ភ្នំពេញ ៖ មន្ទីរធនធានទឹក និងឧតុនិយមខេត្ត បានបញ្ចេញម៉ាស៊ីនបូមទឹកចល័តចំនួន ១២ គ្រឿង និងប្រេងឥន្ធនៈមួយចំនួន ដើម្បីដាក់នៅលើទីតាំងចំនួន ០៥ កន្លែង នៅតាមបណ្តោយប្រឡាយមេស្ទឹងជីនិតខាងត្បូង ដែលមានចម្ងាយប្រវែង ១៧ គីឡូ ម៉ែត្រ ពីប្រភពទឹក ដល់ទីតាំងស្រូវដែលត្រូវការទឹក ។
ក្រសួងបានឲ្យដឹងថា កាលពីរសៀលថ្ងៃសៅរ៍ ២ រោច និងថ្ងៃអាទិត្យ ៣ រោច ខែកត្តិក ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ២៤ និងទី ២៥ ខែវិច្ឆិកា ឆ្នាំ ២០១៨ លោក ប៊ុន ហ៊ាន រដ្ឋលេខាធិការ ក្រសួងធនធានទឺក និងឧតុនិយម អមដំណើរដោយ មន្ត្រីបច្ចេកទេសរបស់ក្រសួង និងមានការចូលរួមពីប្រធានមន្ទីរធនធានទឹក និងឧតុនិយមខេត្តកំពង់ធំ បាន និងកំពុងបន្តចុះត្រួតពិនិត្យដំណាំស្រូវដែលរងផលប៉ះពាល់ពីការខ្វះទឹកនៅក្នុងស្រុកបារាយណ៍ និងស្រុកកំពង់ស្វាយ នៃខេត្តកំពង់ធំ។ ដោយទឹកជំនន់ក្នុងឆ្នាំនេះ មានសភាពធំជាងឆ្នាំមុនៗ ហើយល្បឿនទឹកស្រក លឿនជាងឆ្នាំកន្លងមក បង្កឲ្យមានការប៉ះពាល់ដល់ការងារបង្កបង្កើនផលស្រូវចុងរដូវវស្សា និងស្រូវប្រាំងប្រដេញទឹកក្នុងឆ្នាំនេះ។
តាមការចុះពិនិត្យជាក់ស្តែង ផ្ទៃដីស្រូវដែលរងផលប៉ះពាល់ដោយសារការខ្វះខាតទឹក មានចំនួន ៣.០២៥ ហិកតា ស្ថិតក្នុងភូមិចំនួន ១៣ និងឃុំចំនួន ៣ របស់ស្រុកបារាយណ៍ ដែលមានផ្ទៃដីប៉ះពាល់ចំនួន ១.៩២៥ ហិកតា និងស្ថិតក្នុងភូមិ ចំនួន ៥ និងឃុំ ចំនួន ១ នៃស្រុកកំពង់ស្វាយ ដែលមានផ្ទៃដីប៉ះពាល់ចំនួន ១.១០០ ហិកតា។
បច្ចុប្បន្ននេះ មន្ទីរធនធានទឹក និងឧតុនិយមខេត្តកំពង់ធំ ដោយមានការចូលរួមពីអាជ្ញាធរ និងសហគមន៍កសិករនៅតាមមូលដ្ឋាន បាននឹងកំពុងធ្វើការបូមទឹកសង្គ្រោះស្រូវនៅតាមទីតាំងដែលកំពុងខ្វះខាតទឹកខាងលើ។
ក្រសួងធនធានទឹកបានឲ្យដឹងថា មន្ទីរធនធានទឹក និងឧតុនិយមខេត្ត បានបញ្ចេញម៉ាស៊ីនបូមទឹកចល័តចំនួន ១២ គ្រឿង និងប្រេងឥន្ធនៈមួយចំនួន ដើម្បីដាក់នៅលើទីតាំងចំនួន ០៥ កន្លែង នៅតាមបណ្តោយប្រឡាយមេស្ទឹងជីនិតខាងត្បូង ដែលមានចម្ងាយប្រវែង ១៧ គម ពីប្រភពទឹក ដល់ទីតាំងស្រូវដែលត្រូវការទឹក។ មកទល់ពេលនេះ ការងារអន្តរាគមន៍សង្គ្រោះស្រូវលើផ្ទៃដីចំនួន ៣៥០ ហិកតា ស្ថិតក្នុងឃុំទ្រាល និងផ្ទៃដីចំនួន ៤៧៥ ហិកតា ស្ថិតក្នុងឃុំស្រឡៅ ព្រមទាំងផ្ទៃដីចំនួន ៦៥០ ហិកតា លើផ្ទៃដីសរុបចំនួន ១.១០០ ហិកតា ស្ថិតក្នុងឃុំពង្រ នៃស្រុកបារាយណ៍ ត្រូវបានសង្គ្រោះ ហើយការងារអន្តរាគមន៍កំពុងបន្តលើផ្ទៃដីដាំដុះដែលនៅសល់។
ដោយឡែក ផ្ទៃដីស្រូវចំនួន ១.១០០ ហិកតា ដែលប៉ះពាល់ដោយសារការខ្វះខាតទឹកនៅក្នុងស្រុកកំពង់ស្វាយ ត្រូវបានមន្ទីរធនធានទឹក និងឧតុនិយមខេត្តកំពង់ធំ សង្គ្រោះបានប្រមាណ ៩០%។
ក្រសួង បន្តថា បើទោះបីជាអាជ្ញាធរខេត្ត ស្រុក និងឃុំ បានធ្វើការផ្សព្វផ្សាយអំពីការព្យាករណ៍អាកាសធាតុរបស់ក្រសួងធនធានទឹក និងឧតុនិយម ស្តីពី បរិមាណទឹកភ្លៀងនៅដើមឆ្នាំ ២០១៩ មាន ការធ្លាក់ចុះ ដោយពុំមានភ្លៀងកក់ខែក៏ដោយ ក៏កសិករនៅតែបន្តសកម្មភាពដាំដុះស្រូវ ដោយមិនបានបារម្ភពីការខ្វះខាតទឹកដែលនាំធ្វើឲ្យខូចខាតដល់ដំណាំស្រូវឡើយ។
ជាមួយគ្នានេះ លោក ប៊ុន ហ៊ាន បានណែនាំដល់មន្ទីរធនធានទឹក និងឧតុនិយមខេត្ត ឲ្យបន្តយកចិត្តទុកដាក់ តាមដានស្ថានភាពទឹក ព្រមទាំងត្រៀមម៉ាស៊ីនបូមទឹក និងសំភារៈផ្សេងៗ សម្រាប់ជួយសង្គ្រោះស្រូវចុងរដូវវស្សា និងស្រូវប្រាំងប្រដេញទឹក ព្រមទាំងជូនដំណឹងដល់ប្រជាកសិករអំពីបញ្ហាដែលពុំមានភ្លៀងកក់ខែនៅក្នុងរដូវប្រាំងខាងមុខនេះ ដែលខុសប្លែកពីឆ្នាំមុនៗកន្លងមក៕
Source: Kampuchea Thmey Daily
0 Comments