កណ្តាល ៖ បុរសម្នាក់បានត្រូវសមត្ថកិច្ចនគរបាលស្រុកស្អាងធ្វើការឃាត់ខ្លួនកសាងសំណុំរឿងបញ្ជូនទៅកាន់តុលាការករណីប្រើអំពើហិង្សាលើអ្នកដទៃពីរឿងខ្ចីលុយ៦០០០០រៀលរយៈពេល២ឆ្នាំកន្លងមកនោះ។
នគរបាលស្រកស្អាងបានឲ្យដឹងថា អំពើហិង្សាបានកើតឡើងនៅថ្ងៃទី១១ ខែ វិច្ឆិកា ឆ្នាំ២០១៨ វេលាម៉ោង២២និង១០នាទី នៅចំណុច លូតាខន ស្ថិតនៅភូមិពីងពង់ ឃុំក្រាំងយ៉ូវ ស្រុកស្អាង ខេត្តកណ្តាល។
ជនរងគ្រោះឈ្មោះ ចេង ហុន ភេទស្រី អាយុ៤៦ឆ្នាំ ជនជាតិខ្មែរ មុខរបរកសិករ មានទីលំនៅ ភូមិពីងពង់ ឃុំក្រាំងយ៉ូវ ស្រុកស្អាង ខេត្តកណ្តាល។ ជនសង្ស័យឃាត់ខ្លួនឈ្មោះ យ៉ុន សល់ ភេទប្រុស អាយុ៦៧ឆ្នាំ ជនជាតិខ្មែរ មុខរបរកសិករ មានទីលំនៅ ភូមិទួលក្រាំង ឃុំក្រាំងយ៉ូវ ស្រុកស្អាង ខេត្តកណ្ដាល។
នគរបាលបញ្ជាក់ថា នៅថ្ងៃនិងវេលាកើតហេតុខាងលើ ឈ្មោះចេង ហុនបានជិះកង់ទៅរកប្តីឈ្មោះ អុន វី ដែលទៅនេសាទត្រីនៅចំណុចបឹង៥០០ ប៉ុន្តែរកមិនឃើញប្ដីក៏ជិះកង់ត្រឡប់មកវិញបានជួបឈ្មោះយ៉ុន សល់ នៅចំណុចកើតហេតុទើបឈ្មោះចេងហុនសួរទៅកាន់ឈ្មោះយ៉ុនសល់ រកប្តីរបស់ខ្លួន ឈ្មោះយ៉ុនសល់ឆ្លើយថា មិនបានជួបទេ បន្ទាប់មកឈ្មោះចេងហុនបណ្តើរកង់ចេញផុតពីឈ្មោះយ៉ុនសល់បានបន្តិចស្រាប់តែឈ្មោះយ៉ុនសល់វាយឈ្មោះចេងហុនចំកខាងស្តាំចំនួន១ដំបងឫស្សីបណ្តាលឲ្យដួលលុតជង្គង់ភ្លាមនោះឈ្មោះចេងហុនខំប្រឹងស្ទុះងើបបណ្តើរកង់រត់មកដល់ផ្ទះខ្លួនក៏សន្លប់តែម្តង ភ្លាមនោះបានក្រុមគ្រួសារបញ្ជូនទៅមណ្ឌលសុខភាពអណ្តូងឃុំក្រាំងយ៉ូវដើម្បីព្យាបាល។
ក្រោយពេលទទួលបានព័ត៌មានខាងលើកម្លាំងនគរបាលប៉ុស្តិ៍ក្រាំងយ៉ូវបានអន្តរាគមន៍ដល់កន្លែងកើតហេតុ ធ្វើការនាំខ្លួនឈ្មោះយ៉ុនសល់មកប៉ុស្តិ៍រដ្ឋបាលក្រាំងយ៉ូវដើម្បីសាកសួរ។នៅចំពោះមុខសមត្ថកិច្ចនគរបាល ឈ្មោះយ៉ុនសល់បានសារភាពថាខ្លួនមានគំនុំជាមួយឈ្មោះអុន វីដែលត្រូវជាប្តីរបស់ឈ្មោះចេងហុនដោយសារខ្ចីលុយចំនួន៦០០០០រៀល រយៈពេលពីរឆ្នាំកន្លងមកទើបសងរួច៕
Source: Kampuchea Thmey Daily
0 Comments