គ្រូបង្វឹក​ថ្មី​ភ្នំពេញ ពេញ​ចិត្តនឹង​កូនក្រុម​ក្រោយ​ហ្វឹកហាត់​ជាមួយគ្នា​រយៈពេល​ខ្លី​មកនេះ

ក្រោយ​ប្រមូល​ផ្តុំគ្នា​មួយ​រយៈ​ពេល​ខ្លី ហើយ​បាន​ប្រកួត​មិត្តភាព​លើកដំបូង​កាលពី​ចុង​សប្ដាហ៍​កន្លង​ទៅ​នេះ គ្រូបង្វឹក​របស់​ក្រុម​ភ្នំពេញ​ក្រោ​ន​ថ្មី​គឺ​លោក Leonardo Vitorino បាន​សម្លឹង​ឃើញ​ពី​សក្តានុពល​របស់​កូនក្រុម​ខ្លួន​ថា​រីកចម្រើន​ខ្លាំង ទោះបីជា​បរាជ័យ​ក្នុង​ប្រកួត​មិត្តភាព​កម្តៅ​សាច់ដុំ​ក្រៅផ្លូវការ​ក៏ដោយ​។

បុរស​ជនជាតិ​ប្រេ​ស៊ី​ល រូបនេះ​បាន​បញ្ជាក់​ថា «​ថ្វីត្បិតតែ​ពួក​យើង​ចាញ់​ការប្រកួត​នេះ​ប៉ុន្តែ​ខ្ញុំ​ពេញចិត្ត​នូវ​ទម្រង់​លេង​របស់​កូនក្រុម ព្រោះ​ពួក​យើង​ទើបតែ​បាន​ហ្វឹកហាត់​ជាមួយគ្នា​ពេញ​បាន​តែមួយ​សប្តាហ៍ តែ​ពួកគេ​ព្យាយាម​ធ្វើតាម​អ្វី​ដែល​ខ្ញុំ​ចង់បាន​បាន​ច្រើន​»​។ ក្រុម​ភ្នំពេញ​ក្រោ​ន បាន​ប្រកួត​ចាញ់​ក្រុម​ក្រសួងការពារជាតិ ៣​ទល់​១ នៅ​ល្ងាច​ថ្ងៃ​សៅរ៍ ចុង​សប្ដាហ៍​កន្លងទៅនេះ​លើ​ទីលាន​កីឡដ្ឋាន RSN Stadium​។



​នេះ​ជា​បរាជ័យ​លើកដំបូង​របស់លោក Leonardo Vitorino ដែល​ទើប​កាន់​តំណែង​ជា​គ្រូបង្វឹក​របស់​ក្រុម​ភ្នំពេញ​ក្រោ​ន ខណៈ​លោក​បាន​ដាក់​កីឡាករ​យុវជន​ជាច្រើន​បង្ហាញខ្លួន​លើ​ទីលាន​លើក​នេះ​។ មិនតែប៉ុណ្ណោះ​ក្នុង​ប្រកួត​នេះ​បាន​អវត្តមាន​កីឡាករ​សំខាន់ៗ​មួយចំនួន​ដែល​បាន​កោះ​ហៅចូល​ក្រុម​ជម្រើសជាតិ​កម្ពុជា ក្នុង​យុទ្ធនា​ការប្រកួត​ជើងឯក​ពាន​អាស៊ាន AFF Suzuki Cup 2018​។

លោក Leonardo Vitorino ធ្លាប់មាន​បទពិសោធន៍​ការងារ​ជាមួយ​ក្រុម Selection of Australia U-15 នៅ​ឆ្នាំ​១៩៩៤ ហើយ​នៅ​ឆ្នាំ​ជាមួយ​នោះ​ដែរ ​លោក​បាន​ដឹកនាំ​ក្រុម​ជម្រើសជាតិ U-17 របស់​សហរដ្ឋ​អា​មេ​រិក រហូតដល់​ឆ្នាំ​១៩៩៧ ខណៈ​នៅ​ឆ្នាំ​១៩៩៨ លោក​បាន​ដឹកនាំ​ក្រុម Botafogo FR នៅ​ប្រទេស​អ៊ីតាលី ហើយ​នៅ​ឆ្នាំ ២០០១ លោក​បាន​ដឹកនាំ​ក្រុម Trinidad and Tobago Selection​។ ចន្លោះ​ឆ្នាំ​២០០២ ដល់​២០០៥ លោក​បាន​ដឹកនាំ​ក្រុម Santos Angola F.C នៅ​ប្រទេស​អង់កូ​ឡា ក្នុង​ទ្វីបអាហ្វ្រិក ហើយ​ឆ្នាំ​២០០៥​ដល់​២០០៦ បាន​ត្រឡប់​ទៅ​ដឹកនាំ​ក្រុម​La Sierra នៅ​សហរដ្ឋអាមេរិក នៅ​ឆ្នាំ​២០០៦ ដែល​ដឹកនាំ​ក្រុម​Estrela do Norte F.C នៅ​ស្រុកកំណើត មុន​ចេញទៅ​ក្រុម​Macaé EC និង​ក្រុម​America FC-RJ នៅ​ឆ្នាំ​បន្ទាប់​។



​នៅ​ឆ្នាំ​២០០៧ ដល់​២០១៣ លោក​បាន​ដឹកនាំ​ក្លិប​da Al Gharafa នៅ​ប្រទេស​កាតារ ហើយ​ចាប់ពី​ឆ្នាំ​២០១៣ ដល់​២០១៤ ដឹកនាំ​ក្រុម​El Jaish ក្នុង​ប្រទេស​កាតា​រដែរ​។ ចាប់ពី​ឆ្នាំ​២០១៣ ដល់​២០១៦ បាន​ចូល​ទៅ​ធ្វើការ​ជានា​យក​បច្ចេកទេស​ផង​និង​ជា​គ្រូដឹកនាំ​ក្រុម B ផង​នៅ​ក្លិប Buriram United របស់​ថៃ និង​ចុងក្រោយ​នៅ​ឆ្នាំ​២០១៦ បាន​ដឹកនាំ​ក្រុម Lanexang United របស់​ឡាវ មុន​មកដល់​ប្រទេស​កម្ពុជា ក្នុងនាម​ជា​គ្រូបង្វឹក​ក្រុម​ជម្រើសជាតិ​។ ក្រោយ​ចាក​ចេញពី​ប្រទេស​កម្ពុជា លោក​ទទួល​បាន​ការងារ​ថ្មី​នៅ​ស្រុកកំណើត​ដោយ​ធ្វើជា​នាយក​បច្ចេកទេស​នៅ​ក្លិប​Ceará Sporting Club សមាជិក​ពានរង្វាន់​លី​គ​កំពូល​ប្រេ​ស៊ី​ល ក្នុង​ឆ្នាំ​២០១៨ មុន​បន្តដំណើរ​មក​ប្រទេស​កម្ពុជា លើក​ទី​២នេះ៕

Source: Kampuchea Thmey Daily