ភ្នំពេញ ៖ តារាកំប្លែងស្រីវ័យក្មេងសាច់សខ្ចី កញ្ញា វ៉ាន់ នីឡា ថ្មីៗនេះ បានចេញមុខប្រតិកម្មភ្លាមៗបន្ទាប់ពីមានបុគ្គលមួយចំនួនតែងធ្វើការរិះគន់មកលើនាងថា ជាមេម៉ាយខាន់ស្លា ហើយសុខចិត្តផ្ដាច់ពាក្យពីអតីតគូដណ្ដឹងទៅមានប្រុសថ្មី។ ករណីនេះ ត្រូវបាន កញ្ញា វ៉ាន់ នីឡា ចាត់ទុកថាជាការច្រណែនឈ្នានីសពីបុគ្គល ដែលចង់កាច់បំបាក់ខ្លួន។
កញ្ញា វ៉ាន់ នីឡា បានរៀបរាប់បង្ហាញអារម្មណ៍មិនសប្បាយចិត្តដូច្នេះថា តើមានមនុស្សស្រីប៉ុន្មាននាក់ដែលចង់មានឈ្មោះជាមេម៉ាយខាន់ស្លា? សប្បាយមែនទេ ដែលដើរនិយាយពីខ្ញុំថា ខ្ញុំមេម៉ាយខាន់ស្លា សុខចិត្តផ្ដាច់ពាក្យទៅមានប្រុស? អ្នកដឹងច្បាស់ហើយមែនទេ? ពេលខ្ញុំភ្ជាប់ពាក្យថា ខ្ញុំស្រឡាញ់គេ ដោយសារគេមានឡានល្អ មានលុយ …..។
តារាកំប្លែងកូនស្រីសំណព្វចិត្ត លោក សុវណ្ណ រិទ្ធី ហៅតា វ៉ីចទ័រ បានបន្តទៀតថា ពេលខ្ញុំផ្ដាច់ពាក្យទៅស្គាល់អ្នកផ្សេង គេជាមនុស្សធម្មតា មិនឡូយឆាយ មិនចេះតែងខ្លួនហើយនៅក្មេង ថាខ្ញុំនឹងស្រឡាញ់ពួកពាល បាតសង្គម ហើយដល់ពេលអញ្ចឹងធ្វើម៉េចទៅបានត្រូវ ស្រឡាញ់អ្នកមានក៏ខុស ស្រឡាញ់អ្នកធម្មតាក៏ខុស ហើយខ្ញុំសុំផ្ដាំ មុននឹងបើកគម្របមាត់និយាយ យកខួរមកគិតសិន ចាំនិយាយ (គិតឲ្យបាន១០០សិន ចាំនិយាយ)។
ស្រីស្រស់ វ៉ាន់ នីឡា បានបញ្ជាក់បន្ថែមថា ខ្ញុំឈឺចាប់ជិតនឹងឆ្កួតដោយសារពាក្យ (គូដណ្ដឹង) ឈឺគ្រាំហើយ។ មុននឹងបញ្ចប់គេក៏បាននិយាយថា បងស្ដាយដែលបាត់បង់មនុស្សស្រីដូចអូន បងមិនដែលមើលឃើញទង្វើល្អរបស់អូន គិតតែការងារ មិនដែលខ្វល់នឹងមនុស្សស្រីម្នាក់នេះ បើសិនមានឱកាស បងនឹងកែខ្លួន ធ្វើមនុស្សល្អសម្រាប់អូន ហើយអ្នកដែលមិនដឹងរឿងនៅឲ្យស្ងៀមទៅ កុំលូតាមគេ។
សូមបញ្ជាក់ថា ការបញ្ចេញប្រតិកម្មពីសំណាក់តារាកំប្លែង កញ្ញា វ៉ាន់ នីឡា ខាងលើនេះ បានធ្វើឡើងស្របពេលដែលថ្មីៗមានការបែកធ្លាយនូវរូបភាពស្និទ្ធស្នាលជាមួយបុរសវ័យប្រហែលគ្នាម្នាក់ បង្កការចាប់អារម្មណ៍ និងភ្ញាក់ផ្អើលដល់មហាជន។ ខណៈមានព័ត៌មានមួយចំនួនក៏បានចុះផ្សាយដាក់ការសង្ស័យអំពីការសាងសម្ពន្ធភាពស្នេហារបស់ពួកគេទាំងពីរផងដែរ៕
Source: Kampuchea Thmey Daily
0 Comments