ភ្នំពេញ ៖ ឯកអគ្គរដ្ឋទូតវិសាមញ្ញ និងពេញសមត្ថភាពថ្មី នៃសាធារណរដ្ឋប្រជាធិបតេយ្យប្រជាមានិតឡាវប្រចាំកម្ពុជា លោក Amphay KINDAVONG បានកោតសរសើរពីការរីកចម្រើនយ៉ាងឆាប់រហ័សលើគ្រប់វិស័យរបស់ប្រទេសកម្ពុជា ក្រោមយុទ្ធសាស្ត្រគ្រប់ជ្រុងជ្រោយរបស់រាជរដ្ឋាភិបាលកម្ពុជា ដែលមានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជាប្រមុខដឹកនាំ។
នៅក្នុងជំនួបសម្ដែងការគួរសម សម្ដេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា ព្រឹកថ្ងៃទី២៧វិច្ឆិកានេះ នៅវិមានព្រឹទ្ធសភា លោក Amphay KINDAVONG ឯកអគ្គរដ្ឋទូតថ្មី នៃសាធារណរដ្ឋប្រជាធិបតេយ្យប្រជាមានិតឡាវ ប្រចាំកម្ពុជា បានថ្លែងអំណរគុណចំពោះសម្ដេចប្រធានព្រឹទ្ធសភា ដែលបានអនុញ្ញាតឲ្យចូលជួប និងបានកោតសរសើរវាយតម្លៃខ្ពស់ចំពោះការរីកចម្រើនយ៉ាងឆាប់រហ័សលើគ្រប់វិស័យរបស់ប្រទេសកម្ពុជា ដោយសារយុទ្ធសាស្ត្រគ្រប់ជ្រុងជ្រោយរបស់រាជរដ្ឋាភិបាល ក្រោមការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
លោកឯកអគ្គរដ្ឋទូតសង្ឃឹមថា ប្រទេសទាំងពីរ នឹងមានទំនាក់ទំនង និងកិច្ចសហប្រតិបត្តិការល្អលើវិស័យទេសចរណ៍ និងវិនិយោគ ក្នុងនាមជាប្រទេសភូមិផងរបងជាប់គ្នា។
លោកឯកអគ្គរដ្ឋទូតបានបញ្ជាក់ថា ចំពោះវិស័យពាណិជ្ជកម្ម នៃប្រទេសទាំងពីរ មានភាពប្រហាក់ប្រហែលគ្នា ប៉ុន្តែប្រទេសកម្ពុជាមានការនាំចេញច្រើនជាងប្រទេសឡាវ ហេតុដូចនេះ ឯកឧត្ដមមានបំណងចង់ស្វែងយល់អំពីការនាំចេញរបស់ប្រទេសកម្ពុជា ដើម្បីយកទៅផ្សព្វផ្សាយនៅប្រទេសឡាវ។
លោកឯកអគ្គរដ្ឋទូតបានបញ្ជាក់ជូនសម្ដេចប្រធានព្រឹទ្ធសភាថា លោកបានត្រៀមលក្ខណៈរួចជាស្រេច ដើម្បីត្រៀមរៀបចំទទួលដំណើរទស្សនកិច្ចជាផ្លូវការរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅសាធារណរដ្ឋប្រជាធិបតេយ្យប្រជាមានិតឡាវ នៅដើមខែធ្នូខាងមុខនេះ។ តាមរយៈដំណើរទស្សនកិច្ចនេះ លោកសង្ឃឹមថា នឹងមានកិច្ចសហប្រតិបត្តិការរវាងរដ្ឋាភិបាល និងប្រជាជននៃប្រទេសទាំងពីរកាន់តែប្រសើរឡើងថែមទៀត។
ក្នុងជំនួបនេះដែរ សម្ដេចវិបុលសេនាភក្តី សាយ ឈុំ បានសម្ដែងនូវការអបអរសាទរ និងស្វាគមន៍ចំពោះ លោក Amphay KINDAVONG ដែលត្រូវបានរដ្ឋាភិបាល នៃសាធារណរដ្ឋប្រជាធិបតេយ្យប្រជាមានិតឡាវ តែងតាំង ជាឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាធិបតេយ្យប្រជាមានិតឡាវ ប្រចាំព្រះរាជាណាចក្រកម្ពុជា។
សម្ដេចប្រធានព្រឹទ្ធសភា មានជំនឿជាក់ថា លោកឯកអគ្គរដ្ឋទូត នឹងខិតខំរួមចំណែកពង្រឹងពង្រីកទំនាក់ទំនង មិត្តភាព និងកិច្ចសហប្រតិបត្តិការរវាងប្រជាជន និងប្រទេសទាំងពីរឲ្យកាន់តែល្អប្រសើរឡើងថែមទៀត ដើម្បីនាំមកនូវផលប្រយោជន៍ទៅវិញទៅមកសម្រាប់ប្រជាជន និងប្រទេសទាំងពីរ។
សម្ដេចប្រធានព្រឹទ្ធសភា បានជម្រាបជូនអំពីការរីកចម្រើន និងការទទួលបានជ័យជម្នះក្នុងការបោះឆ្នោតក្នុងពេលកន្លងទៅនេះ និងវាយតម្លៃខ្ពស់ចំពោះទំនាក់ទំនង សាមគ្គីភាព មិត្តភាព និងកិច្ចសហប្រតិបត្តិការលើគ្រប់វិស័យបានយ៉ាងល្អ វាងប្រទេសទាំងពីរកម្ពុជា-ឡាវ។
ជាមួយគ្នានេះដែរ ក្នុងក្របខ័ណ្ឌស្ថាប័ននីតិប្បញ្ញត្តិកម្ពុជា-ឡាវ ក៏មានកិច្ចសហប្រតិបត្តិការល្អគួរជាទីមោទនៈ ដោយបានធ្វើការផ្លាស់ប្ដូរទស្សនកិច្ចទៅវិញទៅមកជាញឹកញាប់ ការចូលរួមប្រជុំទៀងទាត់ រវាងសភាប្រទេសទាំង៣ (កម្ពុជា ឡាវ និងវៀតណាម CLV) ព្រមទាំងគាំទ្រគ្នាលើកិច្ចសហប្រតិបត្តិការអន្តរជាតិ ក្នុងក្របខ័ណ្ឌ AIPA IPU និង APPF។
សម្ដេចប្រធានព្រឹទ្ធសភា បានគូសបញ្ជាក់ថា ព្រឹទ្ធសភា រដ្ឋសភា រាជរដ្ឋាភិបាល ក្រសួង ស្ថាប័ន ជាតិ នៃព្រះរាជាណាចក្រកម្ពុជា ត្រៀមខ្លួនជានិច្ច ដើម្បីធ្វើកិច្ចសហប្រតិបត្តិការដ៏ជិតស្និទ្ធជាមួយនឹងឯកឧត្ដម ឯកអគ្គរដ្ឋទូត ក៏ដូចជាស្ថានទូតឡាវប្រចាំព្រះរាជាណាចក្រកម្ពុជា ដើម្បីលើកកម្ពស់ទំនាក់ទំនង កិច្ចសហប្រតិបត្តិការ និងនាំផលប្រយោជន៍ដ៏ធំធេងសម្រាប់ប្រជាជន និងប្រទេសទាំងពីរ៕
Source: Kampuchea Thmey Daily
0 Comments