ភ្នំពេញ ៖ រយៈពេល ០២ថ្ងៃ គឺ ថ្ងៃទី២៦ និង២៧ ខែវិច្ឆិកា ឆ្នាំ២០១៨ កម្លាំងល្បាតអាវុធហត្ថរាជធានីភ្នំពេញ បានធ្វើការឃាត់ខ្លួនជនសង្ស័យប្រុសស្រីចំនួន០៨នាក់ ជាបន្តបន្ទាប់ ផ្សេងៗគ្នា ពាក់ព័ន្ធករណីគ្រឿងញៀន រួមនឹងដកហូតបានក្រាមពណ៌សថ្លា ៣៣កញ្ចប់(ប្រភេទម៉ាទឹកកក) នៅពីរចំណុចទីតាំងផ្សេងគ្នាក្នុងភូមិសាស្ត្ររាជធានីភ្នំពេញ។
មន្ត្រីអាវុធហត្ថរាជធានីបានឲ្យដឹងថា ពួកជនសង្ស័យទាំង ០៨នាក់ ដែលកម្លាំងអាវុធហត្ថឃាត់ខ្លួននេះមានទី១/ ឈ្មោះ គង់ រ៉ានី ភេទស្រី អាយុ២៣ឆ្នាំ ,ទី២/ ឈ្មោះ ធូ តុង ភេទប្រុស អាយុ ១៨ឆ្នាំ ,ទី៣/ ឈ្មោះ ឡាង សំណាប់ ភេទប្រុស អាយុ៣១ឆ្នាំ ត្រូវបានកម្លាំងមូលដ្ឋានអាវុធហត្ថខណ្ឌពោធិ៍សែនជ័យ សហការជាមួយសមត្ថកិច្ចជំនាញនៃការិយាល័យស្រាវជ្រាវបទល្មើសគ្រឿងញៀន កងរាជអាវុធហត្ថរាជធានីភ្នំពេញ ឃាត់ខ្លួនបានកាលពីវេលាម៉ោង១៧និង០០នាទី ចំណុចលើផ្លូវបេតុង ភូមិត្រាញ់ត្របាញ់ សង្កាត់ភ្លើងឆេះរទេះ និងផ្ទះគ្មានលេខ ផ្លូវបេតុង ភូមិត្រាញ់ត្របាញ់ សង្កាត់ភ្លើងឆេះរទេះ ខណ្ឌពោធិ៍សែនជ័យ រាជធានីភ្នំពេញ។
ទី៤/ ឈ្មោះ ឡេ ឡុងញូ ភេទប្រុស អាយុ១៤ឆ្នាំ ,ទី៥/ ឈ្មោះ យ៉ វណ្ណធី ភេទប្រុស អាយុ២១ឆ្នាំ ,ទី៦/ ឈ្មោះ មុំ សុជា ហៅអាម៉ៅ ភេទប្រុស អាយុ៣៥ឆ្នាំ ,ទី៧/ ឈ្មោះ រ៉ុង ពៅ ហៅហេង ភេទប្រុស អាយុ ២៤ឆ្នាំ ,ទី៨/ ឈ្មើ មុំ ស្រីមុំ ភេទស្រី អាយុ ៣០ឆ្នាំ ត្រូវបានកម្លាំងល្បាតមូលដ្ឋានអាវុធហត្ថខណ្ឌច្បារអំពៅ ឃាត់ខ្លួនបានកាលពីវេលាម៉ោង០៩និង៥៤នាទី ចំណុចផ្ទះគេទុកចោល ម្តុំសហគមន៍ស្មសាន ភូមិដើមស្លែង១ សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ។
ប្រភពបន្តថា បច្ចុប្បន្នពួកគេទាំង០៨នាក់ ខាងលើត្រូវបានសមត្ថកិច្ចជំនាញនៃការិយាល័យស្រាវជ្រាវបទល្មើសគ្រឿងញៀន កងរាជអាវុធហត្ថរាជធានីភ្នំពេញ កំពុងធ្វើការសួរចម្លើយ និងកសាងសំណុំរឿងបញ្ជូនទៅតុលាការ ដើម្បីចាត់ការតាមច្បាប់ក្រោយពីការសាកសួររួចមក៕
Source: Kampuchea Thmey Daily
0 Comments