មេដឹកនាំ​លទ្ធិប្រជាធិបតេយ្យ​ហុងកុង​អះអាងថា​ គ្មាន​ទោស​ក្នុងការ​កាត់ក្តី “​ចលនា​ឆ័​ត្រ​”

នៅ​ថ្ងៃ​ចន្ទ សកម្មជន​ប្រជាធិបតេយ្យ​ហុងកុង​ឈានមុខ​ចំនួន​៣​នាក់​បាន​អះអាងថា​ខ្លួនឯង​មិនមាន​ទោស​ចំពោះ​ការចោទប្រកាន់​ពីបទ​រំខាន​ជា​សាធារណៈ​ពាក់ព័ន្ធ​ការចូលរួម​របស់​ពួកគេ​នៅក្នុង​ការប្រមូលផ្តុំ​ធំៗ​ដែល​អំពាវនាវ​ឲ្យ​មាន​កំណែទម្រង់​នយោបាយ​។​
​
អ្នក​ទាំងបី​គឺ​ស្ថិតក្នុង​ចំណោម​សកម្មជន​ចំនួន​៩​នាក់​ដែល​សុទ្ធតែ​ប្រឈមមុខ​នឹង​ការចោទប្រកាន់​ពីបទ “​រំខាន​ជា​សាធារណៈ​” សម្រាប់​ការចូលរួម​របស់​ពួកគេ​នៅក្នុង​បាតុកម្ម “​ចលនា​ឆ័​ត្រ​” ឆ្នាំ​២០១៤​។ ការចោទប្រកាន់​នេះ​គឺ​ផ្អែកលើ​ច្បាប់​សម័យ​អាណានិគម​និង​មានទោស​ជាប់ពន្ធនាគារ​រហូតដល់​៧​ឆ្នាំ​។​
​
សាស្ត្រាចារ្យ​សង្គមវិទ្យា Chan Kin-man អាយុ​៥៩​ឆ្នាំ​, សាស្ត្រាចារ្យ​ច្បាប់ Benny Tai អាយុ​៥៤​ឆ្នាំ​និង​រដ្ឋមន្ត្រី​ប៉ាប​ទី​ស Chu Yiu-ming អាយុ​៧៤​ឆ្នាំ​បាន​បង្កើត​ចលនា Occupy Central ក្នុង​ឆ្នាំ​២០១៣​និង​បាន​ចូលរួម​ជាមួយ “​ចលនា​ឆ័ត​” ដឹកនាំ​ដោយ​និស្សិត​ដែល​បានធ្វើ​ឲ្យ​ផ្នែក​ខ្លះ​នៃ​ទីក្រុង នេះ​ត្រូវ​ជាប់គាំង​អស់​រយៈពេល​ជាច្រើន​ខែ​ដោយ​អំពាវនាវ​ឲ្យ​មានការ​បោះឆ្នោត​ដោយ​សមរម្យ​សម្រាប់​មេដឹកនាំ​របស់​ទីក្រុង​នេះ​។​
​
សកម្មជន​ទាំងនេះ​ត្រូវបាន​ស្វាគមន៍​ដោយ​អ្នកគាំទ្រ​រាប់រយ​នាក់​នៅ​ខាងក្រៅ​តុលាការ​។​
​រដ្ឋអាជ្ញា Andrew Bruce បាន​អះអាងថា ការតវ៉ា​ទ្រង់ទ្រាយ​ធំ​បាន​បណ្តាល​ឲ្យ​មានការ​រងរបួស​ជាទូទៅ​ដល់​សាធារណជន​ដែល​ត្រូវ​រង​ផលប៉ះពាល់​ដោយ​ការកកស្ទះ​ផ្លូវធំៗ​។​
​
លោក​បាន​ចោទប្រកាន់​អ្នក​ទាំងបី​ថា​បាន​ចូលរួម​និង​គាំទ្រ​ការធ្វើ​បាតុកម្ម​តាម​វិធី​រារាំង​ផ្លូវ​និង​ទីកន្លែង​សាធារណៈ​ដោយ​ខុសច្បាប់​។​
​ចលនា Occupy Central បាន​អំពាវនាវ​ឲ្យ​មានការ​កាន់កាប់​សង្កាត់​ពាណិជ្ជកម្ម​របស់​ទីក្រុង​ហុងកុង​ប្រសិនបើ​សាធារណជន​មិន​ទទួលបាន​ការបោះឆ្នោត​ដោយ​យុត្តិធម៌​សម្រាប់​មេដឹកនាំ​ទីក្រុង​នេះ​ដែល​ត្រូវបានតែងតាំង​ដោយ​គណៈកម្មាធិការ​គាំទ្រ​ទីក្រុង​ប៉េកាំង​។​
​
វា​ត្រូវបាន​ផ្លាស់ប្តូរ​ដោយ​ចលនា​និស្សិត​ដែល​ផ្ទុះឡើង​ក្នុង​ខែកញ្ញា​ឆ្នាំ​២០១៤​នៅពេលដែល​ប៉ូលិស​បាញ់​ឧស្ម័ន​បង្ហូរទឹកភ្នែក​លើ​ការប្រមូលផ្តុំ​ហ្វូងមនុស្ស​។​
​
អ្នក​ទាំងបី​បាន​ជំរុញ​ឲ្យ​មនុស្ស​ចូលរួម​ក្នុង​អ្វីដែល​ត្រូវបាន​គេ​ស្គាល់​ថា​ជា “​ចលនា​ឆ័​ត្រ​” នៅពេល​អ្នក​តវ៉ា​បាន​ប្រើ​ឆ័​ត្រ​ដើម្បី​ការពារ​ខ្លួន​ពី​ឧស្ម័ន​បង្ហូរទឹកភ្នែក​និង​ការបាញ់​ស្ព្រា​យ​ហឹរ​។​
​
ចលនា​នេះ​បាន​បរាជ័យ​ក្នុងការ​ឈ្នះ​កំណែទម្រង់​ហើយ​ចាប់តាំងពី​ពេល​នោះមក សកម្មជន​នានា​ត្រូវបាន​គេ​កាត់ទោស​ដោយមាន​អ្នកខ្លះ​ត្រូវ​ជាប់ពន្ធនាគារ​៕ AFP

​

Source: Kampuchea Thmey Daily