ភ្នំពេញ ៖ នៅវេលាម៉ោង៧ព្រឹក ថ្ងៃទី២៨វិច្ឆិកានេះ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានអញ្ជើញជួបសំណេះសំណាលជាមួយកម្មករ និយោជិក សរុបប្រមាណ១៧.៩១២នាក់ មកពីរោងចក្រសហគ្រាសចំនួន១២ នៅក្នុងខេត្តកណ្តាល។ ពិធីសំណេះសំណាលនេះបានធ្វើឡើងនៅភូមិក្រាំងស្បូវ ឃុំព្រះពុទ្ធ ស្រុកកណ្ដាលស្ទឹង ខេត្តកណ្តាល។
រោងចក្រសហគ្រាសទាំង១២ ត្រូវបានវិនិយោគដោយអ្នកវិនិយោគមកពីប្រទេសចិនចំនួន១០ និងខ្មែរចំនួន២។ រោងចក្រទាំងនេះមានរោងចក្រកាត់ដេរសំលៀកបំពាក់ចំនួន៥,ផលិតស្បែកជើងចំនួន១,ផលិតបាតស្បែកជើងចំនួន១,បោះពុម្ពលើសំលៀកបំពាក់ចំនួន២,ផលិតដែកសំណង់ចំនួន១ និងផលិតបារីចំនួន២។ ផលិតផលផលិតចេញពីរោងចក្រទាំងនេះ ត្រូវបាននាំចេញទៅកាន់ទីផ្សារអន្តរជាតិ និងផ្គត់ផ្គង់នៅទីផ្សារក្នុងប្រទេសផងដែរ។
បច្ចុប្បន្ន ខេត្តកណ្ដាលមានរោងចក្រសហគ្រាស គ្រឹះស្ថានចំនួន៤៦៤ មានកម្មករនិយោជិកចំនួន ១៥៥.១៣៨នាក់ ដែលមានប្រាក់ឈ្នួល សរុបប្រមាណ៣៧២លានដុល្លារ។ ក្នុងនោះរោងចក្រកាត់ដេរសំលៀកបំពាក់ និងផលិតស្បែកជើងចំនួន១៧០ មានកម្មករនិយោជិកចំនួន១៣៧.៦៦៤នាក់ ដែលមានប្រាក់ឈ្នួលសរុបជាង៣៣០លានដុល្លារក្នុងមួយឆ្នាំ។
សូមបញ្ជាក់ថា ដើម្បីជំរុញវិស័យឧស្សាហកម្មឲ្យមានសន្ទុះទៅមុខកាន់តែខ្លាំងក្លានោះ សម្ដេចតេជោ ហ៊ុន សែន បានចាប់ផ្ដើមចុះជួបសំណេះសំណាលដោយផ្ទាល់ជាមួយកម្មករកម្មការិនី តាំងពីថ្ងៃទី ២០ ខែសីហា ឆ្នាំ២០១៧។
រយៈពេលជាងមួយឆ្នាំនេះ សម្ដេចតេជោ ហ៊ុន សែន បានអញ្ជើញជួបជាមួយកម្មករ និយោជិក សរុបចំនួន៥៩លើក ដែលមានអ្នកចូលរួមសរុប៨៤១.៩៤៦នាក់។
សម្រាប់ខេត្តកណ្ដាលវិញ សម្ដេច តេជោ ហ៊ុន សែន បានអញ្ជើញជួបសំណេះសំណាលចំនួន៨ លើកហើយ គិតទាំងថ្ងៃទី២៨ ខែវិច្ឆិកា ឆ្នាំ២០១៨ស្អែកនេះ៕
Source: Kampuchea Thmey Daily
0 Comments