ភ្នំពេញ ៖ ដោយមានការចាប់អារម្មណ៍យ៉ាងខ្លាំងពីទេពកោសល្យរបស់កុមារាពីរនាក់បងប្អូន ដែលអាចនិយាយបានច្រើនភាសាក្នុងពេលលក់វត្ថុអនុស្សាវរីយ៍នៅអង្គរនោះ នៅថ្ងៃចន្ទ ទី ១២ ខែវិច្ឆិកា ឆ្នាំ២០១៨ នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានសម្រេចផ្តល់ថវិកា និងគ្រឿងឧបភោគបរិភោគមួយចំនួនដល់ពួកគេ។
កុមារា ទាំង២នាក់ មានឈ្មោះ ធុច សាលីក អាយុ ១៤ឆ្នាំ និងកុមារា ធុច ទិត្យា អាយុ ១១ឆ្នាំ បានទទួលការផ្គត់ផ្គង់ក្នុងជីវភាពរស់នៅ និងបន្តការសិក្សារហូតដល់ចប់ចុងចប់ដើមក្លាយជាធនធានមនុស្សដ៏ពូកែរបស់សង្គមជាតិ។
តាមរយៈ លោកជំទាវ ម៉ែន នារីសោភ័គ អគ្គលេខាធិការរងទី ១ ដែលប្រគល់អំណោយនាពេលនោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានកោតសរសើរដល់ទេពកោសល្យពូកែចងចាំភាសារបស់ចៅៗទាំងពីរនាក់ និងផ្តាំផ្ញើឲ្យយកចិត្តទុកដាក់បន្តការសិក្សារៀនសូត្រឲ្យចេះច្បាស់លាស់ទាំងការនិយាយ និងការសរសេរ លើភាសាខ្មែរ និងភាសាបរទេស។ បន្ថែមពីនេះ ត្រូវចាប់យកជំនាញ ឬឯកទេសអ្វីមួយឲ្យបានច្បាស់លាស់ ឲ្យមានសមត្ថភាពគ្រប់គ្រាន់ដើម្បីអនាគតភ្លឺស្វាង ព្រោះការចេះភាសានិយាយតែមួយមុខមិនទាន់គ្រប់គ្រាន់នៅឡើយទេ។
ជាមួយគ្នានេះ សម្តេចកិត្តិព្រឹទ្ធ បណ្ឌិត ក៏បានផ្តាំផ្ញើថ្លែងអំណរគុណដល់ឪពុកដែលប្រកបរបរជាជាងគំនូរ និងម្តាយជាអ្នកលក់វត្ថុអនុស្សាវរីយ៍ ដែលបានអប់រំប្រៀនប្រដៅ បណ្តុះបណ្តាលកូនៗ ឲ្យបានរៀនសូត្រគ្រប់គ្នា។
ទន្ទឹមនឹងនេះ កុមារាទាំងពីរនាក់បងប្អូន បានសម្តែងក្តីរំភើបរីករាយឥតឧបមាដោយទទួលបានការលើកទឹកចិត្តយ៉ាងកក់ក្តៅ ពីលោកយាយ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ហើយចៅៗសូមប្តេជ្ញាខិតខំសិក្សារៀនសូត្រឲ្យបានពូកែចាប់យកជំនាញច្បាស់លាស់ ធ្វើជាកូនល្អ សិស្សល្អ ពលរដ្ឋល្អនៅក្នុងសង្គម។
សូមបញ្ជាក់ថា សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា នៅបានឧបត្ថម្ភថវិកាមួយចំនួន ដល់ឪពុកម្តាយរបស់កុមារាទាំងពីរនាក់ សម្រាប់ផ្គត់ផ្គង់ដល់ជីវភាពរស់នៅ និងចិញ្ចឹមបីបាច់ដល់កូនៗផងដែរ៕
Source: Kampuchea Thmey Daily
0 Comments