ភ្នំពេញ ៖ ជនជាតិវៀតណាមម្នាក់ ត្រូវបានកម្លាំងប្រចាំការក្នុងផ្សារធំថ្មី ចាប់ឃាត់ខ្លួនភ្លាមៗ ខណៈដែលចូលបន្លំលួចកាបូបលុយរបស់អ្នកលក់ខោរអាវនៅក្នុងផ្សារ តែគេចខ្លួនមិនរួច ព្រោះជនរងគ្រោះឃើញទាន់ស្រែកឆោឡោកាលពីវេលាម៉ោង១៥និង៣០នាទី ថ្ងៃទី១០ ខែវិច្ឆិកា ឆ្នាំ២០១៨ ស្ថិតនៅចំណុចក្នុងទីរួមផ្សារធំថ្មីមុខតូបលក់ខោអាវលេខI044 ផ្លូវលេខ១៣៦ ភូមិ៤ សង្កាត់ផ្សារថ្មីទី១ ខណ្ឌដូនពេញ រាជធានីភ្នំពេញ។
សមត្ថកិច្ចបានឲ្យដឹងថា ជនសង្ស័យដែលឃាត់ខ្លួននេះ ឈ្មោះ ង្វៀង វ៉ាន់ហ្វៀវ (NGUYEN VAN HIEV) ភេទប្រុស អាយុ៤១ឆ្នាំ ជនជាតិវៀតណាម មុខរបរ និងទីលំនៅមិនពិតប្រាកដ កាន់លិខិតឆ្លងដែនលេខC3118974។
ចំណែកវត្ថុតាងចាប់យកមាន ៖ កាបូបយួរពណ៌សូកូឡាចំនួន០១ មានលុយចំនួន៥០០.០០០រៀល.ទូរស័ព្ទដៃម៉ាកHUWEI ពណ៌ទឹកមាស(បានប្រគល់ឲ្យជនរងគ្រោះវិញ) ,កាបូបស្ពាយពណ៌សូកូឡាចំនួនមួយ មានខោអាវ និងមានលិខិតឆ្លងដែនវៀតណាមមួយក្បាលលេខ C3118974(ជារបស់ជនសង្ស័យ)។
ជនរងគ្រោះ ឈ្មោះ ធី សាអ៊ី ភេទស្រី អាយុ៤៩ឆ្នាំ ជនជាតិខ្មែរ មុខរបរលក់ខោផ្សារធំថ្មី ស្នាក់នៅផ្ទះលេខ៤៥ ផ្លូវលេខ១បេ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
ប្រភពព័ត៌មានបានឲ្យដឹងថា មុនពេលកើតហេតុ ជនសង្ស័យបានដើរចូលទៅក្នុងបរិវេណផ្សារធំថ្មីដល់កន្លែងតូបកើតហេតុ ខណៈឃើញជនរងគ្រោះកំពុងតែដេកមានកាបូបលុយនៅក្បែរខ្លួន ជាឱកាសល្អ ក៏ទៅលួចយកពេលដើរចេញគាប់ជនរងគ្រោះដឹងខ្លួនទាន់ បានស្រែកឆោឡោក៏ត្រូវជាប់អន្ទាក់របស់កម្លាំងប្រចាំការផ្សារធំថ្មីតែម្ដង។
បច្ចុប្បន្ន សមត្ថកិច្ច កំពុងប្រើប្រាស់វិធានការជំនាញសួរចម្លើយ បន្តរកបក្ខពួក ព្រមទាំងប្រវត្តិសកម្មភាពប្រព្រឹត្តបទល្មើសកន្លងមក។
ចំណែកឯទិសដៅបន្ត គឺកសាងសំណុំរឿងតាមនីតិវិធី ដើម្បីបញ្ជូនជនសង្ស័យទៅសាលាដំបូងរាជធានីភ្នំពេញចាត់ការតាមផ្លូវច្បាប់៕
Source: Kampuchea Thmey Daily
0 Comments