រតនគិរី ៖ ស្ត្រីម្នាក់ បានស្លាប់បាត់បង់ជីវិត បន្ទាប់ពីជិះកាឡេថងត្រឡប់មកពីចម្ការវិញ ខណៈពេលនោះដែរ បានក្រឡាប់កាឡេថងបណ្តាលឲ្យសង្កត់ពីលើ ចំណែកកូនតូចរងរបួសស្រាល។
ហេតុការណ៍ក្រឡាប់កាឡេថងនេះ បានកើតឡើងកាលពីវេលាម៉ោង៥និង៤០នាទីល្ងាចថ្ងៃអាទិត្យ ៤កើត ខែកត្តិក ឆ្នាំច សំរឹទ្ធិស័ក ព.ស២៤៦២ ត្រូវនឹងថ្ងៃទី១១ ខែវិច្ឆិកា ឆ្នាំ២០១៨ ត្រង់ចំណុចអូរជឹម ស្ថិតនៅក្នុងភូមិ៣ ឃុំត្រពាំងក្រហម ស្រុកកូនមុំ។
អធិការរងទទួលផែនព្រហ្មទណ្ឌស្រុកកូនមុំលោក ជា សារិទ្ធ បានឲ្យដឹងថា ស្ត្រីរងគ្រោះឈ្មោះ ញ៉ាវ មុំ អាយុ២៤ឆ្នាំ ជនជាតិខ្មែរ មុខរបរកសិករ(ស្លាប់)។រីឯប្តីឈ្មោះ យ៉េន រី អាយុ២៩ឆ្នាំ ជនជាតិខ្មែរ មិនមានរងរបួសនោះទេ។ ចំណែកកូនប្រុសអាយុ៦ឆ្នាំ រងរបួសស្រាល ជនរងគ្រោះមានទីលំនៅភូមិឃុំកើតហេតុខាងលើ។
លោកថា មុនពេលកើតហេតុ ស្ត្រីរងគ្រោះបានអង្គុយជិះជាមួយកូនប្រុសនៅលើកាឡេថងមានដឹកជន្លង់ម្រេចជាច្រើនដើម ខណៈពេលនោះកង់កាឡេថងបានធ្លាក់ជង្ហុកដាច់ខ្សែរឹតជន្លង់ម្រេចបណ្តាលឲ្យក្រឡាប់សង្កត់ស្លាប់តែម្តង។
ក្រោយកើតហេតុសមត្ថកិច្ចជំនាញចុះមកត្រួតពិនិត្យនិងធ្វើកោសល្យវិច័យនៅគេហដ្ឋានសពឃើញថា ពិតជាស្លាប់ដោយសារក្រឡាប់កាឡេថងពិតប្រាកដមែន។
បច្ចុប្បន្នសមត្ថកិច្ចបានប្រគល់សពទៅឲ្យក្រុមគ្រួសារយកទៅធ្វើបុណ្យតាមប្រពៃណីផងដែរ៕
Source: Kampuchea Thmey Daily
0 Comments