ប្រធានាធិបតីអាមេរិកលោក Donald Trump កាលពីថ្ងៃសុក្របានស្តីបន្ទោសដល់ការអំពាវនាវរបស់លោក Emmanuel Macron ដែលឲ្យកងទ័ពអឺរ៉ុបត្រូវការពារប្រឆាំងនឹងការគំរាមកំហែងពីមហាអំណាចដោយរួមទាំងសហរដ្ឋអាមេរិកផងដែរថាជា “ការប្រមាថយ៉ាងខ្លាំង” ដែលនេះជាហេតុបញ្ឆេះឲ្យមានភាពចម្រូងចម្រាស់សម្រាប់ដំណើរទស្សនកិច្ចរំលឹកសង្គ្រាមលោកលើកទីមួយរបស់គាត់ទៅកាន់ទីក្រុងប៉ារីស។
លោក Trump បានទៅដល់ទីក្រុងប៉ារីសសម្រាប់ព្រឹត្តិការណ៍ចុងសប្តាហ៍ដើម្បីរំលឹកអំពីទីបញ្ចប់នៃសង្គ្រាមលោកលើកទី១ហើយបន្ទាប់មកគាត់បានបង្ហោះ Twitter អំពីសំណើនានាដើម្បីបញ្ចប់ការឧបត្ថម្ភដល់សហភាពអឺរ៉ុប។
ប្រធានាធិបតីអាមេរិកបានបង្ហោះ Twitter ដោយសំដៅលើការកត់សម្គាល់របស់លោក Macron កាលពីបីថ្ងៃមុនថា “លោកប្រធានាធិបតី Macron នៃប្រទេសបារាំងទើបតែបានលើកឡើងថា អ៊ឺរ៉ុបត្រូវតែបង្កើតកងទ័ពផ្ទាល់របស់ខ្លួនក្នុងដើម្បីការពារខ្លួនពីសហរដ្ឋអាមេរិក ចិននិងរុស្ស៊ី”។
លោកបានបន្ថែមថា “នោះជាការប្រមាថមើលងាយយ៉ាងខ្លាំងប៉ុន្តែប្រហែលជាអឺរ៉ុបត្រូវបង់ភាគហ៊ុនសមរម្យជាដំបូងសិនដល់អង្គការណាតូដែលសហរដ្ឋអាមេរិកបានផ្តល់ប្រាក់ឧបត្ថម្ភយ៉ាងច្រើនក្រាស់ក្រែល!”។
លោក Macron ដែលជាអ្នកតស៊ូមតិដ៏រឹងមាំនៃការធ្វើសមាហរណកម្មអឺរ៉ុបកាន់តែជិតស្និទ្ធបាននិយាយថា កងកម្លាំងយោធារួមរបស់សហភាពអឺរ៉ុបគឺចាំបាច់ណាស់ដើម្បីការពារទ្វីបអឺរ៉ុបពីកម្លាំងរបស់អាមេរិក។
លោកបានប្រាប់បណ្តាញផ្សព្វផ្សាយ Europe 1 ថា “យើងត្រូវតែការពារខ្លួនយើងពីប្រទេសចិន រុស្ស៊ីនិងសូម្បីតែសហរដ្ឋអាមេរិកផងដែរ”។ លោកបានលើកឡើងជាលើកដំបូងថា អឺរ៉ុបប្រហែលជាចាំបាច់ត្រូវការពារខ្លួនពីសហរដ្ឋអាមេរិក។
ប្រធានាធិបតីបារាំងរូបនេះដែលបានអនុម័តការបង្កើនការចំណាយយោធាសំខាន់ៗដើម្បីនាំប្រទេសបារាំងឲ្យស្របតាមគោលដៅចំណាយរបស់អង្គការណាតូគឺកំពុងដឹកនាំការបង្កើតកងកម្លាំងប្រតិកម្មរហ័សរបស់អឺរ៉ុបចំនួន៩ប្រទេសដែលជាការបំបែកខ្លួនពីអង្គការណាតូ៕ AFP
Source: Kampuchea Thmey Daily
0 Comments