កីឡាករ ឃួន ឡាបូរ៉ាវី ដែលជាសមាជិកក្រុម Surat Thani FCក្នុងពានរង្វាន់លីគលំដាប់ទី៣របស់ប្រទេសថៃ (T3-League) នៅឆ្នាំ២០១៨ ថ្មីៗនេះបានសម្រេចចិត្តត្រឡប់មកបន្តអាជីពនៅស្រុកកំណើតវិញហើយ ពោលគឺចូលរួមជាមួយក្រុមបឹងកេតអែហ្វស៊ី ដើម្បីត្រៀមយុទ្ធនាការប្រកួតក្នុងរដូវកាលថ្មីឆ្នាំ២០១៩ ខាងមុខ។
កីឡាករមកពីខេត្តកំពង់ចាម រូបនេះបានបញ្ជាក់ថា «និយាយទៅពេលចូលលេងវិញ ខ្ញុំផ្ដោតលើការជួយក្រុមបឹងកេត ជាមុនសិន ហើយកៅអីជម្រើសជាតិហ្នឹង វាលើខាងគ្រូជាអ្នកមើលឃើញទេ បើគេមើលឃើញថា យើងជួយក្លិបបានល្អ ហើយគេរើស យើងនៅតែចូលរួម តែបើមិនជាប់ ក៏យើងនៅតែប្រឹងសម្រាប់ក្លិបយើងដដែល»។ កីឡាកររូបនេះបានបង្ហើបថា មានភ្នាក់ងារដោះដូរកីឡាករបានទាក់ទងរូបគេទៅបន្តអាជីពកាន់ក្លិបក្រៅប្រទេសដែរ នាពេលចុងក្រោយនេះតែថា គេនៅតែចង់លេងឲ្យក្លិបបឹងកេតអែហ្វស៊ីសិន ព្រោះអាចនៅក្បែរគ្រួសារ។
គេចាំបានថា កីឡាករ ឃួន ឡាបូរ៉ាវី ជាអ្នករកបានគ្រាប់បាល់ច្រើនជាងគេប្រចាំព្រឹត្តិការណ៍ពានរង្វាន់សម្តេចតេជោ ហ៊ុន សែន ពោលគឺឈ្នះ៤លើកច្រើនជាងកីឡាករដទៃ គិតតាំងបង្កើតឡើងដំបូងនៅឆ្នាំ២០០៧ មកពោលគឺនៅឆ្នាំ២០១១ និង២០១២ ជាមួយក្រុមខេត្តស្វាយរៀង (ព្រះខ័នរាជស្វាយរៀង បច្ចុប្បន្ន) នៅឆ្នាំ២០១៤ និង២០១៧ ជាមួយបឹងកេត។ កីឡាករវ័យ២៩ឆ្នាំរូបនេះបានចាប់អាជីពបាល់ទាត់ដំបូងពីឆ្នាំ២០០៨ មកម្ល៉េះដោយកាលនោះចូលរួមជាមួយក្លិបព្រះខ័នរាជស្វាយរៀង ហើយដល់ឆ្នាំ២០១៤ រូបគេបានចេញទៅចូលរួមជាមួយក្រុមបឹងកេត រហូតដល់ បច្ចុប្បន្ន។ ចំពោះក្នុងក្រុមជម្រើសជាតិវិញ រូបគេបានបង្ហាញខ្លួនជាមួយក្រុម U23 កម្ពុជា ចាប់ពីឆ្នាំ២០០៩ ដល់២០១១ ខណៈចាប់ពីឆ្នាំ២០០៨ ដល់បច្ចុប្បន្នរូបគេក៏មានឈ្មោះលេងជាមួយក្រុមជម្រើសជាតិកម្ពុជា ផងដែរ។
កីឡាករកម្ពុជា ១,៨១ម៉ែត្ររូបនេះធ្លាប់ឈ្នះពានរង្វាន់លីគកំពូលកម្ពុជា ៣លើកគឺនៅឆ្នាំ២០១៣ ជាមួយក្លិបព្រះខ័នរាជស្វាយរៀង ហើយនៅឆ្នាំ២០១៦ និង២០១៧ ឈ្នះជាមួយក្រុមបឹងកេត ខណៈធ្លាប់ឈ្នះពានរង្វាន់សម្តេចតេជោ ហ៊ុន សែន នៅឆ្នាំ២០១១,២០១២ ផងដែរ។ អ្វីដែលគួរឲ្យចាប់អារម្មណ៍កីឡាករ ឃួន ឡាបូរ៉ារី ធ្លាប់ឈ្នះពានរង្វាន់កីឡាករដែលទាត់បញ្ចូលទីបានច្រើនជាងគេដល់ទៅ៥លើកគឺក្នុងលីគកំពូលកម្ពុជា ឆ្នាំ២០១៣ និងឈ្នះក្នុងពានរង្វាន់សម្តេចតេជោ ហ៊ុន សែន ក្នុងឆ្នាំ២០១១,២០១២,២០១៤និង២០១៧៕
Source: Kampuchea Thmey Daily
0 Comments