភាពសម្តេចវិបុលសេនាភក្តី សាយ ឈុំ ប្រធានព្រឹទ្ធសភា និងជាអនុប្រធានគណបក្សប្រជាជនកម្ពុជា។
ការរៀបចំមហាសន្និបាតលើកទី៤ របស់សហភាពសហព័ន្ធយុវជនកម្ពុជា ត្រូវបានធ្វើឡើងចំខួប៤០ឆ្នាំ នៃកំណើតរបស់ខ្លួនផងដែរ។ មហាសន្និបាតនេះមានការចូលរួមពីថ្នាក់ដឹកនាំ សមាជិក សមាជិកមកពីទូទាំង២៥ រាជធានី-ខេត្តចំនួនប្រមាណ១.៣០០នាក់។ មហាសន្និបាតនេះធ្វើឡើងដោយផ្តោតការយកចិត្តទុកដាក់លើការបូកសរុបការងារឆ្នាំ២០១២-២០១៨និងទិសដៅការងារឆ្នាំ២០១៨-២០២៣ ព្រមទាំងការបោះឆ្នោតជ្រើសតាំងសមាជិក ជាមួយកិច្ចពិភាក្សា និង ការអនុម័តលើការកែប្រែលក្ខន្តិកៈនៃសហភាពសហព័ន្ធយុវជនកម្ពុជាផងដែរ។
មហាសន្និបាតនៅថ្ងៃទី២៦ វិច្ឆិកា សហភាពសហព័ន្ធយុវជនកម្ពុជា បានសម្រេចបញ្ចូលសមាជិកគណៈអចិន្ត្រៃយ៍គណៈកម្មាធិការកណ្តាលចំនួន ១៥រូបបន្ថែមទៀត ដើម្បីពង្រឹងប្រសិទ្ធភាពការងារដឹកនាំនៅក្នុងអង្គការចាត់តាំងដែលមានអាយុកាល ៤០ឆ្នាំមកនេះ។
សម្តេចតេជោ ហ៊ុន សែន នៅក្នុងឱកាសបិទមហាសន្និបាតនោះ បានអបអរសាទរចំពោះ ស.ស.យ.ក ដែលបានធ្វើការងារស្ម័គ្រចិត្តគ្រប់ទីកន្លែង។ សម្តេចបានបន្តថា គ្រប់សមិទ្ធផលនិងភាពជោគជ័យ និងគ្រប់វិស័យទាំងអស់នៅក្នុងសង្គមជាតិកម្ពុជា គឺសុទ្ធតែមានការចូលរួមរបស់យុវជនដែលក្នុងនោះមានមួយផ្នែករបស់ ស.ស.យ.ក បានចូលរួម។ សម្តេចតេជោបានថ្លែងអំណរគុណ ចំពោះគ្រប់ផ្នែកទាំងអស់ នៃ ស.ស.យ.ក ដែលបានខិតខំប្រឹងប្រែងនាពេលកន្លងមក។
ក្នុងឱកាសនេះ សម្តេចតេជោ ហ៊ុន សែន ក៏បានថ្លែងកោតសរសើរនិងដឹងគុណ ចំពោះតួអង្គពាក់ព័ន្ធទាំងអស់ ដែលបានរួមចំណែក រក្សានូវអាទិភាព, រក្សានូវនិរន្តរភាព នៃអង្គការចាត់តាំងមួយនេះ ទោះបីមានការប្រែប្រួលឈ្មោះ ទៅតាមដំណាក់កាលក៏ដោយ។
សូមជម្រាបថា សហភាពសហព័ន្ធយុវជនកម្ពុជា ជារណសិរ្សទូលំទូលាយនៃយុវជនកម្ពុជាដែលបានបន្តបេសកកម្មពីសមាគមយុវជនសាមគ្គីសង្គ្រោះជាតិកម្ពុជានិងសមាគមយុវជនកម្ពុជាដែលបានបដិសន្ធិនៅថ្ងៃទី២ ខែធ្នូ ឆ្នាំ១៩៧៨ ក្នុងគោលដៅសំខាន់បំផុតដើម្បីប្រមូលផ្តុំយុវជនគ្រប់ទិសទី ជាមហាកម្លាំងសាមគ្គី ក្នុងការរួមចំណែក កសាងប្រទេសកម្ពុជា ជាមួយឯករាជ្យ សន្តិភាព សេរីភាព ប្រជាធិបតេយ្យ និងវឌ្ឍនភាពសង្គម។ មកដល់បច្ចុប្បន្ន សហភាពសហព័ន្ធយុវជនកម្ពុជា នៅតែបន្តស្មារតីសាមគ្គី រួបរួមកម្លាំងធ្វើសកម្មភាពនានា ដើម្បីជាប្រយោជន៍ សម្រាប់សង្គមកម្ពុជា និងរួមចំណែក ជាមួយរាជរដ្ឋាភិបាល ក្នុងការកសាងធនធានមនុស្ស និងសង្គមកម្ពុជា។
នៅក្នុងឱកាសនោះ សម្តេចតេជោ ហ៊ុន សែន នាយករដ្ឋមន្ត្រីកម្ពុជាក៏បានធ្វើការដាស់តឿនដល់យុវជនទាំងអស់ត្រូវបន្តរួមចំណែកការពារនូវសន្តិភាព ស្ថិរភាព នយោបាយ កុំឲ្យរឿងរ៉ាវអតីតកាលវិលត្រឡប់មកវិញ រឿងនេះគឺដាច់ខាតតម្លៃណាក៏ដោយត្រូវធ្វើកុំឲ្យបដិវត្តន៍ពណ៌កើតនៅកម្ពុជាបានឡើយ។ សម្តេចបានបញ្ជាក់សាជាថ្មីថា កម្លាំងប្រដាប់អាវុធនិងរដ្ឋបាលស៊ីវិល គឺអព្យាក្រឹត្យតែចំពោះមុខគណបក្សនយោបាយនិងគណបក្សនយោបាយតែប៉ុណ្ណោះ។ តែមិនអាចឲ្យអព្យាក្រឹតរវាងរដ្ឋាភិបាលនិងគណបក្សនយោបាយនោះទេ គេបង្កើតកម្លាំងប្រដាប់អាវុធ និងរដ្ឋបាលស៊ីវិលឡើងដើម្បីការពាររដ្ឋ។ សូមកុំមានការភាន់ច្រឡំលើចំណុចនេះឲ្យសោះ។
សម្តេចបន្តថា កម្ពុជាត្រូវតែស្ថិតនៅជាប្រទេសដែលមានសន្តិភាព គ្រប់គ្នារួមចំណែកធ្វើកិច្ចការងារនេះឲ្យបាន៕
Source: Kampuchea Thmey Daily
0 Comments