ព្រឹត្តិការណ៍ដណ្ដើមខ្សែក្រវាត់ Carabao ទម្ងន់៦០គីឡូក្រាម នៅលើសង្វៀនSEA -TV បានឈានដល់វគ្គផ្ដាច់ព្រ័ត្រហើយ នាល្ងាចថ្ងៃសៅរ៍ ទី១៧ ខែវិច្ឆិកា ឆ្នាំ២០១៨នេះ រវាង សូត្រ ប៊ុនធី អ្នកប្រដាល់ក្លិបបក្សីស្លាបដែក និង អ្នកប្រដាល់ថៃ Phat Thana។
សូត្រ ប៊ុនធី និង Phat Thana ពួកគេពីរនាក់នេះ ត្រូវបានគេទស្សន៍ទាយមុនថា សូត្រ ប៊ុនធី នឹងក្លាយជាម្ចាស់ជើងឯកខ្សែCarabaoនេះ ព្រោះថា Phat Thana ធ្លាប់ចាញ់ សូត្រ ប៊ុនធី ១លើកហើយ ក្នុងការជួបប្រកួតគ្នាក្នុងវគ្គជម្រុះកន្លងមក ដោយ ប៊ុនធី ឈ្នះ Phat Thana ដោយពិន្ទុ។
Phat Thana នេះ គេជាអ្នកខ្លាំងជាងគេនៅក្នុងពូលកីឡាករថៃ។ Phat Thana ក្នុងការប្រកួតជម្រុះក្នុងពូលថៃ ដែល៤រូបនោះ គេវាយឈ្នះបាន៣ប្រកួត និងចាញ់១ប្រកួត គឺបាន១០ពិន្ទុ។ អ្នកប្រដាល់ថៃរូបនេះ មានកំណត់ត្រាប្រកួតចំនួន៧៣លើក ឈ្នះ៦០លើក និងចាញ់១២លើក និងស្មើ០១លើក។
សូត្រ ប៊ុនធី ជាអ្នកប្រដាល់ដែលមានកាយសម្បទាល្អ ខ្ពស់ ដៃជើងវែង ដែលអំណោយផលដល់ការប្រកួត។ ជាមួយគ្នានេះ ប៊ុនធី មានចិត្តប្រដាល់ធំ មានស្នៀតគុនល្អ និងវាយខ្លាំងជាង បើប្រៀបជាមួយ Phat Thana នោះ។ សូត្រ ប៊ុនធី មានកំណត់ត្រាប្រកួតគេមានកំណត់ត្រាប្រកួត១១៦លើក ឈ្នះ៩២លើក ចាញ់២០លើក និងស្មើ០៤លើក។
ប៉ុន្តែយ៉ាងណា សូត្រ ប៊ុនធី មិនប្រាកដថា ឈ្នះមួយរយភាគរយនោះទេ ព្រោះថាការប្រកួតមិនទៀងទាត់ ហើយម្យ៉ាងទៀត អ្នកប្រដាល់ថៃ Phat Thana នេះ គេក៏ខ្លាំងដែរ។
សូមបញ្ជាក់ថា ការប្រកួតជើងឯកខារ៉ាបាវរដូវកាលទី៧ ទម្ងន់៦០គីឡូក្រាមលើកនេះ មានអ្នកប្រដាល់ខ្លាំងៗចំនួន៨រូប ចូលរួមប្រកួត គឺខ្មែរ៤នាក់ ថៃ៤នាក់។ តែលក្ខខណ្ឌប្រកួត តម្រូវយកតែមួយនាក់ក្នុងមួយពូលប៉ុណ្ណោះ ព្រោះការប្រកួតដណ្ដើមខ្សែក្រវាត់Carabaoនេះ មានចំណាត់ថ្នាក់តែលេខ១ និង លេខ២ ប៉ុណ្ណោះ។
ចំពោះគូដែលប្រកួតអមគូខ្សែក្រវាត់នេះ ជាការប្រកួតលក្ខណៈអន្តរជាតិ ដែលមាន១គូ នោះ គឺ ម៉ន សាម៉េត អ្នកប្រដាល់ក្លិការិយាល័យទី៥កងទ័ពជើងគោក នឹងត្រូវជួបជាមួយអ្នកប្រដាល់ថៃចំណូលថ្មី ឈ្មោះ Ty Sa។ ពួកគេទាំងពីរ ជួបប្រកួតគ្នាក្នុងប្រភេទទម្ងន់៥៧គ.ក្រ។ Ty Sa នេះ គេជាអ្នកប្រដាល់ថៃចំណូលថ្មី មិនធ្លាប់មកប្រកួតនៅសង្វៀនSEA-TVនេះទេកន្លងមក។
ដូច្នេះ Ty Sa មិនដឹងថា គេល្អ និងខ្លាំងប៉ុណ្ណានោះទេ ហើយក៏មិនអាចឲ្យ ម៉ន សាម៉េត មើលស្រាលបានដែរ។ ចាំមើល ម៉ន សាម៉េត គេអាចយកឈ្នះអ្នកប្រដាល់ថៃនេះបាន ឬអត់?។
ម៉ន សាម៉េត គេបានវាយឈ្នះអ្នកប្រដាល់ថៃច្រើននាក់ជាប់ៗគ្នា ដែលការប្រកួតលើកចុងក្រោយនោះ គេវាយឈ្នះ អ្នកប្រដាល់ថៃYorth Savich ក្នុងទឹកទី៤។
ម៉ន សាម៉េត មានកំណត់ត្រាប្រកួតចំនួន១៣៩លើក ក្នុងនោះវាយឈ្នះ១០២លើក ចាញ់៣២លើក និងស្មើ០៥លើក។
កណ្ដាប់ដៃ កែង និងជើងទាត់របស់ សាម៉េត វាយចេញខ្លាំង និងមានទម្ងន់ធ្ងន់គួរសមដែរ។ ជាអ្នកប្រដាល់ដែលមិនចេះវាយបន្ធូរដៃនោះទេ ឲ្យតែគេយល់ថាដៃគូអាចបង្ក្រាបបាន គឺគេមិនប្រោះទុកយូរទេ គេផ្ដួលយកឈ្នះតែម្ដង។ និយាយពីបច្ចេកទេស និងកលល្បិចនោះ សាម៉េត គេមានពេញខ្លួន ៕
Source: Kampuchea Thmey Daily
0 Comments