មន្ត្រីសាខាកាំកុងត្រូលខេត្ត បន្តការរឹតបន្តឹងការត្រួតពិនិត្យទំនិញ និងការធ្វើតេស្តបឋម (test kit) លើចំណីអាហារ

ប៉ៃលិន ៖ នៅព្រឹកថ្ងៃទី១៣ ខែវិច្ឆិកា ឆ្នាំ២០១៨ លោក ឈឹម វាសនា ប្រធានសាខាកាំកុងត្រូលខេត្តប៉ៃលិន លោក សុខ សុធីម ប្រធានមន្ទីរពាណិជ្ជកម្មខេត្ត បានដឹកនាំមន្ត្រីជំនាញពាក់ព័ន្ធ បន្តរឹតបន្តឹងការត្រួតពិនិត្យទំនិញ និងផលិតផលចំណីអាហារខូចគុណភាព ព្រមទាំងធ្វើតេស្តបឋម (Test Kit) ដើម្បីរកសារធាតុគីមី ក្នុងគោលបំណងទប់ស្កាត់ឲ្យបានកាន់តែខ្ពស់ ចំពោះការចរាចរណ៍ទំនិញខូចគុណភាព ដែលនាំឲ្យប៉ះពាល់ដល់សុខភាពរបស់ប្រជាពលរដ្ឋ។

ការបន្តចុះពិនិត្យទំនិញនេះដែរ បានធ្វើឡើងនៅច្រកអន្តរជាតិព្រំខេត្តប៉ៃលិន ព្រំដែនកម្ពុជា-ថៃ និងតាមផ្សារព្រំថ្មី ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។

បើតាមបងប្អូនក្រុមអាជីវករផ្សាព្រំថ្មី បានសំដែងនូវអារម្មណ៍រីករាយ ដែលបានឃើញមន្ត្រីជំនាញកាំកុងត្រូលមកចុះណែនាំ និងផ្សព្វផ្សាយពីសារៈសំខាន់ នៃការធ្វើតេស្តបឋម និង ការមើលទំនិញខូចគុណភាព ហួសសុពលភាពអោយពួកគាត់យល់ដឹងកាន់តែច្បាស់ ជៀសវាងចំណីអាហារដែលមានសារធាតុគីមី ប៉ះពាល់សុខភាព(បទសម្ភាសន៍អាជីវករលក់ដូរក្នុងផ្សារព្រំថ្មី)។

ចំណែកប្រជាពលរដ្ឋម្នាក់ ដែលមកទិញម្ហូបអាហារ នៅផ្សារខាងលើ ក៏បានលើកឡើងដែរថា គាត់ពីមុនមកមិនដែលដឹងថា ទិញណាដែលគ្មានគុណភាព ហួសសុពលភាព ឫខូចគុណភាព នោះទេ ទើបតែពេលនេះ បានមន្ត្រីជំនាញកាំកុងត្រូលមកពន្យល់ណែនាំ ទើបយល់ខ្លះៗ ដូច្នេះសូមឲ្យមន្ត្រីជំនាញបន្តខិតខំយកចិត្តទុកផ្សព្វផ្សាយ និង អនុវត្តការងារឲ្យបានល្អថែមទៀត(បទសម្ភាសន៍ប្រជាពលរដ្ឋដែលមកទិញម្ហូបអាហារ)។

ពាក់ព័ន្ធបញ្ហានេះដែរ លោក ឈឹម វាសនា ប្រធានសាខាកាំកុងត្រូលខេត្តប៉ៃលិន មានប្រសាសន៍ឲ្យដឹងថា កន្លងមកសាខាកាំកុងត្រូលខេត្តប៉ៃលិន បានសហការជាមួយមន្ត្រី នៃមន្ទីរពាណិជ្ជកម្មខេត្ត ធ្វើការចុះត្រួតពិនិត្យ និងដកហូតទំនិញខូចគុណភាព ហួសកាលកំណត់ គ្មានស្លាកសញ្ញាត្រឹមត្រូវ និងមិនមានច្បាប់អនុញ្ញាត ដើម្បីថែរក្សានិងការពារសុខុមាលភាព ជូនប្រជាពលរដ្ឋ ព្រោះថា សុខភាពមនុស្សគ្រប់ៗរូបគឺមានតម្លៃណាស់ ដូច្នេះថ្នាក់ដឹកនាំ និងមន្ត្រីសាខាកាំកុងត្រូលខេត្ត បានប្ដេជ្ញាបន្ត អនុវត្តន៍ការងារចុះផ្សព្វផ្សាយ និងត្រួតពិនិត្យទំនិញដែលបានដាក់តាំងលក់ជាប្រចាំ ជាពិសេសទប់ស្កាត់នៅមាត់ច្រកទ្វារអន្តរជាតិ ស្របតាមការណែនាំរបស់អគ្គនាយកដ្ឋានកាំកុងត្រូល និងឯកឧត្ដម ប៉ាន់ សូរស័ក្តិ រដ្ឋមន្ត្រីក្រសួងពាណិជ្ជកម្ម។

លោកបានបន្តថា នៅព្រឹកនេះ មន្ត្រីជំនាញកាំកុងត្រូល ក៏បានធ្វើការត្រួតពិនិត្យ និងធ្វើតេស្តបឋម (test kit) លើចំណីអាហារ រួមមានដូចជា ៖ ត្រីចាប ត្រីកាប ត្រីកាម៉ុង ត្រីទីលាបយ៉ា ត្រីកាញ់ ខ្ញី សាច់មាន់ បង្ការ ជាដើម ដើម្បីទប់ស្កាត់សាធាតុប៉ូរ៉ាក់ ដែលធ្វើឲ្យប៉ះពាល់ ដល់សុខភាព របស់បងប្អូនប្រជាពលរដ្ឋ ដែលពួកគាត់យកទៅបរិភោគជាប្រចាំ ក្នុងន័យលើកកម្ពស់សុខភាពប្រជាពលរដ្ឋឲ្យបានកាន់តែល្អប្រសើរ។

ជាមួយគ្នានេះដែរ លោកប្រធានសាខា ក៏បានពន្យល់ណែនាំដល់អាជីវក និង ប្រជាពលរដ្ឋ អំពីផលប៉ះពាល់សុខភាព ចំពោះទំនិញ និងផលិតផលចំណីអាហារ ដែលខូចគុណភាព និងហួសសុពលភាព យកមកទទួលទាន ព្រមទាំងត្រូវចេះមើល និងត្រួតពិនិត្យទំនិញផលិតផលចំណីអាហារខូចគុណភាព ទំនិញគ្មានសុវត្ថិភាព និងគ្មានអនាម័យផងដែរ (សូមស្តាប់ការបញ្ជាក់ពី លោក ឈឹម វាសនា ប្រធានសាខាកាំកុងត្រូលខេត្តប៉ៃលិន)។

សូមបញ្ជាក់ថា ៖ ការធ្វើតេស្តបឋម (Test Kit) លើចំណីអាហារបរិភោគនៅច្រកអន្តរជាតិព្រំខេត្តប៉ៃលិន អស់ពេញ១ព្រឹក ពុំរកឃើញសារធាតុហាមឃាត់វិញនោះទេ៕