ភ្នំពេញ ៖ លោកទេសរដ្ឋមន្ត្រី អូស្មាន ហាស្សាន់ បានដឹកនាំប្រតិភូគណៈដឹកនាំជាន់ខ្ពស់ នៃសាសនាឥស្លាមកម្ពុជា រួមដំណើរដោយ លោក សុះ កំរ៉ី ចាងហ្វាងគណៈដឹកនាំជាន់ខ្ពស់នៃសាសនាឥស្លាមកម្ពុជា រួមជាមួយនឹងសមាជិក សមាជិកា រដ្ឋសភា រាជរដ្ឋាភិបាល សិស្សានុសិស្ស សរុបជាង ៤០០នាក់ទៅទស្សនកិច្ចសិក្សា ស្វែងយល់នៅវិមានឈ្នះឈ្នះ របស់សម្តេចតេជោ ហ៊ុន សែន ស្ថិតនៅសង្កាត់បាក់ខែង ខណ្ឌព្រែជ្រោយចង្វារ ដែលត្រូវបានទទួលស្វាគមន៍ ពីនាយឧត្តមសេនីយ៍ ណឹម សុវត្ថិ អនុប្រធានគណៈកម្មការសាងសង់ និងសហការី កាលពីថ្ងៃអង្គារ៦កើត ខែកត្តិក ឆ្នាំចសំរឹទ្ធិស័កព.ស២៥៦២ត្រូវនិងថ្ងៃទី១៣ វិច្ឆិកា ឆ្នាំ២០១៨។
លោក នាយឧត្ដមសេនីយ៍ ណឹម សុវត្ថិ បានបញ្ជាក់ថា វិមានឈ្នះ ឈ្នះ គឺជាសារមន្ទីរមគ្គុទ្ទេសក៍ នៃគោលនយោបាយឈ្នះឈ្នះ របស់សម្តេចតេជោ ហ៊ុន សែន ដែលសាងសង់នៅលើផ្ទៃដី ៨ហិកតា ហើយមានផ្ទៃបាតក្រោមរបស់វិមានផ្ទាល់មាន ទំហំ ៧០០០ម៉ែត្រក្រឡា ស្ថិតសង្កាត់បាក់ខែង ខណ្ឌជ្រោយចង្វារ រាជធានីភ្នំពេញ ទល់មុខពហុកីឡាដ្ឋានជាតិ មរតកតេជោ ប្រើរយៈពេលសាងសង់ជាង២ឆ្នាំ ដែលគ្រោងនឹងសម្ពោធជាផ្លូវការ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃទី២៩ ខែធ្នូ ឆ្នាំ២០១៨ ខាងមុខនេះ ដែលសម្តេចតេជោ នឹងរៀបចំពិធីបុណ្យយ៉ាងអធិកអធម ជូនជនរួមជាតិរយៈពេល៣ថ្ងៃ ៣យប់ គឺថ្ងៃទី ២៩-៣០-៣១ ខែធ្នូ ឆ្នាំ២០១៨។
លោកបន្ដថា វិមានឈ្នះឈ្នះ គឺជាការផ្តួចផ្តើមគំនិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលលោកមានទស្សនវិជ្ជាធំធេងបំផុត ក្នុងនយោបាយឈ្នះឈ្នះ នេះ ហើយក៏ផ្អែកទៅតាមឯកសារនយោបាយឈ្នះឈ្នះ។
អ្វីដែលមានលក្ខណៈកាន់តែពិសេស ទៅទៀតនោះ នៅទីនេះ សប្បាយរីករាយបំផុត ក្នុងទស្សនៈគោលនយោបាយឈ្នះឈ្នះ របស់សម្តេចតេជោ ហ៊ុន សែន គឺបានបង្កប់នូវព្រលឹងមួយដ៏ធំធេងបំផុត គឺជាព្រលឹងនៃការធានាបាននូវការធ្វើឲ្យមានសុខដុមបនីយកម្មសាសនា និងសង្គមជាតិទាំងមូល។
ជាក់ស្តែង ក្លោងទ្វាររបស់វិមានឈ្នះឈ្នះ គឺជាក្លោងទ្វារជ័យរបស់យើងទាំងអស់គ្នា ដែលមានចម្លាក់មិនធ្លាប់មានទេក្នុងប្រវត្តិសាស្ត្រ គឺជាចម្លាក់រូបសញ្ញានៃសុខដុមបនីយកម្មសាសនា ដែលមានចម្លាក់សញ្ញានៃសាសនា ព្រះពុទ្ធនៅកណ្តាល ជាសាសនារបស់រដ្ឋ អមសងខាងដោយសាសនាឥស្លាម និងសាសនាគ្រិស្ត ដែលត្រូវបានសិក្សាយ៉ាងម៉ត់ចត់ ល្អិតល្អន់បំផុតពីបុព្វជិកសាសនា នីមួយៗ រហូតទទួលបាននូវការចម្លាក់នូវសញ្ញាសាសនាទាំងបីក្រោមម្លប់សុខដុមនីយកម្ម តំណាង ឲ្យវិមានឈ្នះឈ្នះនេះ។ នៅតាមជញ្ជាំង ជាន់ផ្ទាល់ដី ជុំវិញបរិវេណវិមានឈ្នះ-ឈ្នះ មានរូបចម្លាក់ ទាក់ទងទៅនឹងប្រវត្តិនៃដំណើរឆ្ពោះទៅការផ្ដួលរំលំរបបប្រល័យពូជសាសន៍ប៉ុលពត ថ្ងៃទី២០ ខែមិថុនា ឆ្នាំ១៩៧៧ របស់សមមិត្ត ហ៊ុន សែន និងសមមិត្តមួយចំនួនទៀត ទៅកាន់ប្រទេសវៀតណាម ដើម្បីសង្គ្រោះជាតិកម្ពុជា។
លោកក៏បានបន្តថា ក្នុងរយៈពេលកន្លងមកនេះ ក្រុមការងារសាងសង់ និងស្ថាប័នពាក់ព័ន្ធទាំងអស់ បានកំពុងខិតខំធ្វើយ៉ាងណាស្វែងរកឯកសារពាក់ព័ន្ធបន្ថែមទៀត ដើម្បីយកមកដាក់តាំងបង្ហាញ នៅក្នុងវិមានក្នុងគោលបំណងទុកឲ្យក្មេងៗ ជំនាន់ក្រោយសិក្សាស្រាវជ្រាវ អំពីប្រវត្តិសាស្ត្រពិតរបស់កម្ពុជា។
លោក អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស បានលើកឡើងថា ការទស្សនកិច្ចសិក្សាមកកាន់វិមានឈ្នះឈ្នះរបស់ប្រតិភូគណៈដឹកនាំជាន់ខ្ពស់ ថ្នាក់ដឹកនាំឥស្លាម និងសិស្សានុសិស្ស គឺជាការបង្ហាញនូវការគាំទ្រយ៉ាងពេញទំហឹង ចំពោះគោលនយោបាយឈ្នះឈ្នះរបស់រាជរដ្ឋាភិបាល ក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន ហើយនេះជាមោទនភាពដែលមិនអាចកាត់ថ្លៃបាន ដែលប្រជាជាតិទាំងមូល រួមទាំងសហគមន៍ខ្មែរឥស្លាម បានទទួលផលលើសលប់ពីគោលនយោបាយឈ្នះឈ្នះរបស់គណបក្សប្រជាជន ដែលលោកបានពលីលះបង់ជីវិតឈាមស្រស់ ដើម្បីនាំនូវភាពជ័យជំនះ គឺជាការឈ្នះរបស់យើងទាំងអស់គ្នា ជាប្រជាជាតិខ្មែរ និងតកូនតចៅទៅ ជំនាន់ក្រោយទៀត គ្មាននរណាដែលមិនឈ្នះនោះទេ។
ក្នុងនាមសហគមន៍ខ្មែរឥស្លាម លោក អូស្មាន ហាស្សាន់ ក៏បានផ្តាំផ្ញើ ដល់សហគមន៍ របស់លោកថា ផ្អែកលើគោលការណ៍នៃសាសនាឥស្លាម សូមបងប្អូន បន្តចូលរួមសហការគ្នា ថែរក្សាឲ្យបានគង់វង្ស នូវកេរ្តិ៍ដំណែលសុខដុមនីយកម្មដ៏ឧត្តុង្គឧត្តមជាប្រវត្តិសាស្ត្រនេះ ឲ្យបន្តនៅជាប់ជានិច្ចនិរន្តន៍ ដែលជាការចូលរួមគោរពដឹងគុណនូវគុណូបការៈដ៏ថ្លៃថ្លា របស់សម្តេចអគ្គមហាសេនាបតីតេជោ ហ៊ុន សែន និងជាវីរជនស្នេហាជាតិរបស់គណបក្សប្រជាជនកម្ពុជា ដរាប៕
Source: Kampuchea Thmey Daily
0 Comments