ក្រុម​ក្រសួងការពារជាតិ នាំយក​កីឡាករ​១៨​នាក់​ទៅ​ប្រកួត​ពានរង្វាន់​អន្តរជាតិ​មួយ​នៅ​ប្រទេស​ចិន

ក្រុមបាល់ទាត់​ម្ចាស់​ជើងឯក​ពានរង្វាន់​សម្តេច​តេ​ជោ ហ៊ុន សែន រដូវ​កាល​ឆ្នាំ ២០១៨ ក្រសួងការពារជាតិ (​ទ័ព​) បាន​ចាក​ចេញពី​មាតុភូមិ​ទៅ​ប្រកួត​ក្នុង​ពានរង្វាន់​អន្តរជាតិ​មួយ​នៅ​ប្រទេស​ចិន នា​ព្រឹក​ថ្ងៃ​ច័ន្ទ ទី​១២ ខែវិច្ឆិកា ឆ្នាំ​២០១៨ ថ្មីៗ​នេះ ខណៈ​លោក ភា សុភ​ត្រា ដែល​ជា​គ្រូបង្វឹក​បាន​ដឹកនាំ​កីឡាករ​ចំនួន​១៨​នាក់​ធ្វើដំណើរ​ទៅជា​មួយ​។



ចំណែក​ថ្នាក់ដឹកនាំ​មាន​លោក ខូវ ឆាយ ជា​អគ្គលេខាធិការ​ក្លិប លោក ទេព ឡុង​រចនា ជា​អ្នកចាត់ការ​ទូទៅ​ក្លិប​លោក ភា សុភ​ត្រា ចា​គ្រូបង្វឹក​លោក អ៊ុំ សាវង្ស​, ហោ សុខ​ហេង​,​ឡុង សុធា​រ៉ា និង លេង ណា​វីន ជា​ជំនួយការ​គ្រូបង្វឹក​។ ចំណែក​កីឡាករ​មាន សំរឹទ្ធ សីហា​, គឹម ស៊ី​ម៉េង​, ខែ​ក ខេមរិន្ទ​, រឿ​ម ចាន់​រឿន​, ម៉ាត់ សាត់​យ៉ា​,​អ៊ែ​ល ធី​ហឿ​ត​, អ៊ុ​ព កា​ម៉ុ​ល​, ង៉ែត លី​ទី​,​សុខ ហៀ​ង​,​ភួង សុខ​សា​ណា​, ជា ណា​វីន​, កាន់ ពិសាល​, ទូច រ៉ូ​ម៉ា​,​ណា​រ៉ុង កក្កដា​។ ក្រៅពីនោះ​កីឡាករ​បរទេស​មាន Yoo Jae Ho ជនជាតិ​កូរ៉េខាងត្បូង​, Yudai Ogawa ជនជាតិ​ជប៉ុន​,MOHAMED HAMZA ជនជាតិ​អេ​ហ្ស៊ី​ប​, Na Hyosung ជនជាតិ​កូរ៉េខាងត្បូង​។

លោក ភា សុភ​ត្រា បានលើកឡើង​មុន​ចេញដំណើរ​ថា​ពានរង្វាន់​ដែល​រៀបចំ​នៅ​ប្រទេស​ចិន​នេះ​មាន​ក្រុម​ចូលរួម​ដូចជា​២​ក្រុម​មកពី​ថៃ​គឺ Police Tero Sasana និង​ក្រុម​សាកលវិទ្យាល័យ​មួយ បូករួម​ទាំង​ក្លិប Than Quang Ninh របស់​វៀតណាម ដែល​ចូលរួម​ប្រកួត​ដណ្តើម​ជើងឯក​នេះ​។​តាម​គម្រោង​ក្រុម​ក្រសួងការពារជាតិ នឹង​ប៉ះ​ជាមួយ​ក្រុម​សាល​វិទ្យាល័យ​ថៃ នៅ​ថ្ងៃ​ពុធ ទី​១៤ វិច្ឆិកា ខាងមុខ ហើយ​ក្រុម​ដែល​ឈ្នះ​ក្នុង​ប្រកួត​នេះ​នឹង​ឡើងទៅ​លេង​នៅ​វគ្គ​ផ្ដាច់ព្រ័ត្រ តែម្តង​។



​ដំណើរ​ទៅកាន់​ប្រទេស​ចិន នេះ​ត្រូវបាន​ក្លិប​ក្រសួងការពារជាតិ គិតថា​គឺជា​ឱកាស​ក្នុងការ​ធ្វើតេស្ត​សមត្ថភាព​ដល់​កីឡាករ​ថ្មីៗ​មួយចំនួន​មុន​រដូវ​កាល​ថ្មី​ឆ្នាំ​២០១៩ មកដល់​ខណៈ​លោក​ក៏បាន​ចុះបញ្ជី​កីឡាករ​យុវជន​៤​នាក់​នៅក្នុង​ក្រុម​ដើម្បី​ជំនួស​កីឡាករ​សំខាន់ៗ​ដែល​កំពុង​ជាប់​ឈ្មោះ​ក្នុង​ក្រុម​ជម្រើសជាតិ​កម្ពុជា ប្រកួត​ក្នុង​ពានរង្វាន់ AFF Suzuki Cup 2018​។ កីឡាករ​ទាំងអស់​នោះ​មាន​ឈិន ឈឿន​,​រ៉ឹ​ម ប៊ុន​ហៀ​ង​, ស ពិសិដ្ឋ និង អ៊ុំ វិចិត្រ​។

​បើ​និយាយ​ពី​បេសកកម្ម​ក្នុង​រដូវ​កាល​ឆ្នាំ​២០១៨ កន្លងទៅ​ក្រុម​ក្រសួងការពារជាតិ បានបញ្ចប់​ចំណាត់ថ្នាក់​លេខ​៤ ក្នុងចំណោម​ក្លិប​ទាំង​១២​ប្រចាំ​ពានរង្វាន់​លី​គ​កំពូល​កម្ពុជា​(Metfone Cambodian League 2018) ក្រោយ​ប្រកួត​បាន​២២​លើក​ឈ្នះ​បាន​១៣ លើក​ហើយ​ធ្លាប់​ស្មើគ្នា​បាន​៣​លើក និង​ចាញ់​រហូតដល់​៦​លើក​។ ចំណែក​ពានរង្វាន់​សម្តេច​តេ​ជោ វិញ​គឺ​បានឈ្នះ​ជើងឯក​ក្រោយ​យកឈ្នះ​លើ​ក្រុម​អគ្គស្នងការដ្ឋាន​នគរ​បាល​ជាតិ ៣​ទល់​០ ក្នុង​វគ្គ​ផ្តាច់ព្រ័ត្រ​៕

Source: Kampuchea Thmey Daily