ភ្នំពេញ ៖ ក្រសួងសង្គមកិច្ច អតីតយុទ្ធជន និងយុវនីតិសម្បទា បានចុះកិច្ចព្រមព្រៀង (MoU) ជាមួយអង្គការធំៗចំនួន៣ ក្នុងទំហំទឹកប្រាក់ជាង២លានដុល្លារ សម្រាប់គម្រោង៣ឆ្នាំ ដើម្បីជួយដល់កុមារ និងស្ត្រីរងគ្រោះ និងងាយរងគ្រោះនៅកម្ពុជា។
កិច្ចព្រមព្រៀងនេះ បានធ្វើឡើងកាលពីថ្ងៃទី១៣ ខែវិច្ឆិកា ឆ្នាំ២០១៨ ដោយមានការចូលរួមពី លោក ហាច ហ៊ាន អនុរដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា, មន្ត្រីពាក់ព័ន្ធរបស់ក្រសួង រួមនឹងតំណាងរបស់អង្គការទាំង៣ និងមន្ត្រី-ក្រុមការងារ នៅតាមបណ្ដាខេត្តជាច្រើនរូបទៀត។
អង្គការចំនួន៣ ដែលបានចុះកិច្ចព្រមព្រៀងជាមួយក្រសួងសង្គមកិច្ចនេះ រួមមាន អង្គការហូលថ៍ដើម្បីសុខុមាលភាព ដោយមានគម្រោងថវិកាចំនួន៣៦ម៉ឺនដុល្លារ សម្រាប់រយៈពេល៣ឆ្នាំ, អង្គការពន្លឺកម្ពុជា ដោយមានគម្រោងថវិកាចំនួន៧៩១,១៦៨ដុល្លារ សម្រាប់រយៈពេល៣ឆ្នាំ និងអង្គការជំហានដំបូងកម្ពុជា មានគម្រោងថវិកាចំនួន៨៥៤, ៨៣១ដុល្លារ សម្រាប់រយៈពេល៣ឆ្នាំ។
លោក ហាច ហ៊ាន បានមានប្រសាសន៍ថាការចុះហត្ថលេខា ជាមួយអង្គការចំនួន៣នេះ ក្នុង គោលដៅសំខាន់ គឺផ្ដោតលើការងារជួយឧបត្ថម្ភផ្នែកអប់រំសុខុមាលភាព និងជីវភាពរស់នៅរបស់កុមារ ជនរងគ្រោះ និងជនងាយរងគ្រោះ។
ជាមួយគ្នានោះ លោកបានស្នើដល់អង្គការទាំង៣នេះ ត្រូវប្រើប្រាស់ថវិកាទាំងនេះឲ្យចំទិសដៅដល់ជនរងគ្រោះ និងងាយរងគ្រោះផ្ទាល់ ឲ្យបានច្រើនជាងការចំណាយផ្នែករដ្ឋបាល។
លោកបានស្នើដល់អង្គការទាំង៣នេះ អនុវត្តគោរពទៅតាមការចុះកិច្ចព្រមព្រៀង មានភាពស្មោះត្រង់ក្នុងការជួយសង្គមកម្ពុជាយ៉ាងពិតប្រាកដ។
លោកក៏បានស្នើឲ្យក្រុមការងារក្រសួង និងអង្គការ ដែលសហការនាពេលនេះរួមគ្នា ដើម្បីធ្វើការងារជួយដល់ការអប់រំ ការសិក្សា និងអភិវឌ្ឍន៍កុមារងាយរងគ្រោះនៅកម្ពុជា ដាច់ស្រយាល និងជួយដល់ កុមារ កំព្រា កុមារក្រីក្រ និងកុមារដែលរងគ្រោះ ដោយសារអំពើហិង្សា។
សម្រាប់ក្រសួងសង្គមកិច្ចវិញ នៅតែស្វាគមន៍ជានិច្ច ជាមួយ ដៃគូពាក់ព័ន្ធ និងអង្គការនានា ដើម្បីជួយដល់ជនរងគ្រោះនៅកម្ពុជា ឲ្យមានជីវភាព និងជីវិតរស់នៅ ល្អប្រសើរថែមមួយកម្រិតទៀត៕
Source: Kampuchea Thmey Daily
0 Comments