កម្ពុជា​ចូលរួម​ពិព័រណ៍​កិច្ច​សហប្រតិបត្តិការ​មេគង្គ​-​ឡាន​ឆាង ដើ​ម្បី​រឹតចំណង​សាមគ្គីភាព​ជាមួយ​ចិន និង​ប្រទេស​អនុតំបន់​ទន្លេមេគង្គ

គុន​មីង ៖ លោក ឈួន ដា​រ៉ា រដ្ឋលេខាធិការ​ក្រសួងពាណិជ្ជកម្ម បាន​ដឹកនាំ​គណៈប្រតិភូ​កម្ពុជា ចូលរួម​ពិព័រណ៍ "​កិច្ច​សហប្រតិបត្តិការ​មេគង្គ​-​ឡាន​ឆាង ឆ្នាំ​២០១៨ (2018 Lancang-Mekong Cooperation Exposition" នៅ​ទីក្រុង​គុន​មីង ប្រទេស​ចិន ចាប់ពី​ថ្ងៃទី​២៣ ដល់ ២៧ ខែវិច្ឆិកា ឆ្នាំ២០១៨​។



ពិព័រណ៍​នេះ ត្រូវបាន​សម្ពោធ​បើក​នៅ​ព្រឹក​ថ្ងៃទី​២៣ ខែវិច្ឆិកា ឆ្នាំ​២០១៨ ក្រោម​អធិបតីភាព លោក ជិន ហាវ (Chen Hao) អភិបាលខេត្ត​យូ​ណាន ក្នុង​គោលបំណង​ជំរុញ​ការនាំចេញ​នាំចូល និង​ដើម្បី​រឹតចំណង​កិច្ច​សហប្រតិបត្តិការ​រ​វាង​ប្រទេស​ចិន និង​ប្រទេស​អនុតំបន់​ទន្លេមេគង្គ​ដូចជា កម្ពុជា ឡាវ មី​យ៉ាន់​ម៉ា ថៃ និង​វៀតណាម​។



នៅក្នុង​ឱកាស​នោះ លោក ឈួន ដា​រ៉ា បាន​គូសបញ្ជាក់​ពី​សារៈសំខាន់​នៃ​កិច្ចសហប្រតិបត្តិការ​មេគង្គ​-​ឡាន​ឆាង ដែលជា​ផ្នែក​មួយ​នៃ​គំនិត​ផ្តួចផ្តើម​ខ្សែក្រវ៉ាត់ និង​ផ្លូវ ដើម្បី​ពង្រឹង​កិច្ច​សហប្រតិបត្តិការ​ក្នុង​តំបន់ និង​ពិភពលោក​។​លោក​រដ្ឋលេខាធិការ បាន​បន្ថែម​ទៀត​ថា នៅ​ក្រោម​ក្របខណ្ឌ​ខ្សែក្រវាត់ និង​ផ្លូវ បាន​រួម​ចំណែក​បង្កើត​គំរូ​ល្អ ក្នុង​ការ​កសាង​រចនា​សម្ព័ន្ធ​ថ្មី សម្រាប់​សហគមន៍​អន្តរជាតិ ដោយ​ធ្វើការ​សម្របសម្រួល និង​បង្កើត​វេទិកា​ថ្មី សម្រាប់​ពង្រឹង​សហ​ប្រតិបត្តិការ និង​ពន្លឿន​ការ​អភិវឌ្ឍ​ពាណិជ្ជកម្ម តាមរយៈ​ពាណិជ្ជកម្ម​អេឡិចត្រូនិក (E-commerce)​។



ទន្ទឹមគ្នា​នោះ​ដែរ លោក ឈួន ដា​រ៉ា ក៏បាន​ដឹក​គណប្រតិភូ​កម្ពុជា ចូលរួម​វេទិកា Dianchi ដែល​ប្រព្រឹត្តិ​ទៅ​ក្រោម​ប្រធានបទ “​ដើម្បី​ពន្លឿន​កិច្ច​សហប្រតិបត្តិការ​សេដ្ឋកិច្ច​ឆ្លងកាត់​ព្រំដែន (To accelerate interconnection-border economic cooperation) ដែលជា​ផ្នែក​មួយ​នៃ​ពិព័រណ៍​កិច្ច​សហប្រតិបត្តិការ​មេគង្គ​-​ឡាន​ឆាង​។ នៅក្នុង​វេទិកា​នោះ អង្គ​ប្រជុំ​បាន​ពិភាក្សា​អំពី​ការ​ធ្វើសមាហរណកម្ម និង​ការ​ដាក់ចេញ​នូវ​យុទ្ធសាស្ត្រ​ជាតិ ជាពិសេស​ទិសដៅ​ផែនការ​សកម្មភាព ដើម្បី​ជំរុញ​កិច្ច​សហប្រតិបត្តិការ Lancang-Mekong នៅតាម​ប្រទេស​អនុ​តំបន់​ទន្លេមេគង្គ​។



បន្ថែម​លើស​នោះ​ទៀត លោក ឈួន ដា​រ៉ា និង​គណៈប្រតិភូ បាន​អញ្ជើញ​ទស្សនា​ស្តង់​ពិព័រណ៍​កម្ពុជា ដែល​មាន​ក្រុមហ៊ុន​ចូលរួម​ចំនួន​១៤ និង​មាន​ស្តង់​ចំនួន ១៥ ដើម្បី​ដាក់​បង្ហាញ​ផលិតផល​ប្រើប្រាស់​ប្រចាំថ្ងៃ គ្រឿង​ចម្លាក់ គ្រឿងអលង្ការ សូត្រ​ប្រណិត និង​ក្រណាត់ ជាដើម​៕

Source: Kampuchea Thmey Daily