ភ្នំពេញ ៖ បន្ទាប់ពីការបង្កើតឡើងវិញក្នុងឆ្នាំ១៩៩៩រហូតមកដល់ពេលនេះរាជបណ្ឌិត្យសភាកម្ពុជា មានអាយុកាល២០ឆ្នាំហើយ បើធៀបនឹងបណ្តាប្រទេសផ្សេងៗរាជបណ្ឌិត្យសភាកម្ពុជាមានភាពក្មេងខ្ចីជាងគេ ប៉ុន្តែមានការអភិវឌ្ឍន៍រីកចម្រើន ជាវិជ្ជមានគួរឲ្យកត់សំគាល់។
លោកបណ្ឌិតសភាចារ្យ ស៊ន សំណាង អតីតប្រធានរាជបណ្ឌិត្យសភាកម្ពុជានិងជាស្ថាបនិកដំបូងបានមានប្រសាសន៍កត់សំគាល់នៅក្នុងសន្និបាតបូកសរុបការងារប្រចាំឆ្នាំ២០១៨ និងទិសដៅការងារឆ្នាំ២០១៩ បានធ្វើឡើងរយៈពេល៣ថ្ងៃ គឺចាប់ពីថ្ងៃទី២៦-២៨ ខែវិច្ឆិកា ឆ្នាំ២០១៨នៅរាជបណ្ឌិត្យសភាកម្ពុជា។
លោកបន្តថា សកម្មភាពការងាររបស់រាជបណ្ឌិត្យសភាកម្ពុជា បច្ចុប្បន្នក្រោមការដឹកនាំរបស់លោកបណ្ឌិតសភាចារ្យ សុខ ទូច គឺជាសកម្មភាពការងារដែលមានលក្ខណៈបន្តវេន នឹងកំពុងដើរលើផ្លូវមួយដែលត្រឹមត្រូវសម្រាប់រួមចំណែកអភិវឌ្ឍស្ថាប័ន និងល្អសម្រាប់ជាតិ។
លោកបណ្ឌិត សភាចារ្យ សុខ ទូច ប្រធានរាជបណ្ឌិត្យសភាកម្ពុជា បានស្វាគមន៍ចំពោះវត្តមានអតីតថ្នាក់ដឹកនាំរាជបណ្ឌិត្យសភាកម្ពុជា ក៏ដូចជាថ្នាក់ដឹកនាំនិងមន្ត្រីរាជការទាំងអស់ក្នុងកម្មវិធីសន្និបាត។ នៅក្នុងអង្គសន្និបាតនេះលោកបណ្ឌិតសភាចារ្យ ប្រធាន បានសង្កត់ធ្ងន់ពីដំណាក់នៃកំណែទម្រង់រដ្ឋបាលផ្ទៃក្នុង ក៏ដូចជាសកម្មភាពការងារនៅតាមវិទ្យាស្ថាន និងស្ថាប័នឧបសម្ពន្ធនៃរាជបណ្ឌិត្យសភាកម្ពុជាទាំងអស់ ព្រោះថា រាជបណ្ឌិត្យសភាកម្ពុជា ជាស្ថាប័នធនាគារខួរក្បាល ដូច្នេះថ្នាក់ដឹកនាំ និងមន្ត្រីរាជការដែលជាអ្នកស្រាវជ្រាវ ត្រូវបំពេញកាតព្វកិច្ចខ្លួន ជៀសវាងដាច់ខាត ការយកម៉ោងការងាររដ្ឋទៅធ្វើកិច្ចការផ្សេង ឬមកតែចុះវត្តមានហើយត្រឡប់ទៅវិញ ហើយបើកប្រាក់ខែដោយគ្មានលទ្ធផលការងារ។ ក្នុងនាមជាមន្ត្រីស្រាវជ្រាវ ត្រូវស្រាវជ្រាវរកធាតុចូលឲ្យ ស្ថាប័នសម្រាប់ដាក់ជូនទៅរាជរដ្ឋាភិបាល។
គួរបញ្ជាក់ថា ឆ្នាំនេះក៏ដូចជាឆ្នាំមុនៗដែរ រាជបណ្ឌិត្យសភាកម្ពុជាតែងតែបានរៀបចំកម្មវិធីបូកសរុបការងារប្រចាំឆ្នាំ និងលើកទិសដៅការងារសម្រាប់ឆ្នាំបន្ទាប់។ នៅឆ្នាំនេះ ជាឆ្នាំដែលត្រូវការកែទម្រង់ការងារច្រើនរបស់ស្ថាប័នស្រាវជ្រាវជាតិនេះ ហើយក៏ជាឆ្នាំដែលប្រធានថ្មីនៃរាជបណ្ឌិត្យសភាកម្ពុជា បានតាំងចិត្តនឹងជួយជំរុញប្រសិទ្ធភាពការងារក្នុងស្ថាប័នរាជបណ្ឌិត្យសភាកម្ពុជា ឲ្យក្លាយជាស្ថាប័នធនាគារខួរក្បាល សិក្សាស្រាវជ្រាវរកធាតុចូលជូនរាជរដ្ឋាភិបាល និងប្រទេសជាតិ៕
Source: Kampuchea Thmey Daily
0 Comments