ភ្នំពេញ ៖ កាលពីរសៀលថ្ងៃទី២៧ ខែវិច្ឆិកានេះ សប្បុរសជននៅសង្កាត់ច្បារអំពៅទី១ ខណ្ឌច្បារអំពៅ រាជធានីភ្នំពេញ បានអនុញ្ញាតឲ្យភ្នាក់ងារកម្ពុជាថ្មីយកថវិកាចំនួន២០០ដុល្លារផ្តល់អ្នករត់ម៉ូតូឌុបម្នាក់ដែលកំពុងសម្រាកក្នុងមន្ទីរពេទ្យហើយមានការខ្វះខាតជីវភាពទៀតផង។
សប្បុរសជនបានមានប្រសាសន៍ថា ពេលបានទទួលដំណឹងថា មានបុរសរត់ម៉ូតូឌុបម្នាក់ឈ្មោះឆែ ឈឺន អាយុ៤៦ឆ្នាំ កំពុងសម្រាកព្យាបាលជំងឺក្នុងមន្ទីរពេទ្យសម្តេចឪដោយមានជំងឺរលាកបំពង់ក ដុះសាច់លំពែង រលាកថ្លើមនិងខ្វះខាតឈាម ព្រោះអ្នកជំងឺចេះតែខ្សោយទៅៗ។
ពេលទទួលដំណឹងគួរឲ្យអាណិតអាសូរនេះ សប្បុរសជននៅច្បារអំពៅក៏បានអនុញ្ញាតឲ្យតំណាងរបស់គាត់យកថវិកាទៅផ្តល់ដល់ដៃភ្លាមៗ ព្រោះឮថា គ្រួសាររបស់គាត់រស់ដោយសារតែរបររត់ម៉ូតូឌុប ហើយអ្នកចំណូលកំពុងមានជំងឺធ្ងន់បែបនេះតើកូនចៅនិងប្រពន្ធកូនទៅទីពឹងអ្នកណា?
ដូច្នេះហើយទើបរួសរាន់ផ្តល់ថវិកាជូនដល់អ្នកជំងឺ ដើម្បីយកទៅទិញថ្នាំនិងស្វែងរកឈាមយកមកបញ្ចូលមុនធ្វើការវះកាត់។ ពេលទទួលអំណោយពីសប្បុរសជនរួចមក ភរិយាលោកពូឆែ ឈឺន បានលើកដៃសំពះថ្លែងអំណរគុណដល់សប្បុរសជននៅច្បារអំពៅដែលបានផ្តល់ថវិកាដល់ប្តីរបស់គាត់ដែលកំពុងសម្រាកព្យាបាលជំងឺធ្ងន់ធរហើយខ្វះខាតថវិកាសម្រាប់ទិញឈាមយកមកបញ្ចូលមុនធ្វើការវះកាត់។
ហើយគុណរបស់សប្បុរសជននៅច្បារអំពៅដែលបងស្រីអត់ស្គាល់មុខសោះ បែរជាមកជួយដល់គ្រួសារបងស្រីសម្រាប់ដោះស្រាយសព្វបែបយ៉ាងនេះ។ នេះគឺជាសណ្តានចិត្តដ៏ល្អកម្រមានណាស់៕
Source: Kampuchea Thmey Daily
0 Comments