ម្ចាស់ផ្ទះ​ភ្នំពេញ​ក្រោ​ន ចាញ់​ក្រុម​ក្រសួងការពារជាតិ ក្នុង​ប្រកួត​មិត្តភាព​លើកដំបូង

ក្រោយ​សម្រាក​អស់​មួយ​រយៈ​ធំ​បន្ទាប់ពី​បញ្ចប់​រដូវ​កាល​ឆ្នាំ​២០១៨ កាលពី​ពេល​ថ្មីៗ នៅ​ពេល​នេះ​មាន​ក្រុម​២​សមាជិក​ក្នុង​ពានរង្វាន់​លី​គ​កំពូល​កម្ពុជា (Metfone Cambodian League 2018) បាន​ណាត់គ្នា​ប្រកួត​មិត្តភាព​កម្តៅ​សាច់ដុំ​ក្រៅផ្លូវការ​មុនគេ នោះ​គឺ​ក្រុម​ភ្នំពេញ​ក្រោ​ន ប៉ះ​ជាមួយ​ក្រុម​ក្រសួងការពារជាតិ​នៅ​ចុង​សប្ដាហ៍​នេះ​។



ប្រកួត​ដែល​ធ្វើឡើង​នៅ​លើ​ទីលាន​កីឡដ្ឋាន RSN Stadium នា​ល្ងាច​ថ្ងៃ​សៅរ៍ ទី​១០ ខែវិច្ឆិកា ឆ្នាំ​២០១៨ ក្រុម​ភ្នំពេញ​ក្រោ​ន បាន​ប្រកួត​ចាញ់​ក្រុម​ក្រសួងការពារជាតិ ៣​ទល់​១​។ នេះ​ជា​បរាជ័យ​លើកដំបូង​របស់លោក Leonardo Vitorino ដែល​ទើប​កាន់​តំណែង​ជា​គ្រូបង្វឹក​របស់​ក្រុម​ភ្នំពេញ​ក្រោ​ន ខណៈ​លោក​បាន​ដាក់​កីឡាករ​យុវជន​ជាច្រើន​បង្ហាញខ្លួន​លើ​ទីលាន​លើក​នេះ​។ មិនតែប៉ុណ្ណោះ​ក្នុង​ប្រកួត​នេះ​ក្រុម​ទាំង​២​សុទ្ធតែ​អវត្តមាន​កីឡាករ​សំខាន់ៗ​មួយចំនួន​ដែល​បាន​កោះ​ហៅ​ចូល​ក្រុម​ជម្រើសជាតិ​កម្ពុជា ក្នុង​យុទ្ធនា​ការប្រកួត​ជើងឯក​ពាន​អាស៊ាន AFF Suzuki Cup 2018​។



ទាំង​លោក​Leonardo Vitorino គ្រូបង្វឹក​ក្រុម​ភ្នំពេញ​ក្រោ​ន និង​លោក ភា សុ​ភ័​ត្រា គ្រូបង្វឹក​របស់​ក្រុម​ក្រសួងការពារជាតិ សុទ្ធតែ​ត្រូវ​តាមដាន​និង​ត្រួតពិនិត្យ​សមត្ថភាព​កូនក្រុម​រប​ស់​ខ្លួន​និង​សមាជិក​ថ្មីៗ​ទាំង​ខ្មែរ​និង​បរទេស ដែល​ទើបតែ​ជ្រើសរើស​ចេញពី​ក្រុម​ថ្នាល​យុវជន ព្រមទាំង​កីឡាករ​មួយចំនួន​ដែល​កំពុង​ស្ថិត​ក្នុង​ដំណាក់កាល​ធ្វើតេស្ត​សាកល្បង​មុននឹង​សម្រេច​បញ្ចូល​ពួកគេ​ទៅ​ក្នុង​ក្រុម​ឈុត​ធំ​ឬ​យ៉ាងណា​នោះ​។



​ក្រោយ​ចប់​ប្រកួត​នេះ​ក្រុម​ក្រសួងការពារជាតិ នឹង​តំណាង​ឲ្យ​ក្រុម​ពី​កម្ពុជា ត្រូវធ្វើ​ដំណើរ​ទៅ​ប្រកួត​ពានរង្វាន់​អន្តរជាតិ​មួយ​នៅ​ប្រទេស​ចិន ជាមួយនឹង​ក្រុម​មកពី​ប្រទេស​ថៃ និង​វៀតណាម​។ យ៉ាង​ណា​ក្តី​ក្រុម​របស់​លោក ភា សុ​ភ័​ត្រា បាន​ប្រមូល​ផ្តុំគ្នា​អស់​រយៈពេល​យូរ​មក​ហើយ មុន​សម្រេច​ប្រកួត​មិត្តភាព​នេះ​៕

Source: Kampuchea Thmey Daily