ភ្នំពេញ ៖ កម្លាំងប្រជាការពារសាលាខណ្ឌច្បារអំពៅកាលពីរសៀលថ្ងៃទី២៧ ខែវិច្ឆិកានេះបានប្រើប្រាស់រថយន្តដឹកទឹកលាងសំអាតស្ពានព្រះមុនីវង្សចាស់ ថ្មី បន្ទាប់ពីលាងសំអាតផ្លូវជាតិលេខ១រួចមក។
យោងតាមប្រសាសន៍លោកប៊ូ វឌ្ឍនា នាយករងរដ្ឋបាលសាលាខណ្ឌច្បារអំពៅបានឲ្យកម្ពុជាថ្មីដឹងថា នៅថ្ងៃទី២៧ ខែវិច្ឆិកានេះ លោកបានទទួលបញ្ជាពីលោកចេង មុនីរ៉ា អភិបាលនៃគណៈអភិបាលខណ្ឌច្បារអំពៅឲ្យដឹកនាំកម្លាំងចុះរៀបចំសណ្តាប់ធ្នាប់និងលាងសំអាតផ្លូវជាតិលេខ១រហូតដល់លើស្ពានព្រះមុនីវង្សចាស់និងថ្មីធ្វើយ៉ាងណាឲ្យអស់សំរាមនិងកំទេចដី។
លោកនាយករងរដ្ឋបាលបានបន្តថា ការចុះធ្វើអនាម័យលើកំណាត់ផ្លូវខាងលើនេះគឺលោកអភិបាលខណ្ឌឲ្យធ្វើជាប្រចាំព្រោះផ្លូវជាតិលេខ១ជាផ្លូវដែលភ្ញៀវជាតិនិងអន្តរជាតិឆ្លងកាត់សឹង២៤ម៉ោងហើយបើកំណាត់ផ្លូវជាតិនេះមិនស្អាតគឺប៉ះពាល់ដល់ប្រទេសយើងផង។
លោកប៊ូ វឌ្ឍនា ក៏បានសំណូមពរដល់បងប្អូនប្រជាពលរដ្ឋ ដែលមានលំនៅឋានជាប់ផ្លូវជាតិលេខ១សូមមេត្តាចូលរួមសំអាតមុខផ្ទះកុំឲ្យទុកដាក់សំរាមមុខផ្ទះព្រោងព្រាតហើយពេលមានខ្យល់មកវាអាចប៉ើងហើរពេញដងផ្លូវ។ ដូច្នេះហើយទើបអាជ្ញាធរសុំឲ្យទុកដាក់សំរាមក្នុងផ្ទះហើយដល់ពេលរថយន្តដឹកសំរាមមកដល់ចាំយកចេញក្នុងពេលដែលកម្មករប្រមូលសំរាមមកទទួលយក៕
Source: Kampuchea Thmey Daily
0 Comments