លោក ស៊ុន ចាន់ថុល ជួបពិភាក្សា​ការងារ​ជាមួយ​លោក Hideaki Iwasaki នាយក​តំណាង​ធនាគារ​អភិវឌ្ឍន៍​អាស៊ី​ប្រចាំ​ប្រទេស​ថៃ​

ភ្នំពេញ ៖ កាលពី​ថ្ងៃ​ទី​០៩ ខែ​វិច្ឆិកា ឆ្នាំ​២០១៨ ក្នុង​កំឡុង​ពេល ​នៃ​កិច្ចប្រជុំ​រដ្ឋមន្ត្រី​ដឹកជញ្ជូន​អាស៊ាន​​លើក​ទី​២៤ និង​កិច្ចប្រជុំ​ជាមួយ​ដៃគូ​សន្ទនា​ពាក់ព័ន្ធ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រី​ក្រសួង​សាធារណការ និង​ដឹកជញ្ជូន បាន​ទទួល​ជួបពិភាក្សា​ការងារ​ជាមួយ​ លោក Hideaki Iwasaki នាយក​តំណាង​ធនាគារ​អភិវឌ្ឍន៍​អាស៊ី​ប្រចាំ​ប្រទេស​ថៃ និង​ជា​សហប្រធាន​កិច្ចប្រជុំ​គណៈកម្មាធិការ​រួម​ នៃ​កិច្ចព្រមព្រៀង​ដឹកជញ្ជូន​ឆ្លងកាត់​ព្រំដែន នៃ​មហា​អនុ​តំបន់​មេគង្គ និង​កិច្ចប្រជុំ​គណៈកម្មាធិការ​រួម​សម្របសម្រួល​ការ​ដឹក​ជញ្ជូន​ថ្នាក់​ជាតិ​។​

កិច្ចពិភាក្សា​ផ្ដោត​សំខាន់​លើ​ការរៀបចំ កិច្ចប្រជុំ​គណៈកម្មាធិការ​រួម​នៃ​កិច្ចព្រមព្រៀង​ដឹកជញ្ជូន​ឆ្លង​កាត់​ព្រំដែន នៃ​មហា​អនុ​តំបន់​មេគង្គ និង​កិច្ចប្រជុំ​គណៈកម្មាធិការ​រួម​សម្របសម្រួល​ការ​ដឹក​ជញ្ជូន​ថ្នាក់​ជាតិ ព្រមទាំង​បញ្ហា​ផ្សេងៗ​ទៀត ស្ថិត​ក្រោម​កិច្ចព្រមព្រៀង​ដឹកជញ្ជូន​ឆ្លងកាត់​ព្រំដែន នៃ​មហា​អនុ​តំបន់​មេគង្គ​។​

យោង​តាម​លំដាប់​អក្សរ​ឡាតាំង កម្ពុជា គឺជា​ប្រធាន​កិច្ចប្រជុំ​គណៈកម្មាធិការ​រួម​នៃ​កិច្ចព្រមព្រៀង​ដឹក​ជញ្ជូន​ឆ្លងកាត់​ព្រំដែន នៃ​មហា​អនុ​តំបន់​មេគង្គ និង​កិច្ចប្រជុំ​គណៈកម្មាធិការ​រួម​សម្របសម្រួល​ការ​ដឹក​ជញ្ជូន​ថ្នាក់​ជាតិ នៅ​ក្នុង​ឆ្នាំ​២០១៨-២០១៩​។​

​លោក​ទេសរដ្ឋមន្ត្រី ស៊ុន ចាន់ថុល បាន​សម្ដែង​នូវ​ការ​ថ្លែង​អំណរគុណ​ចំពោះ​ធនាគារ​អភិវឌ្ឍន៍​អាស៊ី​ដែល​បាន​ជួយ​កម្ពុជា ក្នុង​ការរៀបចំ​កិច្ចប្រជុំ​ខាងលើ​។

លោក​ទេសរដ្ឋមន្ត្រី​ក៏បាន​គូស​បញ្ជាក់​អំពី​កំណែទម្រង់​សំខាន់ៗ​ដែល​បាន​បញ្ចប់ និង​កំពុង​អនុវត្ត នៅ​ក្រសួង​សាធារណការ និង​ដឹកជញ្ជូន ព្រមទាំង​ផែនការ​អភិវឌ្ឍន៍​ហេដ្ឋារចនាសម្ព័ន្ធ​នៅ​កម្ពុជា​។​

លោក Hideaki Iwasaki បានបង្ហាញ​ទំនុក​ចិត្ត​ខ្ពស់​ថា ក្រោម​ការរៀបចំ និង​ដឹកនាំ​កិច្ចប្រជុំ​របស់​កម្ពុជា ជាពិសេស ក្រោម​ការដឹកនាំ​របស់ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រី​ក្រសួង​សាធារណការ និង​ដឹកជញ្ជូន ការអនុវត្ត «​ការ​ប្រមូល​ផល​ដំបូង នៃ​កិច្ចព្រមព្រៀង​សម្របសម្រួល​ការ​ដឹក​ជញ្ជូន​ឆ្លង​កាត់​ព្រំដែន នៃ​មហា​អនុ​តំបន់​មេគង្គ​» នឹង​ប្រព្រឹត្ត​ទៅ​ដោយ​រលូន​។​

តាម​ការ​ស្នើ​សុំ​ពី​ធនាគារ​អភិវឌ្ឍន៍​អាស៊ី កម្ពុជា​នឹង​ទទួល​ធ្វើជា​ម្ចាស់ផ្ទះ​រៀបចំ​កិច្ចប្រជុំ​គណៈកម្មា​ធិការ​រួម នៃ​កិច្ចព្រមព្រៀង​ដឹកជញ្ជូន​ឆ្លងកាត់​ព្រំដែន នៃ​មហា​អនុ​តំបន់​មេគង្គ និង​កិច្ចប្រជុំ​គណៈកម្មា​ធិការ​រួម​សម្របសម្រួល​ការ​ដឹក​ជញ្ជូន​ថ្នាក់​ជាតិ ក្នុង​សប្ដាហ៍​ចុងក្រោយ ​នៃ​ខែ​មករា ឆ្នាំ​២០១៩ ដោយ​គ្រោង​នឹង​ពិភាក្សា​លើ​ចំណុច​សំខាន់ៗ ដូចខាងក្រោម ​៖
-ការ​បង្កើន​តម្រាយ​ផ្លូវ និង​ច្រក​ព្រំដែន ដែល​មាន​ចែង​ក្នុង​ពិធីសារ​ទី​១
-ការអង្កេត វាយតម្លៃ ការអនុវត្ត «​ការប្រមូល​ផល​ដំបូង នៃ​កិច្ចព្រមព្រៀង​សម្របសម្រួល
-ការ​ដឹកជញ្ជូន​ឆ្លងកាត់​ព្រំដែន នៃ​មហា​អនុតំបន់​មេគង្គ​»
- ការ​ពន្យារ​ពេល អនុស្សរណៈ​ នៃ​ការអនុវត្ត «​ការ​ប្រមូល​ផល​ដំបូង នៃ​កិច្ចព្រមព្រៀង​» ក្រោយ​ខែ​ឧសភា ឆ្នាំ​២០១៩
-ការ​ជួយ​ពង្រឹង​សមត្ថភាព​ប្រតិបត្តិ​ករ​ផ្ដល់​សេវា​ដឹកជញ្ជូន និង​ភស្តុភារ​កម្ម​
-ការ​ធ្វើ​បច្ចុប្បន្នភាព «​កិច្ចព្រមព្រៀង​សម្របសម្រួល​ការ​ដឹក​ជញ្ជូន​ឆ្លងកាត់​ព្រំដែន នៃ​មហា​អនុ​តំបន់​មេគង្គ២.០»៕


Source: Kampuchea Thmey Daily