ខ្សែបម្រើ សារី ម៉ាត់ណូរ៉ូទីន បានចាកចេញពីក្លិបជើងឯកពានរង្វាន់លីគកំពូលកម្ពុជា ឆ្នាំចាស់ណាហ្គាវើល កាលពីដើមខែវិច្ឆិកាថ្មីៗនេះ ដោយទៅចូលរួមជាមួយក្លិបវិសាខា ហើយកីឡាករខ្មែរ-អ៊ីស្លាមរូបនេះ បានបញ្ជាក់ហេតុផលចំនួន២ឃ្លា ក្រោយសម្រេចចិត្តប្តូរទ្រនំមុនរដូវកាលឆ្នាំ២០១៩ មកដល់នៅពេលខាងមុខ។
កីឡាកររូបនេះបានបញ្ជាក់ពីមូលហេតុក្រោយផ្ទេរមកកាន់ក្លិបបាល់ទាត់វិសាខាថា ដោយសារខ្លួនចង់ទទួលបានបទពិសោធន៍និងការប្រកួតប្រជែងថ្មី ដើម្បីអភិវឌ្ឍន៍សមត្ថភាពក្នុងអាជីពបាល់ទាត់របស់ខ្លួនឲ្យកាន់តែល្អប្រសើរ។ កីឡាករវ័យ ២២ឆ្នាំរូបនេះ បានសម្ដែងការសប្បាយចិត្ត និងរីករាយជាខ្លាំង ក្រោយទទួលបានឱកាសចូលរួមជាមួយក្លិបបាល់ទាត់វិសាខា ហើយគេបានប្ដេជ្ញានឹងខំប្រឹងឲ្យអស់ពីសមត្ថភាពដើម្បីជួយក្លិបថ្មីរបស់ខ្លួន។
អតីតកីឡាករជម្រើសជាតិរូបនេះបានបញ្ជាក់ថា «ខ្ញុំមកទីនេះ ខ្ញុំបានកំណត់គោលដៅខ្លួនឯងរួចហើយ ទោះខ្ញុំស្ថិតក្នុងជម្រើសណារបស់លោកគ្រូ ក៏ខ្ញុំត្រូវព្យាយាមឲ្យអស់ពីសមត្ថភាពរបស់ខ្ញុំ ដើម្បីជួយក្លិបដែរ។ និយាយរួម ខ្ញុំប្ដេជ្ញានឹងប្រើប្រាស់សមត្ថភាពខ្ញុំមានជួយក្លិបថ្មីរបស់ខ្ញុំ ដើម្បីទទួលបានលទ្ធផលល្អក៏ដូចជាជើងឯកពានរង្វាន់អ្វីមួយ ពិសេសពានរង្វាន់សម្ដេចតេជោ ហ៊ុន សែន និងលីគកំពូលកម្ពុជា តែម្ដង»។
គេចាំបានថាកីឡាករ សារី ម៉ាត់ណូរ៉ូទីណ បានផ្ដើមអាជីពបាល់ទាត់ជាមួយក្លិបអាស៊ីអឺរ៉ុប ចាប់ពីឆ្នាំ២០១៣-២០១៥ បន្ទាប់មកបានផ្លាស់ទៅក្លិបភ្នំពេញក្រោន តែលេងបានពាក់កណ្ដាលរដូវកាល ក៏ផ្ទេរទៅលេងឲ្យក្លិបណាហ្គាវើល ចាប់ពីឆ្នាំ២០១៥-២០១៨ មុនផ្ទេរមកកាន់ក្លិបបាល់ទាត់វិសាខា ដើម្បីត្រៀមរដូវកាលឆ្នាំ២០១៩។ យ៉ាងណាក្តីថ្នាក់ដឹកនាំក្លិបវិសាខា រំពឹងថា ម៉ាត់ណូរ៉ូទីន នឹងក្លាយជាផ្នែកមួយជួយឲ្យក្លិបសម្រេចគោលដៅនារដូវកាលឆ្នាំថ្មីខាងមុខ៕
Source: Kampuchea Thmey Daily
0 Comments