ភ្នំពេញ ៖ អ្នកនាង ចន ច័ន្ទលក្ខិណា ដែលជាតារាសម្ដែង និងជាប្រធានសមាគមសិល្បករខ្មែរ ស្របពេលបានឮដំណឹង នៃការធ្លាក់ខ្លួនឈឺធ្ងន់របស់ព្រឹទ្ធាចារ្យចាប៉ីដងវែង លោកតា ប្រាជ្ញ ឈួន និងត្រូវបានក្រុមគ្រួសារបញ្ជូនមកសង្គ្រោះបន្ទាន់នៅមន្ទីរពេទ្យកាល់ម៉ែតនោះ ភ្លាមៗនេះដែរ នាងក៏បានចំណាយពេលផ្ទាល់ខ្លួនចុះទៅសួរសុខទុក្ខលោកតា ប្រាជ្ញ ឈួន ដល់មន្ទីរពេទ្យ។
ការចុះទៅសួរសុខទុក្ខព្រឹទ្ធាចារ្យចាប៉ីដងវែង លោកតា ប្រាជ្ញ ឈួន ដែលបច្ចុប្បន្នកំពុងតែសម្រាកព្យាបាលនៅមន្ទីរពេទ្យកាល់ម៉ែតនោះដែរ ប្រធានសមាគមរូបនេះ មិនត្រឹមតែបង្ហាញអារម្មណ៍រន្ធត់ចិត្តខ្លាំងនោះទេ គឺអ្នកនាងថែមទាំងស្ទើរទប់ទឹកភ្នែកមិនបាន ក្រោយពេលបានឮការពោលពាក្យត្រឹមតែ១ម៉ាត់របស់ លោកតា ប្រាជ្ញ ឈួន ដែលថារង់ចាំមើលផ្លូវនាងផងនោះ។
បើតាមការឲ្យដឹងពី អ្នកនាង ចន ច័ន្ទលក្ខិណា បានលើកឡើងថា សមាគមសិល្បករខ្មែរបានមកសួរសុខទុក្ខ លោកឪ ប្រាជ្ញ ឈួន ដែលកំពុងសម្រាកព្យាបាលជំងឺនៅមន្ទីរពេទ្យកាល់ម៉ែត។ ហ៊ឹម….!ថ្វីត្បិតតែអាការៈលោកឪវង្វេង ប៉ុន្តែស្គាល់កូន ចនច័ន្ទ ច្បាស់ណាស់ គ្រាន់តែឮថាកូន ចនច័ន្ទ មកសួរសុខទុក្ខ លោកឪខំស្ទុះងើបទទួល ហើយមានប្រសាសន៍ថា គាត់ចាំមើលផ្លូវកូនមក។
ប្រធានសមាគមសិល្បករខ្មែរអាណត្តិថ្មី បន្តវេនពីអតីតប្រធានចាស់ លោក សុះ ម៉ាច គឺអ្នកនាង ចន ច័ន្ទលក្ខិណា បានបញ្ជាក់បន្ថែមទាំងអារម្មណ៍ក្ដុកក្ដួលទៀតថា ហ៊ឹម…! កូនសូមជូនពរឲ្យលោកឪឆាប់ជា និងមានសុខភាពល្អឡើងវិញ។
សូមជម្រាបផងដែរថា ស្ថិតក្នុងវ័យ៨៣ឆ្នាំ អធិរាជចាប៉ីដងវែងដ៏ល្បីល្បាញឈ្មោះប្រទេសកម្ពុជាលោកតាព្រឹទ្ធភីរម្យ ប្រាជ្ញ ឈួន បានធ្លាក់ខ្លួនឈឺធ្ងន់ ត្រូវបានក្រុមគ្រួសារបញ្ជូនទៅសង្គ្រោះនៅមន្ទីរពេទ្យខេត្តតាកែវ ប៉ុន្តែដោយសារតែស្ថានភាពជំងឺធ្វើទុក្ខកាន់តែខ្លាំងឡើង ទើបក្រុមគ្រួសារសម្រេចបញ្ជូនមកសង្គ្រោះបន្ទាន់នៅមន្ទីរពេទ្យកាល់ម៉ែត។
គិតរហូតមកទល់ពេលនេះ អាជីពជាអ្នកចាប៉ីរបស់លោកតា ប្រាជ្ញ ឈួន គឺមានរយៈពេលជិត៧០ឆ្នាំមកហើយ ដោយក្នុងនោះលោកតាបានបន្សល់ទុកនូវស្នាដៃផ្នែកចាប៉ីជាច្រើនសម្រាប់កូនខ្មែរជំនាន់ក្រោយស្ដាប់។
កិត្តិសព្ទរបស់លោកតាព្រឹទ្ធភីរម្យ ប្រាជ្ញ ឈួន ដែលជាអ្នកប្រាជ្ញផ្នែកចាប៉ីដងវែងនោះ មិនត្រឹមតែល្បីខ្ទរខ្ទារសម្រាប់តែប្រទេសកម្ពុជាប៉ុណ្ណោះទេ គឺថែមទាំងធ្វើឲ្យអ្នកចាប៉ីជំនាន់ក្រោយរក្សា និងចងចាំមិនភ្លេចនូវស្នាដៃរបស់លោកតាផងដែរ៕
Source: Kampuchea Thmey Daily
0 Comments