ភ្នំពេញ ៖ ដោយមានការយកចិត្តទុកដាក់របស់រាជរដ្ឋាភិបាល និងការខិតខំពុះពារចូលរួមយ៉ាងសកម្មពីថ្នាក់ដឹកនាំ មន្ត្រីរាជការ ក្រសួងវប្បធម៌ និងវិចិត្រសិល្បៈនោះ ទីបំផុតសិល្បៈល្ខោនខោលត្រូវបានសម្រេចចុះក្នុងបញ្ជីបេតិកភណ្ឌវប្បធម៌អរូបបី នៃមនុស្សជាតិរបស់អង្គការយូណេស្កូ។ នេះបើយោងតាមសេចក្ដីប្រកាសរបស់ក្រសួងវប្បធម៌ និងវិចិត្រសិល្បៈ។
បើយោងតាមសេចក្ដីជូនដំណឹងរបស់ក្រសួងវប្បធម៌ និងវិចិត្រសិល្បៈ ដែលធ្វើឡើងនៅថ្ងៃទី២៨ ខែវិច្ឆិកា ឆ្នាំ២០១៨ បានឲ្យដឹងថា នាថ្ងៃទី២៨ ខែវិច្ឆិកា ឆ្នាំ២០១៨ នៅក្នុងកិច្ចប្រជុំលើកទី១៣ នៃគណៈកម្មការអន្តររដ្ឋាភិបាលសម្រាប់ការពារបេតិកភណ្ឌវប្បធម៌អរូបីរបស់អង្គការយូណេស្កូ នៅទីក្រុងព័រល្វីសាធារណរដ្ឋម៉ូរីស បានអនុម័តយល់ព្រមចុះល្ខោនខោលចូលក្នុងបញ្ជីបេតិកភណ្ឌវប្បធម៌អរូបី នៃមនុស្សជាតិ តាមសេចក្ដីសម្រេចDecision13.COM.10.a.3។
នៅក្នុងសេចក្ដីជូនដំណឹងដដែលនេះបានបន្តទៀតថា ការសម្រេចរបស់គណៈកម្មការអន្តររដ្ឋាភិបាល នៃអង្គការយូណេស្កូនាពេលនេះ គឺជាមោទនភាពជាតិដ៏ធំធេងថ្មីមួយទៀត ដែលកើតចេញពីការខិតខំប្រឹងប្រែងរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលជានិច្ចកាល តែងតែផ្តល់អាទិភាពខ្ពស់ចំពោះបេតិកភណ្ឌវប្បធម៌ជាតិ។
ប្រភពបានបញ្ជាក់ទៀតថា ក្រោមការយកចិត្តទុកដាក់របស់រាជរដ្ឋាភិបាល និងការខិតខំពុះពារចូលរួមយ៉ាងសកម្មពីថ្នាក់ដឹកនាំមន្ត្រីរាជការ ក្រសួងវប្បធម៌ និងវិចិត្រសិល្បៈ ដោយមានកិច្ចសហការចូលរួមគាំទ្រយ៉ាងផុលផុសពីសិល្បករ អង្គការសមាគម សង្គមស៊ីវិល ក្នុងវិស័យសិល្បៈ វប្បធម៌ និងការជួយគាំទ្រលើកទឹកចិត្តពីមហាជន ប្រជាជន និងស្រទាប់យុវជនកម្ពុជាទាំងមូល ទើបយើងទទួលបាននូវលទ្ធផលជោគជ័យ នៃការដាក់បញ្ចូលល្ខោនខោលនៅក្នុងបញ្ជីបេតិកភណ្ឌវប្បធម៌អរូបបី នៃមនុស្សជាតិដ៏ត្រចះត្រចង់នាពេលនេះ។
សេចក្ដីជូនដំណឹងខាងលើនេះបានបញ្ជាក់បន្ថែមថា បេតិកភណ្ឌវប្បធម៌រូបី និងអរូបីរបស់ជាតិយើងបានចូលរួមចំណែកធ្វើឲ្យកេរ្តិ៍ឈ្មោះរបស់កម្ពុជាល្បីរន្ទឺនៅលើឆាកអន្តរជាតិ ព្រមទាំងជាតួអង្គមួយដ៏លេចធ្លោនៅលើវេទិកាបេតិកភណ្ឌពិភពលោកថែមទៀតផង។
ដូច្នេះ ក្រសួង សូមអំពាវនាវដល់សាធារណជន មេត្តាបន្តចូលរួមថែរក្សា ការពារ និងលើកតម្កើងតម្លៃបេតិកភណ្ឌវប្បធម៌ជាតិ ពិសេសបេតិកភណ្ឌវប្បធម៌អរូបី ក្នុងសម័យសាកលភាវូនីយកម្មនាពេលបច្ចុប្បន្ន៕
Source: Kampuchea Thmey Daily
0 Comments