ប្រធានាធិបតីរុស្ស៊ីលោក Vladimir Putin បាននិយាយថា លោកមានកិច្ចសន្ទនាខ្លីមួយប៉ុន្តែជាកិច្ចសន្ទនាដ៏ល្អជាមួយមេដឹកនាំអាមេរិកលោក Donald Trump នៅព្រឹត្តិការណ៍រំលឹកសង្គ្រាមលោកលើកទី១ក្នុងទីក្រុងប៉ារីស។
ទីភ្នាក់ងារព័ត៌មានរដ្ឋ RIA Novosti បានរាយការណ៍ថា នៅពេលដែលអ្នកកាសែតសួរលោក Putin ថាតើគាត់បានព្យាយាមនិយាយទៅកាន់លោក Trump មែនទេកាលពីថ្ងៃអាទិត្យ, គាត់និយាយថា “មែន”។ នៅពេលសួរថាតើវាដំណើរការយ៉ាងណា លោក Putin និយាយថា “ល្អ”។
ទោះបីជាយ៉ាងណាក៏ដោយ លោកមិនបានផ្តល់ព័ត៌មានលម្អិតទេប៉ុន្តែប្រធានាធិបតីបារាំងបានបាននិយាយថា អ្នកទាំងពីរបានពិភាក្សាគ្នាយ៉ាងទូលំទូលាយក្នុងអំឡុងពេលអាហារថ្ងៃត្រង់បន្ទាប់ពីការប្រារព្ធពិធី។
ប្រធានាធិបតីបារាំងលោក Emmanuel Macron គឺនៅទីនោះហើយអធិការបតីអាល្លឺម៉ង់លោកស្រី Angela Merkel បានចូលរួមនៅក្នុងការពិភាក្សាមួយចំនួន។
ប្រធានបទដែលបានពិភាក្សាគឺរួមមានស្ថានភាពនៅតំបន់មជ្ឈឹមបូព៌ាជាពិសេសប្រទេសស៊ីរី អ៊ីរ៉ង់ អារ៉ាប៊ីសាអ៊ូឌីតនិងប្រទេសកូរ៉េខាងជើង។
អ្នកនាំពាក្យសេតវិមានលោកស្រី Sarah Sanders បាននិយាយថា លោក Trump បានអង្គុយជាមួយមេដឹកនាំពិភពលោកនានារួមទាំងលោក Putin, លោក Macron និងលោកស្រី Merkel ផងដែរអំឡុងអាហារថ្ងៃត្រង់ហើយក្រុមនេះបានរៀបចំកិច្ចពិភាក្សាដ៏ល្អនិងប្រកបដោយផលិតភាព។
ការរំពឹងទុកបានកើនឡើងសម្រាប់ជំនួបថ្មីមួយរវាងលោក Trump និងលោក Putin ខណៈភាពតានតឹងបានកើនឡើងទាក់ទងនឹងសន្ធិសញ្ញាកងកម្លាំងនុយក្លេអ៊ែររយៈចម្ងាយមធ្យម (INF) សម័យសង្គ្រាមត្រជាក់និងការដាក់ទណ្ឌកម្មរបស់អាមេរិកប្រឆាំងទីក្រុងមូស្គូ។
កាលពីខែមុនលោក Trump បានបង្កឲ្យមានការព្រួយបារម្ភទូទាំងពិភពលោកនៅពេលលោកបាននិយាយថា លោកនឹងលុបចោលកិច្ចព្រមព្រៀង INF ខណៈលោក Putin បានព្រមានថា ការបោះបង់ចោលសន្ធិសញ្ញានេះនឹងបើកឲ្យមានការប្រកួតប្រជែងសព្វាវុធថ្មីនិងធ្វើឲ្យអឺរ៉ុបស្ថិតក្នុងសភាពគ្រោះថ្នាក់។
គួរបញ្ជាក់ថា មេដឹកនាំពិភពលោកប្រហែល៧០រូបបានធ្វើដំណើរទៅកាន់រដ្ឋធានីរបស់ប្រទេសបារាំងដើម្បីកត់សំគាល់រយៈពេល១០០ឆ្នាំនៃបទឈប់បាញ់ឆ្នាំ១៩១៨៕ AFP
Source: Kampuchea Thmey Daily
0 Comments