ប្រដាល់ ៖ អ្នកប្រដាល់ជើងខ្លាំងកម្ពុជ ឃុន ឌីម៉ា ក្លិបរស្មីភូមិគាបខេត្តបន្ទាយមានជ័យ បានប្រកួតឈ្នះអ្នកប្រដាល់ថៃ Khum Phit ដោយពិន្ទុ នៅក្នុងការជួបគ្នាលើសង្វៀនSEATV កាលពី រសៀលថ្ងៃទី១០ ខែវិច្ឆិកា ឆ្នាំ២០១៨។
Khum Phit គេវាយចាញ់ ឃុន ឌីម៉ា ដាច់តែម្ដង គឺ៥សូន្យ។ Khum Phit ប៊ិះតែសន្លប់នៅក្នុងការប្រកួតទឹកទី១ បន្ទាប់ពី ឃុន ឌីម៉ា វាយកែងត្រូវគល់ថ្គាមមួយកែងយ៉ាងដំណំ ប៉ុន្តែដោយសារ Khum Phit គេមានស្មារតីរឹងមាំនោះ ក្រោយពីអាជ្ញាកណ្ដាលរាប់គេដល់០៨ គេ ក៏បន្តការប្រកួតទៀត ហើយបានប្រកួតរហូតដល់ចប់ទឹក០៥ និងចាញ់ ឃុន ឌីម៉ា ត្រឹមពិន្ទុប៉ុណ្ណោះ។
អ្នកប្រដាល់ថៃរូបនេះ ធ្លាប់មកប្រកួតនៅស្រុកខ្មែរ០៣លើក ទាំងលើកនេះ ដែលមកលើកទី០១ គេវាយស្មើពិន្ទុជាមួយ ឡៅ ចន្ទ្រា អ្នកប្រដាល់ក្លិបកងពលតូចទ័ពឆ័ត្រយោង៩១១(០៦តុលា) និងមកលើកទី០២ វាយចាញ់ពិន្ទុ មឿន សុខហ៊ុច អ្នកប្រដាល់ក្លិបពុទ្ធសេរីវង្សកីឡាដោយពិន្ទុ (២៧តុលា២០១៨) ហើយលើកទី០៣នេះ គេចាញ់ ឃុន ឌីម៉ា ដោយពិន្ទុទៀត។
ចំពោះ យុគ យក្សផ្លែ អ្នកប្រដាល់ក្លិបបូរីរាជសីហ៍មានរិទ្ធ គេបានសងសឹកអ្នកប្រដាល់ថៃចំណូលថ្មីឈ្មោះ Oup Sai បានសម្រេច ក្រោយពីគេបានផ្ដួលOup Sai ឲ្យចុះចាញ់ក្នុងទឹកទី៣ ដោយកណ្ដាប់ដៃនោះ។
កាលពីជួបគ្នាលើកមុន(០៦តុលា២០១៨)យក្សផ្លែវាយចាញ់ Oup Sai ដោយពិន្ទុ តែលើកនេះ យក្សផ្លែ គេសងសឹកយកទាំងការទាំងដើមវិញហើយ។
Oup Sai ដែលប្រកួតក្នុងប្រភេទទម្ងន់៥៧គ.ក្រ បានត្រូវ យុគ យក្សផ្លែ វាយឲ្យអាជ្ញាកណ្ដាលរាប់០៨ ដល់ទៅពីរដង គឺក្នុងទឹកទី០២ម្ដង និងក្នុងទឹកទី០៣ម្ដង បន្ទាប់មកក៏ត្រូវអាជ្ញាកណ្ដាលបញ្ឈប់លែងឲ្យប្រកួតតែម្ដង។
ដោយឡែក ការប្រកួតរវាងអ្នកប្រដាល់រួមជាតិវិញ សុខ សុវណ្ណ អ្នកប្រដាល់ក្លិបកងពលធំអន្តរាគមន៍លេខ០២ នៃសមាគមកីឡាប្រដាល់ក្រសួងការពារជាតិ បានវាយឈ្នះ សូត្រ ខេវិន អ្នកប្រដាល់ក្លិបបក្សីស្លាបដែកដោយពិន្ទុ។ ពីរនាក់នេះ ជួបគ្នាក្នុងប្រភេទទម្ងន់៦០គីឡូក្រាម។
ចំណែក ប្រាក់ ស៊ីណាត អ្នកប្រដាល់ក្លិបតាឯកដំបងដែកមានរិទ្ធខេត្តព្រៃវែង បានត្រូវ សល់ ស្រស់ អ្នកប្រដាល់ក្លិបសាលវ័ន្តកីឡា វាយសន្លប់ក្នុងទឹកទី០២ ដោយស្នៀតជង្គង់។
-Loom Leng សងសឹក ឡុង សំណាងមិនបាន ឯ វ៉ែន សុវណ្ណ ផ្ដួលអ៊ីរ៉ង់ Akbari Keramat ក្នុងទឹកទី០១
អ្នកប្រដាល់ថៃLoom Leng ដែលឡើងមកសងសឹកជាមួយ ឡុង សំណាង អ្នកប្រដាល់កម្ពុជា នៃក្លិបសាលវ័ន្តកីឡា កាលពីយប់ថ្ងៃទី១០ ខែវិច្ឆិកា ឆ្នាំ២០១៨ នៅលើសង្វៀនGanzberg Top Fighter របស់SEATV នោះ គឺពុំបានសម្រេចនោះឡើយ ដោយប្រកួតចាញ់ ឡុង សំណាង ដោយពិន្ទុទៀត។ ពីរនាក់នេះ ប្រកួតគ្នាក្នុងប្រភេទទម្ងន់៦៣,៥០០គីឡូក្រាម។
Loom Leng ជាអ្នកប្រដាល់ជើងចាស់ និងជាម្ចាស់ខ្សែក្រវាត់ខារ៉ាបាវទម្ងន់៦៣,៥០០គ.ក្រ ដែលវាយបាននៅស្រុកខ្មែរ ហើយក៏ធ្លាប់មកប្រកួតនៅស្រុកខ្មែរច្រើនលើកដែរកន្លងមក។ ក្នុងនោះគេបានវាយចាញ់ ឡុង សំណាង ដោយពិន្ទុកាលពីចុងឆ្នាំ២០១៧ ធ្វើឲ្យគេមិនអស់ចិត្ត ទើបសុំសងសឹកសំណាងវិញនេះ ប៉ុន្តែ Loom Leng បានបរាជ័យ។
ចំពោះ វ៉ែន សុវណ្ណ អ្នកប្រដាល់ក្លិបកងកេងមានរិទ្ធខេត្តបាត់ដំបង បានផ្ដួលអ្នកប្រដាល់អ៊ីរ៉ង់ អេកបារៀ គីរ៉ាម៉េត (Akbari Keramad ) ឲ្យបោះបង់ការប្រកួតក្នុងទឹកទី០១។
វ៉ែន សុវណ្ណ និង អេកបារៀ គីរ៉ាម៉េត ប្រកួតគ្នាក្នុងទម្ងន់៦៩គីឡូក្រាម។ អ្នកប្រដាល់អ៊ីរ៉ង់ អេកបារៀ គីរ៉ាម៉េត នេះ សន្លប់ដោយសារកណ្ដាប់ដៃរបស់ យក្សផ្លែ។ ជើងថ្មីអ៊ីរ៉ង់រូបនេះ មានប្រវត្តិលើរេញ តែ១៤លើកប៉ុណ្ណោះ ក្នុងនោះវាយឈ្នះ១១លើក ចាញ់០៣លើក មិនដែលស្មើ។
-ជម្រុះដណ្ដើមប្រាក់លានទម្ងន់៦៥គ.ក្រ ៖ គឿម សុវណ្ណឌឿត ចាញ់ គួនសុវណ្ណ , សៅ ប៊ុនធឿន ឈ្នះ លីន វណ្ណៈ។
ព្រឹត្តិការណ៍ប្រកួតប្រដាល់ជម្រុះដណ្ដើមប្រាក់១០លានរៀល របស់ក្រុមហ៊ុនស្រាបៀGanzberg ក្នុងប្រភេទទម្ងន់៥៤គីឡូក្រាម នៅលើសង្វៀនទូរទស្សន៍អាស៊ីអាគ្នេយ៍ កាលពីយប់ថ្ងៃសៅរ៍ ទី១០ ខែវិច្ឆិកា ឆ្នាំ២០១៨ ដែលជាការប្រកួតសប្ដាហ៍ទី២ នេះ ដែលមាន២គូ នោះ គឺគឿម សុវណ្ណឌឿត ក្លិបមោងឬស្សីមរតកគុនខ្មែរ ប្រកួតចាញ់ គួន សុវណ្ណៈ ក្លិបយុវវាលស្បូវខណ្ឌច្បារអំពៅ ក្នុងទឹកទី០៤ ហើយសៅ ប៊ុនធឿន ក្លិបតាព្រហ្មមានជ័យ បានផ្ដួល លីន វណ្ណៈ ក្លិបបូរីរាជសីហ៍មានរិទ្ធ ឲ្យសន្លប់ក្នុងទឹកទី១។
ការប្រកួតប្រដាល់គុនខ្មែរគូម៉ារ៉ាតុង ដណ្ដើមប្រាក់១០លានរៀល វគ្គ៣ របស់ក្រុមហ៊ុនស្រាបៀGanzberg ក្នុងប្រភេទទម្ងន់៥៤គីឡូក្រាមនេះ មានអ្នកប្រដាល់ចំនួន០៨នាក់ មកពីសមាគម-ក្លិបចំនួន៨ បានចូលរួមប្រកួតក្នុងព្រឹត្តិការណ៍នេះ។
អ្នកប្រដាល់ទាំង០៨រូបនោះ ត្រូវបែងចែកជាពីរពូល មួយពូលមាន៤រូប ដែលក្នុងពូលA មានកីឡាករ ជី ឆៃលី សមាគមកីឡាប្រដាល់ក្រសួងការពារជាតិ, វ៉ន វ៉ុន ក្លិបអេភូថងកីឡា , សៅ ប៊ុនធឿន ក្លិបតាព្រហ្មមានជ័យ និង គឿម សុវណ្ណឌឿត ក្លិបមោងឬស្សីមរតកគុនខ្មែរ ខេត្តបាត់ដំបង។
ចំណែកពូល B មាន ម៉ន វ៉ាន្នី ក្លិបការិយាល័យទី៥ កងទ័ពជើងគោក, ឡុង ខេត្ត ក្លិបខ្លារខិនមានរិទ្ធ, លីន វណ្ណៈ ក្លិបបូរីរាជសីហ៍មានរិទ្ធ និងកីឡាករ គួន សុវណ្ណ ក្លិបយុវវាលស្បូវខណ្ឌច្បារអំពៅ៕
Source: Kampuchea Thmey Daily
0 Comments