ភ្នំពេញ ៖ នេះជាដំណឹងដ៏គួរឲ្យសោកស្ដាយ និងក្រៀមក្រំបំផុតសម្រាប់ក្រុមគ្រួសាររបស់តារាចម្រៀងស្រីនិយមការស្លៀកពាក់សិចស៊ី អ្នកនាង ឆៃ លីដាឡែន ខណៈដែលឪពុកជាទីស្រលាញ់បានទទួលមរណភាព ដោយសារជំងឺគាំងបេះដូង។
បើតាមការបញ្ជាក់នៅលើផេកផ្លូវការសិល្បករកម្ពុជាបានលើកឡើងថា តារាចម្រៀងស្រី អ្នកនាង ឆៃ លីដាឡែន ពេលនេះមានទុក្ខជាទម្ងន់ ដោយសារទទួលដំណឹងថា ឪពុកអ្នកនាងបានទទួលមរណភាព ដោយជំងឺគាំងបេះដូង នៅវេលារម៉ោង១០និង៣០នាទីយប់ ថ្ងៃទី២៧ ខែធ្នូ ឆ្នាំ២០១៨។
ប្រភពដដែលនេះបាននិយាយបន្ថែមទៀតថា អ្នកនាង ឆៃ លីដាឡែន ក៏សូមសំណូមពរដល់សិល្បករ-សិល្បការិនី មេត្តាចូលរួមក្នុងពិធីបុណ្យសពលោកឪពុកអ្នកនាងផង ដោយអ្នកនាងតម្កល់សពឪពុករបស់ខ្លួន រហូតដល់ថ្ងៃទី៣០វិច្ឆិកា ដូច្នេះ សូមសិល្បករមេត្តាជ្រាបជាដំណឹង។ ដោយឡែក ងាកមកចាប់អារម្មណ៍នៅលើបណ្ដាញសង្គមហ្វេសប៊ុក របស់អ្នកនាង ឆៃ លីដាឡែន ឯណោះវិញ នាងក៏បានបង្ហាញពីដំណឹងដ៏សោកសៅនេះផងដែរ។
អ្នកនាង ឆៃ លីដាឡែន បានរៀបរាប់ថា ប៉ា (ឪពុក) ខ្ញុំតែងតែមាន ប៉ា ជាកម្លាំងចិត្តរបស់កូន ហេតុអ្វីប៉ាទៅចោលកូនអញ្ចឹង ប៉ាហេតុអ្វី ប៉ាទៅចោលម៉ាក់អញ្ចឹង ប៉ាតស៊ូជាមួយម៉ាក់ ដើម្បីកូនៗយូរមកហើយ ហេតុអ្វីប៉ាមិនព្រមនៅជាមួយម៉ាក់ ដើម្បីឲ្យកូនបានមើលថែវិញ ពេលនេះប៉ាទៅចោលកូនហើយ ប៉ាទៅដោយមិនត្រឡប់មកវិញទេ សូមឲ្យវិញ្ញាណក្ខន្ធប៉ាទៅកាន់សុគតិភព។
តាមរយៈដំណឹងដ៏ក្រៀមក្រំ និងសោកសៅ នៃក្រុមគ្រួសារតារាចម្រៀងស្រី អ្នកនាង ឆៃ លីដាឡែន ដែលបច្ចុប្បន្នកំពុងតែត្រូវបានបាត់បង់ឪពុកនេះដែរ ភ្លាមៗនោះ គេសង្កេតឃើញមានអ្នកសិល្បៈ និងមហាជនជាច្រើន បានសម្ដែងការសោកស្ដាយ និងផ្ញើសារចូលរួមរំលែកទុក្ខជាមួយក្រុមគ្រួសារអ្នកនាង ឆៃ លីដាឡែន ផងដែរ៕
Source: Kampuchea Thmey Daily
0 Comments