កញ្ឆាជិត៤.០០០ដើម ត្រូវសមត្ថកិច្ចបង្ក្រាប

ពោធិ៍សាត់ ៖ បទល្មើសកញ្ឆាជិត៤.០០០ដើម ត្រូវលោកអភិបាលខេត្តបញ្ជាឲ្យស្នងការបញ្ជូនកម្លាំងជំនាញនគរបាលសហការ នឹងកម្លាំងមូលដ្ឋាន ចុះបង្ក្រាបដល់ទីតាំង ខណៈពលរដ្ឋប្ដឹងពីបទល្មើសនេះ។ ការចុះបង្ក្រាបកញ្ឆាលូចដាំដោយខុសច្បាប់នេះ ធ្វើឡើងនៅព្រឹកថ្ងៃ០៧ ខែវិច្ឆិកា ឆ្នាំ២០១៨ ត្រង់ចំណុចទ្រូងខ្លា ស្ថិតនៅក្នុងភូមិតាំងគោក ឃុំតាលោ ស្រុកបាកាន ខេត្តពោធិ៍សាត់។

បើតាម លោកឧត្ដមសេនីយ៍ត្រី រស់ ប៊ុន ណាន ស្នងការរងទទួលបន្ទុកផ្នែកផែនបទល្មើសនេះបានឲ្យដឹងនៅមុននេះបន្តិចថា ក្រោយពេលលោកទទួលបញ្ជាពីលោកស្នងការនគរបាលខេត្តពោធិ៍សាត់ ដែលប្រជាជនរាយការណ៍ជូនលោកអភិបាល នៃគណៈអភិបាលខេត្តពោធិ៍សាត់ គឺមានជនខិលខូចបានលួចដាំកញ្ឆានៅទីតាំងខាងលើ។ ភ្លាមនោះ លោកបានដឹកនាំកម្លាំងនគរបាលជំនាញខេត្តចុះផ្ទាល់ សហការជាមួយកម្លាំងនគរបាលស្រុកបាកាន កម្លាំងរដ្ឋបាលប៉ុស្តិ៍ និងអាជ្ញាធរមូលដ្ឋាន ឃើញថាមានការលួចដាំដំណាំកញ្ឆាដោយខុសច្បាប់មួយកន្លែងនៅចំណុចខាងលើចំនួន១០កន្លែង មាន៧៩រង ស្មើនឹង៣៥៦៩ដើម ព្រមទាំងសម្ភារៈមួយចំនួន សមត្ថកិច្ចបានធ្វើកាប់បំផ្លាញ និងដុត កម្ទេចចោលនៅនឹងកន្លែងផងដែរ។

លោកស្នងការ រង រស់ ប៊ុនណាន រងបានបន្តថា តាមការសង្កេតមើលជាក់ស្ដែង គឺជនល្មើសបានលួចដាំកញ្ឆានេះ កឺជួលដីចម្ការ២កន្លែង នៅជាប់ព្រំដីចម្ការគ្នា ដោយប្រើរូបភាពដាំដំឡូងមីបិទបាំងបទល្មើស ហើយដាំកញ្ឆានៅតាមដីចន្លោះក្បែរដំឡូងមីនោះ ដោយការដាំនោះគេបានទទួលផលរៀបចំកាប់ដើមកញ្ឆាយកទៅលក់ហើយ តែយើងបង្ក្រាបទាន់ពេល។

លោកបានបញ្ជាក់ថា បើតាមការសាកសួររបស់សមត្ថកិច្ច ទៅលើម្ចាស់ដីឈ្មោះ នូវ នឿន ភេទប្រុស អាយុ៦២ឆ្នាំ រស់នៅភូមិថ្មី ឃុំតាលោ ស្រុកបាកាន ខេត្តពោធិ៍សាត់បានប្រាប់ឲ្យដឹងថា ការដាំកញ្ឆាជាច្រើនដើមនេះ គឺម្ចាស់ឈ្មោះ រី ភេទប្រុស រស់នៅខេត្តតាកែវ ជួលដីចម្ការនេះ ហើយជាអ្នកដាំ កញ្ឆានេះ ដោយមុនពេលសមត្ថកិច្ចចុះមកដល់ទីតាំងនេះគេបានរត់គេចខ្លួនបាត់តែម្ដង។

លោកស្នងការរងបានបន្ថែមថា កញ្ឆាជិត៤.០០០ដើមខាងលើ សមត្ថកិច្ចយើងបានដុតកម្ទេចចោលនឹងកន្លែង ដោយឡែកសម្ភារៈមួយចំនួនផ្នែកជំនាញយើងបានរៀបចំប្រមូលជាវត្ថុតាងកសាងសំណុំរឿងបញ្ជូនទៅតុលាការ និងធ្វើរបាយការណ៍ជូនលោកស្នងការដើម្បីរាយការណ៍ទៅលោកអភិបាលខេត្តពីលទ្ធផលបង្ក្រាបបទល្មើសនេះ៕