ក្រុមឆ្វេងនិយមហ្វីលីពីនបានប្រតិកម្មជាមួយការរិះគន់កាលពីថ្ងៃពុធចំពោះការគំរាមកំហែងមួយដោយលោកប្រធានាធិបតី Rodrigo Duterte ក្នុងការបង្កើត “ក្រុមស្ម័គ្រស្លាប់” មួយដើម្បីប្រមាញ់នូវអ្វីដែលលោកនិយាយថា ជាអ្នកធ្វើឃាតម៉ៅនិយមដែលផែនការមួយនេះត្រូវបានអ្នករិះគន់និយាយថាអាចបង្កឲ្យមានការសម្លាប់រង្គាលស្រដៀងទៅនឹងសង្គ្រាមបង្ហូរឈាមរបស់គាត់លើគ្រឿងញៀន។
ពួកម៉ៅនិយម ពួកឆ្វេងនិយមនិងសមាជិកសភាមួយចំនួនបាននិយាយថា លោក Duterte នឹងធ្វើឲ្យកាន់តែអាក្រក់ទៅៗនូវបរិយាកាសនៃការភ័យខ្លាចនិងនិទណ្ឌភាពដែលមានស្រាប់ដោយការគំរាមកំហែងបង្កើតក្រុមបុរសដើម្បីវាយប្រហារទៅលើកងទ័ព New People's Army (NPA)ដែលជាកងជីវពលកុម្មុយនិស្តដែលបានធ្វើបះបោរកម្រិតទាបនៅប្រទេសហ្វីលីពីនអស់រយៈពេលជាច្រើនទសវត្សមកហើយ។
លោក Duterte បាននិយាយថា ឃាតកររបស់គាត់នឹងកម្ចាត់ NPA ដែលពួកកុម្មុយនិស្តបានដាក់ពង្រាយដើម្បីសម្លាប់ប៉ូលិសក្នុងអំឡុងទសវត្សឆ្នាំ១៩៧០និង១៩៨០អំឡុងការគ្រប់គ្រងរបស់អតីតបុរសខ្លាំងលោក Ferdinand Marcos ។
លោកបាននិយាយនៅក្នុងសុន្ទរកថាមួយកាលពីថ្ងៃអង្គារថា “ខ្ញុំនឹងបង្កើតកម្លាំងផ្ទាល់របស់ខ្ញុំគឺ ក្រុមស្ម័គ្រស្លាប់ Duterte”។
លោក Jose Maria Sison ដែលជាស្ថាបនិកនិរទេសខ្លួននៃគណបក្សកុម្មុយនីស្ដហ្វីលីពីនបានបដិសេធថា មិនមានឃាតកម្មទេហើយបាននិយាយថា លោក Duterte បានប្រើប្រាស់វាធ្វើជាលេសដើម្បីសម្លាប់ពួកឧទ្ទាមម៉ៅនិយម។
លោក Sison បានប្រដូចវាទៅនឹងយុទ្ធនាការប្រឆាំងគ្រឿងញៀនរបស់លោក Duterte ដែលមនុស្សរាប់ពាន់នាក់ត្រូវបានសម្លាប់។ ក្រុមសកម្មជនបាននិយាយថា មានមនុស្សជាច្រើននាក់ត្រូវបានគេប្រហារជីវិតប៉ុន្តែប៉ូលិសបដិសេធហើយនិយាយថា ទាំងអស់នោះគឺជាការបាញ់សម្លាប់ជាមួយឈ្មួញគ្រឿងញៀន។
សេចក្តីថ្លែងការណ៍របស់លោក Duterte បានធ្វើឲ្យមានការព្រួយបារម្ភដល់ក្រុមសិទ្ធិមនុស្សដែលនិយាយថា ប៉ូលិសកំពុងយល់ឃើញថា ពួកគេត្រូវបានគេបើកភ្លើងខៀវដើម្បីសម្លាប់ឧក្រិដ្ឋជនសង្ស័យ។
ក្រុមឆ្វេងនិយម Bayan បាននិយាយនៅក្នុងសេចក្តីថ្លែងការណ៍មួយថា លោក Duterte កំពុងញុះញង់ឲ្យមានការសម្លាប់រង្គាលប្រឆាំងនឹងអ្នករិះគន់រដ្ឋាភិបាល អ្នកការពារសិទិ្ធមនុស្សនិងមនុស្សគ្រប់គ្នាដែលរដ្ឋាភិបាលចាត់ទុកថា “មានគ្រោះថ្នាក់”៕ REUTERS
Source: Kampuchea Thmey Daily
0 Comments