លោក គីម ជុង​អ៊ុន បើកចំហ​ចំពោះ​ការធ្វើ​អធិការកិច្ច​នៅ​ទីតាំង​នុយក្លេអ៊ែរ

មេដឹកនាំ​កូរ៉េខាងជើង​លោក គីម ជុង​អ៊ុន មាន​ឆន្ទៈ​អនុញ្ញាត​ឲ្យ​ក្រុមអធិការកិច្ច​ចូលទៅក្នុង​បរិវេណ​នុយក្លេអ៊ែរ​ដ៏​សំខាន់​របស់​ប្រទេស​នេះ​ នៅក្នុង​តំបន់ Yongbyon។ នេះ​បើតាម​សេចក្តីរាយការណ៍​របស់​ភ្នាក់ងារ​ព័ត៌មាន Yonhap របស់​ប្រទេស​កូរ៉េខាងត្បូង​កាលពី​ថ្ងៃ​អង្គារ​ដោយ​លើកឡើង​ពី​ប្រភព​របស់​អ្នកការទូត​ជាន់ខ្ពស់​ម្នាក់​។​

Yonhap បាន​ដកស្រង់​ប្រភព​នេះ​ដោយ​និយាយថា “​ខ្ញុំ​យល់ថា លោក​ប្រធាន​គីម​បាន​ប្រាប់​ប្រធានាធិបតី​កូរ៉េខាងត្បូង​លោក មូ​ន ចេ​អ៊ី​ន ក្នុងអំឡុង​កិច្ចប្រជុំ​កំពូល​របស់​អ្នក​ទាំងពីរ​កាលពី​ខែកញ្ញា​ថា ប្រសិនបើ​អាមេរិក​ចាត់វិធានការ​សមស្រប គាត់​នឹងមិន​ត្រឹមតែ​មានបំណង​បិទ​រោងចក្រ​នុយក្លេអ៊ែរ Yongbyon ប៉ុណ្ណោះ​ទេ​ប៉ុន្តែ​ថែមទាំង​អនុញ្ញាត​ឲ្យ​មានការ​ផ្ទៀងផ្ទាត់​ផងដែរ​”​។​
​
ប្រភព​នេះ​បាន​និយាយថា លោក មូ​ន បាន​ផ្ញើ​សារ​ទៅកាន់​ប្រធានាធិបតី​អាមេរិក​លោក ដូ​ណា​ល់ ត្រាំ នៅពេលដែល​អ្នក​ទាំងពី​រ​ជួបគ្នា​នៅ​មហាសន្និបាត​អង្គការសហប្រជាជាតិ​ក្នុង​ទីក្រុង​ញូវយ៉ក​កាលពី​ខែកញ្ញា​។​
​
លោក​គីម​ធ្លាប់បាន​សម្តែង​ភាព​បើកចំហរ​ក្នុង​ការបិទ​ទីតាំង​នេះ​ប្រសិនបើ​ក្រុង​វ៉ាស៊ីនតោន​ចាត់វិធានការ​ត្រូវ​រូ​វ​គ្នា​ប៉ុន្តែ​មិន​ផ្តល់​ឲ្យ​មានការ​អនុញ្ញាត​ឲ្យ​អ្នកត្រួតពិនិត្យ​ធ្វើការ​ផ្ទៀងផ្ទាត់​ឡើយ​។​
​
នៅពេល​សាកសួរ​អំពី​របាយការណ៍​កាលពី​ថ្ងៃ​អង្គារ​ស្តីពី​ឆន្ទៈ​របស់​កូរ៉េខាងជើង​ក្នុងការ​អនុញ្ញាត​ឲ្យ​អ្នកត្រួតពិនិត្យ​ចូលទៅ​និង​ថា​តើ​មានការ​អភិវឌ្ឍ​ថ្មី​ដែរ​ឬក៏​អត់​នោះ អ្នកនាំពាក្យ​ក្រសួងការបរទេស​អាមេរិក​លោកស្រី Heather Nauert បាន​និយាយថា លោកស្រី​មិនបាន​ដឹង​ពី​បញ្ហា​ណាមួយ​នោះទេ​ប៉ុន្តែ​លោក​គីម​បាន​យល់ព្រម​ឲ្យ​មានការ​ពិនិត្យមើល​អំឡុង​កិច្ចប្រជុំ​ជាមួយ​រដ្ឋមន្ត្រីការបរទេស​លោក Pompeo កាលពីពេល​ថ្មីៗ​នេះ​។
​
លោកស្រី Nauert បាន​ប្រាប់​ក្រុម​អ្នកយកព័ត៌មាន​ថា “​នោះ​ជា​អ្វីដែល​លោក​រដ្ឋមន្ត្រី​និង​លោក​ប្រធាន គីម បាន​យល់ព្រម​និង​និយាយ​នៅពេលដែល​លោក​រដ្ឋមន្ត្រី​ស្ថិតនៅ​ទីក្រុង​ព្យុងយ៉ាង​កាលពី​មួយខែ​មុន​។ ដូច្នេះ នោះ​ហើយ​ជា​អ្វីដែល​ពួកគេ​បាន​ព្រមព្រៀងគ្នា​ហើយ​យើង​សង្ឃឹមថា លោក គីម នឹង​បំពេញ​តាម​ការប្តេជ្ញា​របស់គាត់​”៕ REUTERS

[caption id="attachment_998799" align="alignnone" width="700"] ​[/caption]

​

Source: Kampuchea Thmey Daily